Imḍebbṛen d iwekkalen (iqeddacen) yelhan

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁴ Ass n tuɣalin n Mmi-s n wemdan ad yili daɣen am yiwen n wergaz i itteddun ad iṛuḥ ɣer lɣeṛba, isnejmaɛ-d iqeddacen-is, iwekkel-iten ɣef wayen akk yesɛa. ¹⁵ Ifka i umezwaru xems meyya n twiztin n uṛeɣ, wis sin ifka-yas mitin, wis tlata ifka-yas meyya ; ifka i yal yiwen akken yezmer, dɣa iṛuḥ. ¹⁶ Imiren kan, aqeddac-nni iwumi yefka xems meyya n twiztin, iṛuḥ ittjaṛ yis-sent, irbeḥ-d xems meyya nniḍen. ¹⁷ Ula d win iwumi yefka mitin, ixdem akken, irbeḥ-d mitin nniḍen. ¹⁸ Ma d win iwumi yefka meyya, iṛuḥ iɣza di lqaɛa, iffer tiwiztin-nni i as-d-ifka umɛellem-is. ¹⁹ Mi yɛedda lweqt, yuɣal-d umɛellem-nni, isnejmaɛ-iten-id i wakken ad imḥasab yid-sen. ²⁰ Win akken iwumi yefka xems meyya n twiztin, yusa-d iwwi-d yid-s xems meyya n twiztin nniḍen, inna-yas : A sidi tefkiḍ-iyi-d xems meyya n twiztin n uṛeɣ, ha-tent-in xems meyya nniḍen i d-rebḥeɣ yis-sent. ²¹ Amɛellem-is inna-yas : D ayen yelhan i txedmeḍ ay aqeddac unṣiḥ, imi deg-k laman ɣef tɣawsiwin timecṭuḥin, sya d asawen ad ak-wekkleɣ ɣef tmeqqranin ! Ili-k di lfeṛḥ yid-i ! ²² Aqeddac-nni iwumi yefka mitin n twiztin n uṛeɣ, iqeṛṛeb-d ula d netta, inna-yas : A sidi tefkiḍ-iyi mitin n twiztin n uṛeɣ, ha-tent-in mitin nniḍen i d-rebḥeɣ yis-sent. ²³ Amɛellem-is inna-yas : D ayen yelhan i txedmeḍ, ay aqeddac unṣiḥ imi deg-k laman ɣef tɣawsiwin timecṭuḥin, sya d asawen ad ak-wekkleɣ ɣef tmeqqranin ! Ili-k di lfeṛḥ yid-i ! ²⁴ Iwweḍ-d win akken iwumi yefka meyya n twiztin, inna-yas : A sidi, ẓriɣ-k d argaz iweɛṛen, tmeggreḍ anda ur tezriɛeḍ, tjemmɛeḍ seg wannar ayen ur tesrewteḍ, ²⁵ dɣa uggadeɣ-k, daymi i ṛuḥeɣ ffreɣ deg wakal tiwiztin-nni i yi-tefkiḍ. Atan wayla-k, ddem-it ! ²⁶ Amɛellem-is inna-yas : Ay aqeddac amcum, ameɛdaz ! Imi i yi-teẓriḍ meggreɣ-d anda ur zriɛeɣ, jemmɛeɣ-d daɣen anda ur srewteɣ, ²⁷ acuɣer ihi ur tessekraḍ ara idrimin-iw i wakken mi ara d-uɣaleɣ ad ten-id-rreɣ s lfayda. ²⁸ Imiren amɛellem-nni yumeṛ i yiqeddacen-is inna-yasen : Kkset-as meyya-nni n twiztin ternum-tent i win yesɛan ɛecṛa alef n twiztin ! ²⁹ Axaṭer kra win yesɛan, ad as-nernu ad yili di tawant, ma d win ur nesɛi ara, ad as-nekkes ula d ayen yesɛa. ³⁰ Ma d aqeddac-agi ur nemɛin, ḍeggret-tt ɣer ṭṭlam n beṛṛa anda ara yilin imeṭṭawen d nndama tameqqrant.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.