Legliz fer fas pese

1 Anou rann gras Bondie pou tou seki li finn fer depi dernie fwa ki nou ti zwenn. Ki sante Morisien nou kapav sante pou lwe Zezi? Sinon, nou kapav zis fer enn lapriyer pou remersie li.

2 Ki finn stres zot sa semenn-la? Apre ki sak dimounn finn partaze, pa bliye priye pou zot ek soutenir zot.

3 Kouma nou kapav priye pou nou bann kominote ek servi zot, dan enn fason pratik?

4 Ki zistoir ti ena dernier fois nou ti zwenn? Ki nou inn appran lor Bondie ek dimounn?

5 Dan nou dernie renkont, ou ti desid aplik seki ou finn aprann. Ki ou fer, ek kouma sa passer?

6 Ar kisana to in partaz zistoir ki nou ti appran dernier fois? Kuma zot inn reazir?

7 Nou finn idantifie plizir nesesite dernie fois nou ti zwenn ek nou ti pe planifie pou satisfer sa ban nesesite-la. Kouma sa inn passer?

8 Asterla, annou lir zistoir Bondie kin donn nou zordi...

¹⁵ Si to frer krwayan ofans twa, al get li e montre li so fot kan zis zot de tousel. Si li ekoute, to pou finn regagn li kouma to frer. ¹⁶ Me si li pa ekout twa, pran enn ou de lezot dimoun avek twa kouma temwin. ¹⁷ Si li refiz ekout zot, dir tou ar legliz; e si li refiz ekout legliz, konsider li kouma enn payin oubien enn komi tax.

¹ Ena enn koze ki pe deroule lor imoralite sexiel parmi zot, e li enn kalite ki mem kot bann payin pa trouve sa. Ena enn zom ki finn pran fam so papa. ² E zot arogan lor la! Okontrer zot ti bizin dan tristes. Dimoun ki finn azir koumsa, ti bizin finn fini met li deor depi zot group. ³ Mem si fizikman mo pa prezan, mo avek zot dan lespri. Mo finn fini donn mo zizman lor dimoun ki finn fer sa la, komsi mo prezan. ⁴ Kan zot vinn ansam lor nom Lesegner Zezi e ki mo avek zot dan lespri, e pwisans nou Segner Zezi prezan, ⁵ pran sa zom la e met li dan lame Satan pouki so natir pese konn destriksion, me ki so lespri sove zour ki Lesegner pou fer zizman. ⁶ Li pa korek ki zot fier. Zot bien kone ki enn tigit levin fer lapat antie gonfle. ⁷ Zot bizin retir vie levin pouki zot vinn enn nouvo lapat ki san levin, parski samem ki zot ete; parski Lekris, nou annyo paskal, finn fini sakrifie. ⁸ Anou selebre nou fet, pa avek vie levin pese ek imoralite, me avek dipin ki san levin, dipin sinserite ek verite. ⁹ Dan let ki mo ti ekrir avan, mo ti dir zot ki fode pa ki zot asosie zotmem ar dimoun ki viv dan imoralite. ¹⁰ Mo pa ekrir sa lor bann dimoun dan lemonn ki imoral, gourman, voler ou adorater idol. Dan sa ka la zot ti pou bizin kit lemonn sorti ale. ¹¹ Mo ti pe rod dir zot pa asosie zot ar kikenn ki dir li enn krwayan, me ki pe viv enn lavi debos, li enn rapas, li ador bann idol, li insilte ek abiz so prosin, li enn soular ou enn voler. Fode pa manz ansam ar enn dimoun koumsa. ¹² Eski li mo travay ziz seki andeor legliz? Pa bann seki dan legliz ki zot sipoze zize? ¹³ Bondie pou ziz bann ki andeor. Lekritir dir, “Met deor seki move parmi zot.”

1 Asterla, anou demann enn dimounn rakont sa pasaz-la dan so prop mo, koumadir li pe rakont li kikenn ki pa finn tann li zame. Anou ed li si li bliye kitsoz ouswa azout kitsoz par erer. Si sa arive, nou kapav demann li, "Kot to trouv sa dan zistwar-la?"

2 Ki sa zistwar-la aprann nou lor Bondie, so karakter ek seki li fer?

3 Ki nou finn aprann lor limanite ek lor nou mem dan sa zistwar-la?

4 Kouma sa zistwar-la aprann nou vinn legliz?

5 Kouma zot kapav aplik laverite parol Bondie dan zot lavi sa semenn-la? Ki zafer spesifik zot pou fer?

6 Avek kisana zot pou partaz la verite ki zot finn aprann dan sa zistwar-la avan nou re zwenn? Eski zot konn lezot dimounn ki ti pou kontan dekouver parol Bondie par sa aplikasion-la?

7 Alor ki nou renion pe al fini, anou deside kan nou pou rezwenn ankor ek kisann-la pou gid nou dan prosin renion.

8 Nou ankouraz zot pran not seki zot inn dir zot pou fer, ek re-lir sa zistwar-la avan nou re-zwenn. Si zot pena li, gid-la kapav partaz tex ouswa odio zistwar-la.Avan ki nwale, anou demann nou Senier ed nou.