Imḍebbṛen ttemsawalen gar yidlasen

Ɣef leḥsab n wayen i wen-d-iḍran segmi nemlal tikkelt taneggarut, d acu n tɣawsa i ɣef ad t-ḥemmdem Ṛebbi fellas?

D acu i k-yestqalqen dduṛt-agi (ssmana-agi), akked d acu i teḥwaǧeḍ iwakken ad ssegmen-t temsal?

D acu-tent lmaḥwijat n yemdanen di tajmaɛt-nwen, yerna amek i nezmer a nemɛawen-t wwam gar-anneɣ iwakken a nqabel lmahwijat-agi i d-nebder?

D acu-tt teqṣiḍt n tikkelt i g ɛeddan mi nemlal? D acu i nelmed ɣef Ṛebbi d yemdanen?

Deg temlilit-nneɣ taneggarut, teṭṭfeḍ leqcaḍ ad t-tesxedmeḍ ayen i tlemḍeḍ. D acu i txedmeḍ, amek i tɛedda?

Anwi iwumi teḥkam (tebḍam) kra si teqṣiḍt taneggarut? Amek i wen-d-rran?

Tikkelt-nni taneggarut mi nemlal, nwala-d ddeqs n lmaḥwijat yerna nhegga-d a ten-t-nqabel. Amek i tɛedda?

Tura, eyyaw a nɣer teqṣiḍt n wass-a sɣur Ṛebbi...

¹⁶ Mi akken i yettṛaǧu Bulus Silas akked Timuti di Atina, iɣaḍ-it lḥal mi iwala tamdint-nni teččuṛ d lmeṣnuɛat i ttɛebbiden imezdaɣ-is. ¹⁷ Di lǧameɛ, yebda ittmeslay d wat Isṛail akked iyunaniyen iḍuɛen Illu. Ittmeslay daɣen akked wid i d-ittemlili yal ass di tejmaɛt n temdint. ¹⁸ Kra n imusnawen n ṭawrat yesfelsifen, yeɛni wid ittekkin di tejmaɛt n Ibikur akked Stuwis, bdan ttmeslayen yid-s. Kra qqaren : D acu i yebɣa ad yini bu lehduṛ-agi ? Wiyaḍ qqaren : Waqila yettbecciṛ iṛebbiten ibeṛṛaniyen ! Axaṭer Bulus yella ittbecciṛ-asen Lexbeṛ n Lxir n Sidna Ɛisa akked ḥeggu n lmeyytin. ¹⁹ Dɣa wwin-t yid-sen ɣer yiwen wemkan n ccṛeɛ n temdint-nni iwumi qqaren Laryufaj, nnan-as : Nezmer ad nẓer d acu-t uselmed-agi amaynut i aɣ-d-tewwiḍ ? ²⁰ Axaṭer nesla-yak tettmeslayeḍ-d ɣef temsal yessewhamen. Nebɣa ad nissin lmeɛna-nsent. ²¹ Imezdaɣ n temdint n Atina akked ibeṛṛaniyen i izedɣen dinna, ḥemmlen ad sɛeddin lweqt-nsen anagar deg umeslay d usmeḥses i lexbaṛat imaynuten i d-itteffɣen. ²² Ibedd Bulus di tlemmast n Laryufaj inna : Ay irgazen n temdint n Atina, walaɣ-kkun tzewṛem deg wayen akk yeɛnan ddin ; ²³ axaṭer ḥewwseɣ akk tamdint-nwen, walaɣ lmeṣnuɛat akk i tɛebbdem ; ufiɣ daɣen yiwen n udebder anda yura : I yiwen uṛebbit ur nettwassen ara. Win akken i tɛebbdem mebla ma tessnem-t, d netta i wen-ttbecciṛeɣ. ²⁴ Illu-nni i d-ixelqen ddunit d wayen yellan deg-s, d Bab igenwan d lqaɛa, ur yezdiɣ ara deg ifakanen i bnan ifassen n yimdanen. ²⁵ Ur iḥwaǧ ara ad xedmen fell-as yimdanen am akken yella wayen i t-ixuṣṣen, netta i d-ittaken i yimdanen meṛṛa tudert, ṛṛuḥ d wayen akk yellan. ²⁶ Seg yiwen wemdan i d-ixleq akk leǧnas, yeɛmeṛ yis-sen ddunit ; yefka-yasen lewqat i tudert-nsen akked tilisa i tmura-nsen. ²⁷ Illu ixdem annect-agi meṛṛa i wakken ad nadin fell-as ; ahat ad t-afen s usferfed, netta ur nebɛid ara ɣef mkul yiwen deg-neɣ. ²⁸ Yis i nesɛa tudert, i nteddu, i nettili ; d ayen i d-nnan daɣen kra seg imedyazen-nwen : Ula d nekni, d arraw-is ! ²⁹ Ihi imi nella d arraw n Yillu, ur ilaq ara ad nɣil d akken Illu yettemcabi ɣer lmeṣnuɛ n uṛeɣ, neɣ n lfeṭṭa, neɣ n weẓru yettwaneǧṛen s ufus d tmusni n wemdan. ³⁰ Illu isemmeḥ i yimdanen asmi akken ur t-ssinen ara ; tura issawel-asen-d akk di mkul amkan i wakken ad beddlen tikli, ad d-uɣalen ɣuṛ-s. ³¹ Axaṭer yextaṛ ass i deg ara iḥaseb imdanen s lḥeqq, s wemdan i yextaṛ yerna yefka-yaɣ-d akk ttbut mi t-id-isseḥya si gar lmeyytin. ³² Mi slan iheddeṛ-d ɣef ḥeggu n lmeyytin, kra smesxiṛen, wiyaḍ qqaren-as : Ad ak-nḥess ɣef wannect-agi tikkelt nniḍen. ³³ Imiren, Bulus iṛuḥ yeǧǧa-ten. ³⁴ Ɣas akken aṭas i yesmesxiṛen, llan kra deg-sen umnen, ddan yid-s. Yella gar-asen Dunisus i yettekkin di tejmaɛt n Laryufaj, yiwet n tmeṭṭut isem-is Damaris akked wiyaḍ.

Tura, eyyaw ad neǧǧ yiwen ad yeḥku aḥric-a s wawalen-is, amzun iḥekku-t i umdakkel-is ur t-nesli ara yakan. A t-nɛiwen ma yella yettu kra neɣ yerna kra s tuccḍa. Ma yeḍra-d waya, nezmer ad t-nesteqsi: "Anida i t-tufiḍ deg teqṣiḍt?"

D acu i aɣ-d-tesselmad teqṣiḍt-agi ɣef Ṛebbi, ṣṣifa-s, d wayen i g-xeddem?

D acu i nelmed ɣef yimdanen, gar-asen ula d nekni, seg teqṣiḍt-agi?

Acu i d-nelmed seg teqṣiḍt-agi ɣef wamek ara nili d imḍebbren?

Amek ara tesxedmeḍ tidett n Ṛebbi i d-yekkan si teqṣiḍt-agi di tudert-ik dduṛt-agi (ssmana-agi)? D acu-tt tigawt neɣ lḥaǧa ibanen ara txedmeḍ?

Anwa iwumi ara tebḍuḍ tidett i d-yekkan si teqṣiḍt-agi uqbel ad nemlil tikkelt niḍen? Tessneḍ wiyaḍ ara yebɣun ad d-afen awal n Ṛebbi deg usnas-agi am nekni?

Imi timlilit-nneɣ tetteddu ad tekfu, iyaw ad tt-negzem di ṛṛay melmi ara nemlil tikkelt niḍen d wanwa ara yessekren (yesselḥun) timlilit-nneɣ i d-iteddun.

Nettweṣṣi-ken (Nessebɣas-iken) ad teṭṭfem tazmilt n wayen i d-nnam ad txedmemt, yerna ad tɛiwdem taɣuri i teqṣiḍt-agi deg wussan i d-iteddun uqbel ad nemlil tikkelt niḍen. Amselḥay yezmer ad ibḍu aḍris n teqṣiḍt neɣ ameslaw ma yella win ur t-nesɛi ara. Akken ara neddu, ansutar i Ssid ad aɣ-iɛawen.