Bann responsab swiv lasazes Bondie

1 Anou rann gras Bondie pou tou seki li finn fer depi dernie fwa ki nou ti zwenn. Ki sante Morisien nou kapav sante pou lwe Zezi? Sinon, nou kapav zis fer enn lapriyer pou remersie li.

2 Ki finn stres zot sa semenn-la? Apre ki sak dimounn finn partaze, pa bliye priye pou zot ek soutenir zot.

3 Kouma nou kapav priye pou nou bann kominote ek servi zot, dan enn fason pratik?

4 Ki zistoir ti ena dernier fois nou ti zwenn? Ki nou inn appran lor Bondie ek dimounn?

5 Dan nou dernie renkont, ou ti desid aplik seki ou finn aprann. Ki ou fer, ek kouma sa passer?

6 Ar kisana to in partaz zistoir ki nou ti appran dernier fois? Kuma zot inn reazir?

7 Nou finn idantifie plizir nesesite dernie fois nou ti zwenn ek nou ti pe planifie pou satisfer sa ban nesesite-la. Kouma sa inn passer?

8 Asterla, annou lir zistoir Bondie kin donn nou zordi...

¹⁸ Parski mesaz lor lamor Lekris lor lakrwa li enn foli pou seki dan perdision, me pou nou ki Bondie pe sove, sa parol la samem pwisans Bondie. ¹⁹ Parski finn ekrir, “Lasazes bann dimoun saz, mo pou detrir, konesans bann koneser, mo pou rezete.” ²⁰ Kot dimoun saz ete? Kot dokter lalwa ete? Bann ki fer gran-gran diskour zordi, kot zot? Eski Bondie pa finn rann bet lasazes sa lemonn la? ²¹ Bann imin avek tou zot sazes pa finn kapav rekonet Bondie, la kot li finn manifeste so sazes. Akoz sa ki Bondie finn desid pou sov seki krwar par so mesaz swadizan fou. ²² Bann Zwif demann sign, bann Grek rod sazes, ²³ me nou, nou proklam Lekris krisifie. Sa li enn mesaz ki kre skandal parmi bann Zwif, ek li enn foli pou bann Grek. ²⁴ Me pou bann dimoun ki Bondie finn apele, Lekris limem ki montre sazes Bondie ek pwisans Bondie. ²⁵ Foli Bondie pli saz ki sazes bann zom, ek febles Bondie pli for ki lafors bann zom. ²⁶ Frer ek ser, pa bliye kisannla zot ti ete, zot ki finn gagn lapel Bondie. Dapre zizman zom, pena boukou saz parmi zot, ni boukou pwisan, pena parmi zot boukou ki sorti dan gran fami inportan. ²⁷ Me pou fer bann saz onte Bondie finn swazir kiksoz ki dapre lizie dimoun pena valer. Li finn swazir saki feb dan lemonn pou fer bann pwisan onte. ²⁸ Bondie finn swazir seki pli piti, seki meprize, seki mem pa existe, pou fer seki existe vinn nanye ditou, ²⁹ pouki personn pa fer fezer devan Bondie. ³⁰ Limem lasours zot lavi dan Zezi Kris, ki finn vinn pou nou sazes ki sorti kot Bondie. Lekris rann nou drwat, li met nou apar pou Bondie, limem nou delivrans. ³¹ Alors, parey kouma finn ekrir, “Si kikenn anvi vremem fer vantar, ki li montre laglwar Bondie.”

1 Asterla, anou demann enn dimounn rakont sa pasaz-la dan so prop mo, koumadir li pe rakont li kikenn ki pa finn tann li zame. Anou ed li si li bliye kitsoz ouswa azout kitsoz par erer. Si sa arive, nou kapav demann li, "Kot to trouv sa dan zistwar-la?"

2 Ki sa zistwar-la aprann nou lor Bondie, so karakter ek seki li fer?

3 Ki nou finn aprann lor limanite ek lor nou mem dan sa zistwar-la?

4 ⁠Kouma sa zistwar-la aprann nou vinn enn responsab?

5 Kouma zot kapav aplik laverite parol Bondie dan zot lavi sa semenn-la? Ki zafer spesifik zot pou fer?

6 Avek kisana zot pou partaz la verite ki zot finn aprann dan sa zistwar-la avan nou re zwenn? Eski zot konn lezot dimounn ki ti pou kontan dekouver parol Bondie par sa aplikasion-la?

7 Alor ki nou renion pe al fini, anou deside kan nou pou rezwenn ankor ek kisann-la pou gid nou dan prosin renion.

8 Nou ankouraz zot pran not seki zot inn dir zot pou fer, ek re-lir sa zistwar-la avan nou re-zwenn. Si zot pena li, gid-la kapav partaz tex ouswa odio zistwar-la.Avan ki nwale, anou demann nou Senier ed nou.