¹ ذِي ڒِيَّام نِّي اَزدْجِيذ قَيْصَر أَݣُسْطُس يُوْشَا لْأَمَار اَذ حسْبن مَارَّا يمزْذَاغ ن ثْمُوْرَا إِي ذِي يحْكم. ² أَحْسَاب-أَ اَمزْوَارُو يوْقع وَامِي يحْكم كُرِينُوْس ذِي ثْمُوْرْث ن سُوْرْيَا. ³ رُوْحن مَارَّا يوْذَان حمَا اَذ سجّْلن، كُڒ يجّن يرُوْح غَار وبِيلَاج نّس.
⁴ ئِݣَعّذ يُوْسف زِي ثْمُوْرْث ن لْجَلِيل زݣ وبِيلَاج ن نَاصِرَا يرُوْح غَار ثْمُوْرْث ن يَهُوْذِيَا غَار وبِيلَاج ن دَاود ونِّي ؤُمِي قَّارن بَيْت لَحْم مِينْزِي نتَّا زِي دُّوْرِّيث ن دَاود ذ ڒحْبَاب نّس. ⁵ ئِݣَعّذ ذِنِّي اَذ يسجّل نتَّا ذ مَرْيَم ثنِّي إِي كذ يݣَّا زُّوْجِيَا، نتَّاث اَقَات س وعدِّيس. ⁶ وَامِي ؤُوْضن ذِنِّي، ثُوْوض-د ڒْوقْث نّس حمَا اَذ تَارو. ⁷ ثُوْرو مِّيس اَمنْزُو ثْصحْنُوْنّض-يث ثݣِّي-ث ذِي ڒْمذْوذ مِينْزِي وَار ؤُفِين بُو ومْشَان ذِي ثدَّارْث ن يمْسَافَرن.
⁸ تُوْغَا ذِنِّي اَڒ جِّهث نِّي يمكْسَاون حطَّان ثِيحِيمرِيوِين نْسن س دْجِيڒث. ⁹ ثُوْسَا-د يجّن ن لْمَلَائِكَا ن سِيذ أَربِّـي ثبدّ-د غَارْسن، ئِتْشعْشِيع نُّوْر ن لْعَظَمَا ن سِيذ أَربِّـي ينّض-د خَاسن ݣّْوْذن اَطَّاس. ¹⁰ ثنَّا-ٱسن لْمَلَائِكَا نِّي: "وَار تݣّْوْذم شَا. أَقَا نش تْبشَّارغ-كنِّيو س يِجّن ن ڒخْبَار يمْغَر اَطَّاس اَزَّايس يفَرح مَارَّا شَّعْب. ¹¹ ئِخْڒق-د نْهَارَا ذݣ وبِيلَاج ن دَاود ونِّي إِي كنِّيو غَا يسْنجْمن، نتَّا ذ سِيذِيثْنغ لْمَسِيح. ¹² كنِّيو اَذ تَافم يجّن ن لْعَلَامَا اَذ تَافم يجّن ن وسيْمِي يحْنُوْنّض يطّس ذِي ڒْمذْوذ." ¹³ عْلَاغَفْلَا مظْهَارن-د اَك لْمَلَائِكَا نِّي اَطَّاس ن يمزْذَاغ ن وجنَّا حمّْذن أَربِّـي قَّارن:
¹⁴ "لْعَظَمَا إِ أَربِّـي يُوْعْڒَان،
ذ ڒهْنَا ن يِنِّي ذِي ثْمُوْرْث مِيخف يرْضَا."
¹⁵ وَامِي رُوْحنْت لْمَلَائِكَاث نِّي عقْبنْت غَار وجنَّا، سِّيوْڒن يمكْسَاون نِّي جَارَاسن نَّان: "يَالَّاهت أَ نْرَاحث غَار بَيْت لَحْم أَ نْࢲر مَانَايَا إِݣ يوقْعن مِين خَانغ يسِّيوڒ سِيذِي أَربِّـي."
¹⁶ رُوْحن ذغْيَا ؤُفِين مَرْيَم ذ يُوْسف ذ وسيْمِي نِّي يطّس ذِي ڒْمذْوذ. ¹⁷ وَامِي ث ؤُفِين ذِنِّي، كَّرن خْبَرن يوْذَان مِين ذَاسن ثنَّا لْمَلَائِكَا نِّي خ وحنْجِير-أَ. ¹⁸ مَارَّا ونِّي يتْسْڒَان يتْعجّب ذݣ وَاوَاڒ نِّي إِي ذَاسن نَّان يمكْسَاون. ¹⁹ أَمَّا مَرْيَم، ثْخمّڒ مَارَّا ثِمسْڒَايِين-أَ ذݣ وُوْڒ نّس تْخمَّام ذَايْسنْت. ²⁰ سّنِّي عقْبن يمكْسَاون نِّي سمْغَارن أَربِّـي حمّْذن-ث خ مَارَّا مِين سْڒِين ذ مِين ࢲْرِين، ؤُفِين ثِمسْڒَايِين نِّي وقْعنْت نِيشَان اَمشْنَاو مَامْش ذَاسن ثنَّا لْمَلَائِكَا نِّي.
© 2020 Awal n Arebbi ℗ 2008 Hosanna