ពួកជំនុំសរសើរតម្កើងព្រះជាម្ចាស់

ការប្រកបគ្នា

ដោយផ្អែកលើអ្វីដែលបានកើតឡើងចំពោះលោកអ្នក តាំងពីពេលដែលយើងបានជួបគ្នាលើកមុនមក តើមានអ្វីដែលលោកអ្នកត្រូវអរព្រះគុណដល់ព្រះជាម្ចាស់ដែរឬទេ?

តើលោកអ្នកថប់បារម្ភចំពោះរឿងអ្វីខ្លះនៅសប្ដាហ៍នេះ? តើលោកអ្នកត្រូវការអ្វីខ្លះ ដើម្បីឲ្យរឿងរ៉ាវបានប្រសើរជាងមុន?

តើអ្វីខ្លះគឺជាសេចក្ដីត្រូវការរបស់មនុស្សនៅក្នុងសហគមន៍របស់លោកអ្នក? តើលោកអ្នកអាចជួយគ្នាបំពេញសេចក្ដីត្រូវការដែលយើងបានបង្ហាញចេញបានយ៉ាងដូចម្ដេច?

កាលជួបគ្នាលើកមុន តើយើងបានរៀនអំពីរឿងអ្វីខ្លះ? តើយើងរៀនបានអ្វីខ្លះអំពីព្រះជាម្ចាស់ និងមនុស្ស?

កាលជួបគ្នាលើកមុន លោកអ្នកបានសម្រេចចិត្តអនុវត្តនូវអ្វីដែលលោកអ្នកបានរៀន។ តើលោកអ្នកបានធ្វើអ្វីខ្លះ ហើយវាមានដំណើរការទៅយ៉ាងដូចម្ដេចដែរ?

តើលោកអ្នកបានចែកចាយរឿងកាលពីលើកមុនជាមួយនរណា? តើពួកគេបានឆ្លើយតបយ៉ាងដូចម្ដេច?

យើងបានឃើញសេចក្ដីត្រូវការមួយចំនួនកាលពីជួបគ្នាលើកមុន ហើយក៏បានរៀបផែនការបំពេញសេចក្ដីត្រូវការទាំងនោះ តើវាដំណើរការទៅយ៉ាងដូចម្ដេចដែរ?

ឥឡូវនេះ សូមអានរឿងមកពីព្រះជាម្ចាស់សម្រាប់ថ្ងៃនេះ...

១ របាក្សត្រ 16: 8-36

⁸ «ចូរនាំគ្នាលើកតម្កើងព្រះ‌អម្ចាស់ ចូរប្រកាសព្រះ‌នាមព្រះអង្គ! ចូរថ្លែងអំពីស្នាព្រះ‌ហស្ដរបស់ព្រះអង្គ ប្រាប់ប្រជា‌ជាតិនានា! ⁹ ចូរច្រៀងតម្កើងព្រះអង្គ ចូរស្មូត្រទំនុកតម្កើង ថ្វាយព្រះអង្គ! ចូររៀបរាប់អំពីការអស្ចារ្យទាំងប៉ុន្មាន ដែលព្រះអង្គបានធ្វើ! ¹⁰ ចូរខ្ពស់មុខឡើង ព្រោះអ្នករាល់គ្នា ជាប្រជា‌រាស្ត្ររបស់ព្រះដ៏វិសុទ្ធ! អស់អ្នកស្វែងរកព្រះ‌អម្ចាស់អើយ ចូរសប្បាយចិត្តចុះ! ¹¹ ចូរស្វែងរកព្រះ‌អម្ចាស់ប្រកបដោយព្រះ‌ចេស្ដា ចូរស្វែងរកព្រះ‌ភ័ក្ត្រព្រះអង្គ ឥតឈប់ឈរឡើយ! ¹² ចូរនឹកដល់ការអស្ចារ្យផ្សេងៗ ដែលព្រះអង្គបានធ្វើ ចូរនឹកដល់ឫទ្ធិ‌បាដិ‌ហារិយ៍ និងការជំនុំជម្រះ ទាំងប៉ុន្មានដែលព្រះអង្គបានសម្រេច។ ¹³ អ្នករាល់គ្នាជាពូជ‌ពង្សរបស់លោកអ៊ីស្រា‌អែល ដែលជាអ្នកបម្រើរបស់ព្រះអង្គ អ្នករាល់គ្នាជាកូនចៅរបស់លោកយ៉ាកុប ដែលព្រះអង្គបានជ្រើសរើស! ¹⁴ មានតែព្រះ‌អម្ចាស់ទេ ដែលជាព្រះរបស់យើង ព្រះអង្គគ្រប់‌គ្រងលើផែនដីទាំងមូល។ ¹⁵ ចូរនឹកដល់សម្ពន្ធ‌មេត្រីរបស់ព្រះអង្គជានិច្ច គឺជាព្រះ‌បន្ទូលដែលនៅស្ថិត‌ស្ថេរ រហូតដល់មួយពាន់តំណ ¹⁶ គឺសម្ពន្ធ‌មេត្រីដែលព្រះអង្គបានចងជាមួយ លោកអប្រាហាំ ព្រមទាំងព្រះ‌បន្ទូលដែលព្រះអង្គបានសន្យា ជាមួយលោកអ៊ីសាក។ ¹⁷ ព្រះអង្គបានបញ្ជាក់សម្ពន្ធ‌មេត្រីនេះ ជាមួយលោកយ៉ាកុប ទុកជាសម្ពន្ធ‌មេត្រី អស់‌កល្បជានិច្ចជាមួយជន‌ជាតិអ៊ីស្រា‌អែល។ ¹⁸ គឺព្រះអង្គមានព្រះ‌បន្ទូលថា: «យើងនឹងប្រគល់ស្រុកកាណានឲ្យអ្នក ទុកជាចំណែកមត៌ក»។ ¹⁹ នៅគ្រានោះ អ្នករាល់គ្នាជាក្រុមមួយដ៏តូច ដែលចូលមករស់នៅលើទឹកដីស្រុកកាណាន។ ²⁰ អ្នករាល់គ្នាធ្វើដំណើរពីស្រុកមួយទៅស្រុកមួយ ពីនគរមួយទៅនគរមួយទៀត។ ²¹ ប៉ុន្តែ ព្រះអង្គមិនអនុញ្ញាតឲ្យនរណាម្នាក់ សង្កត់‌សង្កិនអ្នករាល់គ្នាទេ ដើម្បីការ‌ពារអ្នករាល់គ្នា ព្រះអង្គបានបន្ទោសស្ដេចនានាថា: ²² «កុំប៉ះ‌ពាល់អស់អ្នកដែលយើងបានចាក់ប្រេង អភិសេកនេះឡើយ កុំធ្វើបាបព្យាការីរបស់យើងឲ្យសោះ!»។ ²³ មនុស្សនៅលើផែនដីទាំងមូលអើយ ចូរច្រៀងថ្វាយព្រះ‌អម្ចាស់! ចូរប្រកាសជារៀងរាល់ថ្ងៃ អំពីការសង្គ្រោះរបស់ព្រះអង្គ។ ²⁴ ចូរប្រកាសអំពីសិរី‌រុងរឿងរបស់ព្រះអង្គ នៅក្នុងចំណោមប្រជា‌ជាតិនានា ហើយប្រកាសអំពីស្នាព្រះ‌ហស្ដដ៏អស្ចារ្យរបស់ ព្រះអង្គ នៅក្នុងចំណោមជាតិសាសន៍ទាំងអស់! ²⁵ ដ្បិតព្រះ‌អម្ចាស់ជាព្រះដ៏ប្រសើរឧត្ដម ដែលយើងត្រូវតែសរសើរតម្កើងអស់ពីចិត្ត ព្រះអង្គគួរជាទីស្ញែងខ្លាចជាងព្រះផងទាំងពួង។ ²⁶ ព្រះទាំងប៉ុន្មានរបស់សាសន៍នានា សុទ្ធតែឥតបានការអ្វីទាំងអស់ រីឯព្រះ‌អម្ចាស់ ព្រះអង្គបានបង្កើតផ្ទៃមេឃ។ ²⁷ មានពន្លឺរស្មីចិញ្ចែង‌ចិញ្ចាចចាំងចេញពី ព្រះ‌ភ័ក្ត្ររបស់ព្រះអង្គ ព្រះ‌ដំណាក់របស់ព្រះអង្គពោរ‌ពេញទៅដោយ ឫទ្ធិ‌បារមី និងអំណរសប្បាយ។ ²⁸ ប្រជា‌ជាតិទាំង‌ឡាយអើយ ចូរនាំគ្នាលើកតម្កើងសិរី‌រុងរឿងព្រះ‌អម្ចាស់ ហើយថ្លែងអំពីឫទ្ធា‌នុភាពរបស់ព្រះអង្គ ²⁹ ចូរលើកតម្កើងសិរី‌រុងរឿងនៃព្រះ‌នាមរបស់ព្រះ‌អម្ចាស់! ចូរនាំគ្នាយកតង្វាយចូលមកចំពោះព្រះ‌ភ័ក្ត្រ របស់ព្រះអង្គ! ចូរនាំគ្នាក្រាបថ្វាយ‌បង្គំព្រះ‌អម្ចាស់ នៅពេលព្រះអង្គសម្តែងភាពវិសុទ្ធរបស់ព្រះអង្គ! ³⁰ មនុស្សនៅលើផែនដីទាំងមូលអើយ ចូរញាប់‌ញ័រនៅចំពោះព្រះ‌ភ័ក្ត្រព្រះអង្គចុះ! ពិភពលោករឹង‌មាំ ឥតរង្គើសោះឡើយ ³¹ ចូរឲ្យផ្ទៃមេឃមានអំណរសប្បាយ និងឲ្យផែនដីបានរីក‌រាយដ៏លើស‌លុប! ចូរប្រកាសនៅក្នុងចំណោមប្រជា‌ជាតិនានាថា ព្រះ‌អម្ចាស់គ្រងរាជ្យ! ³² ចូរឲ្យសមុទ្រ និងអ្វីៗនៅក្នុងសមុទ្រ បន្លឺសំឡេងយ៉ាងអឺង‌កង! ចូរឲ្យស្រែចម្ការ និងអ្វីៗនៅទីនោះ ត្រេកអរសប្បាយ! ³³ ចូរឲ្យព្រៃព្រឹក្សាទាំងប៉ុន្មានស្រែកហ៊ោ នៅចំពោះព្រះ‌ភ័ក្ត្រព្រះ‌អម្ចាស់! ដ្បិតព្រះអង្គយាងមកគ្រប់‌គ្រងផែនដី។ ³⁴ ចូរលើកតម្កើងព្រះ‌អម្ចាស់ ដ្បិតព្រះអង្គសប្បុរស ព្រះ‌ហឫទ័យមេត្តាករុណារបស់ព្រះអង្គ នៅស្ថិត‌ស្ថេររហូតតទៅ! ³⁵ ចូរទូលព្រះអង្គថា: ព្រះ‌សង្គ្រោះរបស់យើងខ្ញុំអើយ សូមជួយសង្គ្រោះយើងខ្ញុំផង សូមប្រមូលផ្ដុំយើងខ្ញុំ ហើយយកយើងខ្ញុំ ចេញពីចំណោមប្រជា‌ជាតិនានា ដើម្បីឲ្យយើងខ្ញុំលើកតម្កើង ព្រះ‌នាមដ៏វិសុទ្ធរបស់ព្រះអង្គ និងបានខ្ពស់មុខ ដោយសរសើរតម្កើងព្រះអង្គ! ³⁶ សូមលើកតម្កើងព្រះ‌អម្ចាស់ ជាព្រះរបស់ជន‌ជាតិអ៊ីស្រា‌អែល តាំងពីដើមរៀងមក ហើយអស់‌កល្បតរៀងទៅ!»។ ពេលនោះ ប្រជា‌ជនទាំងមូលឆ្លើយថា «អាម៉ែន សូមសរសើរតម្កើងព្រះ‌ជាម្ចាស់!»។

កម្មវិធី

ឥឡូវនេះ សូមឲ្យនរណាម្នាក់រៀបរាប់បទគម្ពីរនេះឡើងវិញដោយប្រើពាក្យពេចន៍របស់ខ្លួន ឲ្យហាក់បីដូចជាកំពុងប្រាប់មិត្តភក្តិម្នាក់ ដែលមិនធ្លាប់បានឮពីបទគម្ពីរនោះពីមុនមក។ សូមជួយពួកគេ ប្រសិនបើពួកមានការខ្វះចន្លោះ ឬលើសលស់ត្រង់ត្រង់ណា ដោយអចេតនា។ បើមានការខ្វះ ឬលើសលស់ យើងអាចសួរថា៖ «តើអ្នករកឃើញសេចក្ដីនោះត្រង់ណានៅក្នុងរឿង?»។

តើរឿងនេះបានបង្រៀនយើងដូចម្ដេចអំពីព្រះជាម្ចាស់ អត្តចរិតព្រះអង្គ និងអ្វីដែលព្រះអង្គបានធ្វើ?

តើយើងរៀនបានអ្វីខ្លះអំពីមនុស្ស រួមទាំងយើងផងនោះ ចេញពីសាច់រឿងនេះ?

តាមរយៈរឿងនេះ តើយើងរៀនបានអ្វីខ្លះអំពីការធ្វើជាក្រុមជំនុំ?

តើលោកអ្នកនឹងអនុវត្តសេចក្ដីពិតរបស់ព្រះជាម្ចាស់ចេញពីរឿងនេះនៅក្នុងជីវិតរបស់លោកអ្នកដោយរបៀបណានៅសប្ដាហ៍នេះ? តើលោកអ្នកនឹងធ្វើសកម្មភាព ឬកិច្ចការជាក់លាក់អ្វី?

តើលោកអ្នកនឹងចែកចាយពីសេចក្ដីពិតចេញពីរឿងនេះដល់នរណា មុនយើងជួបគ្នាម្ដងទៀត? តើលោកអ្នកស្គាល់មនុស្សដទៃទៀត ដែលចង់រុករកព្រះបន្ទូលរបស់ព្រះជាម្ចាស់តាមកម្មវិធីលើទូរសព្ទដូចយើងដែរឬទេ?

ការជួបជុំរបស់យើងដល់ទីបញ្ចប់ហើយ សូមសម្រេចថាយើងនឹងជួបគ្នាម្ដងទៀតនៅពេលណា ហើយនរណាជាអ្នកសម្របសម្រួលការជួបជុំលើកក្រោយរបស់យើង។

យើងលើកទឹកចិត្តលោកអ្នកឲ្យកត់ត្រាអ្វីដែលលោកអ្នកបាននិយាយថា លោកអ្នកនឹងធ្វើ ហើយសូមអានរឿងនេះឡើងវិញនៅប៉ុន្មានថ្ងៃនេះ មុនយើងជួបគ្នាម្ដងទៀត។ អ្នកសម្របសម្រួលអាចចែកអត្ថបទរឿង ឬរឿងជាសំឡេង ប្រសិនបើមានអ្នកណាម្នាក់ពុំមានវាទេ។ ពេលយើងបែកគ្នាទៅ ចូរទូលសូមព្រះអម្ចាស់ឲ្យជួយយើង។

ពួក​ជំនុំ​សរសើរ​តម្កើង​ព្រះ​ជា​ម្ចាស់

ការប្រកបគ្នា

១ របាក្សត្រ 16: 8-36

កម្មវិធី