10 مَارَّا يسْرَائِيلِيّـنأَ إِي د ئِخڒْقن ݣِي ڒْوقْث نِّي مُّوْثن نْجمْعَان غَار ڒجْذُوذ نْسن۔ دُّرِّيث نْسن وَر سِّينن شَا سِيذِي أَربِّـي ذ ڒخْذَايم نِّي إِݣ يݣَّا إِ أَيث-إِسْرَائِيل۔ 11 ئِكَّر شَّعْب ن أَيث-إِسْرَائِيل يݣَّا شَّرّْ زَّاث ن ثِيطَّاوِين ن سِيذِي أَربِّـي عبّْذن لْأَصْنَامَاث نِّي ؤُمِي قَّارن ئِبَاعْلَاثن ۔ 12 سمّْحن ذِي سِيذِي أَربِّـي نتَّا ذ بَابَاس ن ڒجْذُوذ نْسن ذ نتَّا إِيثن د ئِسُّوفْغن زِي ثْمُوْرْث ن مِصْرَا ۔ ذفَّارن لْأَلِهَاث نّغْنِي ن ڒݣْـنُوْس إِي ذَاسن د ئِتنّْضن تْسجَّاذناَسن غَار ثْمُوْرْث سْعصَّابن أَربِّـي۔ 13 سمّْحن ذِي سِيذِي أَربِّـي عبّْذن لْأَصْنَامَاث نِّي ؤُمِي قَّارن ئِبَاعْلَاثن د ثِيعَشْتُورِين ۔ 14 يرْغَا سِيذِي أَربِّـي س وْعَصّب ضدّْ ن أَيث-إِسْرَائِيل يجِّي-ثن ذݣ يفَاسّن ن يشفَّارن حمَا اَثنحوّْسن۔ ئِزّنْزيثن غَار يفَاسّن ن ڒْعَاذْيَان نْسن إِي ذَاسن د ئِتنّْضن وَر زمَّرن شَا اَذ بدّن زَّاث ن يعْذَاون ۔ 15 مڒْمِيمَا فّْغند ڒْعَسْكَار نْسن ئِتِيڒِي وْفُوْس ن سِيذِي أَربِّـي ضدّْ نْسن حمَا اَثنضَرّن ۔ أَمّن إِي ذَاسن يعْڒم سِيذِي أَربِّـي أَمّن إِي ذَاسن ئِجُّودْجْ ۔ تُوْغَاثن ذݣ يِجّن ن تَمَارَا ذ تَمقّْرَانْت۔
16 ئِكَّر سِيذِي أَربِّـي يُوْشَا-ٱسن ڒْقُوْضَاث بَاش اَثنسْنجْمن زݣ يفَاسّن ن يِنِّي إِي ثن ئِتْحوَّاسن۔ 17 نِثْنِي وَرتْصنِّيطن شَا إِڒْقُوْضَاثأَ نْسن رُوْحن سْفسَّاذن ئِخف نْسن اَك لْأَلِهَاث نّغْنِي تْسجَّاذناَسن غَار ثْمُوْرْث ۔ ذغْيَا فّْغن اَبْرِيذ نِّي ذِي تُوغَا ذفَّارن ڒجْذُوذ نْسن إيني تݣّن اَرَّاي إِ ڒُوْصِيَاث ن سِيذِي أَربِّـي۔ يِـيْنَا لَّا، ؤُݣِين اَذَاسنْت ݣّن اَرَّاي۔ 18 مڒْمِيمَا ذَاسن ئِسّكّْ سِيذِي أَربِّـي ڒْقُوضَاث نِّي ئِتِيڒِي اَك ڒْقَاضِي نِّي ئِسنْجَاميثن سِيذِي أَربِّـي زݣ يفَاسّن ن ڒْعَاذْيَان نْسن ذِي مَارَّا ڒْحُكّم ن ڒْقَاضِي نِّي۔ مِينْزِي يْقّس-اَس ڒْحَاڒ إِسِيذِي أَربِّـي خ صّوْت ن ينهَّاكن نْسن ذ يِنِّي إِي ثن ئِتْعدَّابن ذ يِنِّي إِي ثن ئِضدْجْمن۔ 19 وَلَكِن وَامِي يْمُّوث ڒْقَاضِي نِّي، نِثْنِي اَذ عقْبن غَار ذفَّار اَذ سْفسّْذن ئِخف نْسن كْتَار زِي مِين تُوغَا ݣِّين ڒجْذُوذ نْسن ۔ رزُّون خ لْأَلِهَاث نّغْنِي عبّْذنثن تْسجَّاذناَسن، ؤُݣِين اَذ سمْحن ذِي ڒفْعَايڒ نْسن ذ يبْرِيذن ن ثْغنَّانْت۔ 20 خ مَانَايَا يرْغَا سِيذِي أَربِّـي س وْعَصّب ضدّْ ن أَيث-إِسْرَائِيل ينَّا: "ئِوْذَان-أَ وَامِي عصَّان ڒْعَهذ ئِنُو إِيْـزِي ثن وصِّيغ نش إِڒجْذُوذ نْسن وَرتْصنِّيطن شَا إِوَاوَاڒ ئِنُو، 21 أَتَاف وَر سُّوفُوغغ ؤُڒَا ذ يجّن ن ڒْݣـنْس زݣ يِنِّي إِݣ يجَّا يَشُوع وَامِي يْمُّوث ۔
22 أَمُّو س ڒݣْـنُوس-أَ إِي غَا جَرّْبغ أَيث-إِسْرَائِيل مَا اَذ ݣّن اَرَّاي إِ وْبْرِيذ ن سِيذْ أَربِّـي مَامّش ݣِّين ڒجْذُوذ نْسن نِغ لَّا۔" 23 خ مَانَايَا سِيذِي أَربِّـي يجَّا ڒݣْـنُوس نِّي، وَرثن د يسُّوفغ شَا ذغْيَا وَر ثن يجِّي شَا ذݣ وْفُوس ن يَشُوع۔
© 2020 Awal n Arebbi ℗ 2008 Hosanna