Legliz donn sakrifis

1 Anou rann gras Bondie pou tou seki li finn fer depi dernie fwa ki nou ti zwenn. Ki sante Morisien nou kapav sante pou lwe Zezi? Sinon, nou kapav zis fer enn lapriyer pou remersie li.

2 Ki finn stres zot sa semenn-la? Apre ki sak dimounn finn partaze, pa bliye priye pou zot ek soutenir zot.

3 Kouma nou kapav priye pou nou bann kominote ek servi zot, dan enn fason pratik?

4 Ki zistoir ti ena dernier fois nou ti zwenn? Ki nou inn appran lor Bondie ek dimounn?

5 Dan nou dernie renkont, ou ti desid aplik seki ou finn aprann. Ki ou fer, ek kouma sa passer?

6 Ar kisana to in partaz zistoir ki nou ti appran dernier fois? Kuma zot inn reazir?

7 Nou finn idantifie plizir nesesite dernie fois nou ti zwenn ek nou ti pe planifie pou satisfer sa ban nesesite-la. Kouma sa inn passer?

8 Asterla, annou lir zistoir Bondie kin donn nou zordi...

³² Sa group krwayan la ti ena enn sel leker, enn sel lespri; personn pa ti dir ki so dibien pou li tousel sa, me zot ti met tou ansam ankominote. ³³ Bann apot ti rann temwagnaz lor rezireksion Zezi par enn gran pwisans, ek zot ti ranpli ar lagras Bondie. ³⁴ Personn parmi zot pa ti res dan lamizer. Tou seki ti propriyeter enn bout terin ou enn lakaz ti vann li, ti amenn larzan la ³⁵ e ti remet li bann apot, ki ti distribie resours la selon bezwin sakenn. ³⁶ Zozef ti enn Levit ki ti ne an Sip, bann apot ti donn li enn nom gate Barnabas, ki vedir ‘Garson ki ankouraz lezot.’ ³⁷ Zozef ti vann so karo e li ti remet tou larzan la bann apot.

¹ Bann frer e bann ser, nou anvi ki zot kone kouma lagras Bondie finn manifeste dan bann legliz Masedwann. ² Zot finn pas par bann eprev bien sever, me zot lazwa telman gran ki, mem dan zot lavi pov, zot finn montre enn gran zenerozite. ³ Mo kapav rasir zot ki bannla finn donn otan ki zot kapav, e mem plis ki zot kapav. ⁴ Bannla finn insiste pou gagn privilez servi lepep Bondie. ⁵ Li ti plis ki nou ti espere. Dabor bannla finn donn zotmem Lesegner, apre par volonte Bondie zot finn donn nou zotmem. ⁶ Alor nou finn sipliy Tit ki ti koumans sa travay la parmi zot, ki li kontign ed zot terminn zot aksion zenere. ⁷ Zot ena plin lafwa, don laparol, konesans, enn zel ki pena limit ek lamour ki nou finn donn zot; alor, nou atann ki zot montre enn gran zenerozite pou lokazion prezan. ⁸ Mo pa pe donn okenn lord la. Si mo pe donn lexanp lezot, mo pe zis donn zot lokazion prouve ki zot lamour li vre. ⁹ Zot konn lagras Zezi Kris, mem si li ti ris, li finn fer li pov pou zot, pouki par so povrete zot kapav vinn ris. ¹⁰ Mo donn zot mo lopinion lor sa zafer la: li meyer ki zot terminn seki zot finn koumanse lane dernier. Zot pa ti selma premie pou azir, me zot ti premie pou dezir fer sa aksion la. ¹¹ Asterla, fini travay la. Montre volonte pou terminn li, parey kouma zot ti ena pou koumans li. Fer li avek mwayin ki zot ena. ¹² Si zot ena bonn volonte, Bondie aksepte don ki zot done dapre seki zot ena, pa dapre seki zot pena. ¹³ Mo pa pe rod met zot dan difikilte pouki lezot soulaze, me pou etablir egalite. ¹⁴ Asterla zot dan labondans e zot kapav ed bann ki pena; enn lot kou, bann ki dan labondans pou ed zot kan zot pena. Koumsamem pou ena egalite. ¹⁵ Kouma Lekritir dir, “Seki finn ramas boukou, pa finn ena tro boukou, e seki finn ramas tigit, pa finn ena tro tigit.”

1 Asterla, anou demann enn dimounn rakont sa pasaz-la dan so prop mo, koumadir li pe rakont li kikenn ki pa finn tann li zame. Anou ed li si li bliye kitsoz ouswa azout kitsoz par erer. Si sa arive, nou kapav demann li, "Kot to trouv sa dan zistwar-la?"

2 Ki sa zistwar-la aprann nou lor Bondie, so karakter ek seki li fer?

3 Ki nou finn aprann lor limanite ek lor nou mem dan sa zistwar-la?

4 Kouma sa zistwar-la aprann nou vinn legliz?

5 Kouma zot kapav aplik laverite parol Bondie dan zot lavi sa semenn-la? Ki zafer spesifik zot pou fer?

6 Avek kisana zot pou partaz la verite ki zot finn aprann dan sa zistwar-la avan nou re zwenn? Eski zot konn lezot dimounn ki ti pou kontan dekouver parol Bondie par sa aplikasion-la?

7 Alor ki nou renion pe al fini, anou deside kan nou pou rezwenn ankor ek kisann-la pou gid nou dan prosin renion.

8 Nou ankouraz zot pran not seki zot inn dir zot pou fer, ek re-lir sa zistwar-la avan nou re-zwenn. Si zot pena li, gid-la kapav partaz tex ouswa odio zistwar-la.Avan ki nwale, anou demann nou Senier ed nou.