Legliz se lekor Lekris

1 Anou rann gras Bondie pou tou seki li finn fer depi dernie fwa ki nou ti zwenn. Ki sante Morisien nou kapav sante pou lwe Zezi? Sinon, nou kapav zis fer enn lapriyer pou remersie li.

2 Ki finn stres zot sa semenn-la? Apre ki sak dimounn finn partaze, pa bliye priye pou zot ek soutenir zot.

3 Kouma nou kapav priye pou nou bann kominote ek servi zot, dan enn fason pratik?

4 Ki zistoir ti ena dernier fois nou ti zwenn? Ki nou inn appran lor Bondie ek dimounn?

5 Dan nou dernie renkont, ou ti desid aplik seki ou finn aprann. Ki ou fer, ek kouma sa passer?

6 Ar kisana to in partaz zistoir ki nou ti appran dernier fois? Kuma zot inn reazir?

7 Nou finn idantifie plizir nesesite dernie fois nou ti zwenn ek nou ti pe planifie pou satisfer sa ban nesesite-la. Kouma sa inn passer?

8 Asterla, annou lir zistoir Bondie kin donn nou zordi...

¹² Enn lekor, mem si ena plizir manm, li form enn sel linite. Lekris, li parey. ¹³ E nou tou, ki nou Zwif ou non-Zwif, esklav ou lib, nou tou finn batize pou form enn sel lekor par mem Lespri, e Bondie finn donn nou tou mem Lespri dan nou leker. ¹⁴ Ena boukou parti dan enn lekor. Li pa konpoze par enn sel parti. ¹⁵ Si lipie dir, “Parski mo pa enn lame, mo pa fer parti dan lekor,” pa pou otan ki li pa fer parti lekor la. ¹⁶ Si zorey dir, “Akoz mo pa enn lizie, mo pa fer parti lekor,” pa pou otan ki li pa fer parti lekor la. ¹⁷ Si lekor anantie ti zis lizie, kouma lekor la ti pou tande? Si lekor anantie ti zis enn zorey, kouma lekor la ti pou santi loder? ¹⁸ Anrealite, Bondie finn dispoz sak parti dan enn lekor dapre so volonte. ¹⁹ Pa ti pou ena lekor si tou ti enn sel parti. ²⁰ Ena boukou parti, me enn sel lekor. ²¹ Lizie pa kapav dir ar lame, “Mo pa bizin twa!” Latet pa kapav dir ar lipie, “Mo pa bizin twa!” ²² Okontrer, parti lekor ki paret pli feb, samem ki pli neseser; ²³ e parti ki nou panse ena mwins loner, samem nou donn plis lestim. Parti ki nou plis pa anvi koze, samem nou tret avek plis respe; ²⁴ me parti pli respektab pa bizin sa tretman la. Me Bondie finn dispoz nou lekor dan enn fason ki donn plis loner bann parti ki mank lestim, ²⁵ pouki pena divizion dan lekor, me ki sak parti pran swin lezot. ²⁶ Si enn parti soufer, tou lezot soufer ar li; si enn gagn loner, tou lezot partaz so lazwa. ²⁷ Zot tou fer parti lekor Lekris, e sakenn parmi zot enn manm sa lekor la. ²⁸ Bondie finn met tou anplas dan legliz. Premie, li finn met apot, deziem bann profet, trwaziem bann ki responsab pou ansegne, apre bann ki akonplir mirak, apre bann ki kapav geri malad, bann ki ed lezot, bann ki diriz travay legliz, e bann ki koz langaz ki ena parol etranz. ²⁹ Eski tou dimoun li enn apot? Eski tou dimoun profet? Eski tou donn lansegnman? Eski tou fer mirak? ³⁰ Eski tou ena don gerizon? Eski tou parl anlang? Eski tou donn enn interpretasion sa bann langaz la? ³¹ Alor, fixe zot leker lor seki pli inportan. Mo pou montre zot, asterla, ki sime ki pli bon lor tou.

1 Asterla, anou demann enn dimounn rakont sa pasaz-la dan so prop mo, koumadir li pe rakont li kikenn ki pa finn tann li zame. Anou ed li si li bliye kitsoz ouswa azout kitsoz par erer. Si sa arive, nou kapav demann li, "Kot to trouv sa dan zistwar-la?"

2 Ki sa zistwar-la aprann nou lor Bondie, so karakter ek seki li fer?

3 Ki nou finn aprann lor limanite ek lor nou mem dan sa zistwar-la?

4 Kouma sa zistwar-la aprann nou vinn legliz?

5 Kouma zot kapav aplik laverite parol Bondie dan zot lavi sa semenn-la? Ki zafer spesifik zot pou fer?

6 Avek kisana zot pou partaz la verite ki zot finn aprann dan sa zistwar-la avan nou re zwenn? Eski zot konn lezot dimounn ki ti pou kontan dekouver parol Bondie par sa aplikasion-la?

7 Alor ki nou renion pe al fini, anou deside kan nou pou rezwenn ankor ek kisann-la pou gid nou dan prosin renion.

8 Nou ankouraz zot pran not seki zot inn dir zot pou fer, ek re-lir sa zistwar-la avan nou re-zwenn. Si zot pena li, gid-la kapav partaz tex ouswa odio zistwar-la.Avan ki nwale, anou demann nou Senier ed nou.