¹ ئِذْوڒ-د عِيْسَى زݣ يِغْزَار ن لْأُرْدُن يشُّوْر س أَرُّوْح يقدّْسن، ڒخْدّنِّي يُوْوِي-ث أَرُّوْح نِّي غَار ڒخْڒَا. ² ئِكَّا ذِنِّي اَرْبعِين يُوْم يتْجرَّاب-يث إِبْڒِيس. ذݣ وُوْسَّان نِّي وَار يشِّي وَالُو. وَامِي كمّْڒن وُوْسَّان نِّي يدْجُوْز.
³ ئِكَّر إِبْڒِيس ينَّا-ٱس إِ عِيْسَى: "شك مڒَا ذ مِّيس ن أَربِّـي، إِنِي-يَاسن إِ يِزْرَا-يَا اَذ ذوْڒن ذ اَغْرُوْم."
⁴ يَارَّا خَاس عِيْسَى ينَّا-ٱس: "لَّا، لْكِتَاب يقَّار: <بْنَاذم وَار يتْعِيش شَا س وغْرُوْم وَاهَا.>"
⁵ ئِكَّر إِبْڒِيس يُوْوِي عِيْسَى غَار يِجّن ن ومْشَان يُوْعْڒَا، ئِسْمظْهَار-اَس-د مَارَّا لْممْلَاكَاث ن دُّنشْت-أَ ذݣ يِجّن ن دْقِيقث. ⁶ ينَّا-ٱس إِبْڒِيس: "أَذَاش ؤُشغ مَارَّا جّْهذ-أَ ذ لْعَظَمَا-يَا نْسنْت ڒَاحقَّاش نش ثمُّوْش-اَيِي، أَت ؤُشغ إِ وُوْمِي مَا خْسغ. ⁷ مڒَا ثْسجّْذذ-اَيِي، أَذ يِيڒِي قَاع مَانَايَا إِ شك."
⁸ ينَّا-ٱس عِيْسَى: "لَّا، لْكِتَاب يقَّار: <سجّذ إِ سِيذِي أَربِّـي نّش، عْبذ-يث نتَّا وَاحْذس.>"
⁹ ئِكَّر إِبْڒِيس يُوْوِي عِيْسَى غَار ثنْدِينْت ن لْقُدْس، ئِسِيڒِي-ث خ ثْقِيشَّات ن ثمْزِيذَا ثَمقّْرَانْت ينَّا-ٱس: "شك مڒَا ذ مِّيس ن أَربِّـي، نْݣز سَّانِيتَا غَار ثْمُوْرْث ¹⁰ أَقَا لْكِتَاب يقَّار: <قَا أَربِّـي اَذ يوصَّا بَاش اَش حْضَانْت لْمَلَائِكَاث نّس.> ¹¹ عَاوذ يقَّار: <أَش يْسِينْت خ يفَاسّن نْسنْت بَاش وَار ثرْقِيفذ ؤُڒَا ذ يج وزْرُو س وضَار نّش.>"
¹² ئِنْدق-د عِيْسَى ينَّا-ٱس: "لَّا، لْكِتَاب يقَّار: <وَار تْجَرَّاب شَا سِيذِي أَربِّـي نّش.>" ¹³ إِبْڒِيس وَامِي يكمّڒ اَكِذس مَارَّا اَجرَّاب نِّي، ئِكَّر يبعّذ خَاس اَڒ يِجّن ن ثْوَاڒَا نّغْنِي.
¹⁴ ئِذْوڒ عِيْسَى غَار ثْمُوْرْث ن لْجَلِيل س جّْهذ ن أَرُّوْح يقدّْسن، ئِتنْتَاشَر ڒخْبَار نّس مَارَّا ذِي جْوَايه نِّي. ¹⁵ ئِسڒْمَاذ ذِي ثمْزِيذَاوِين نْسن سمْغَارن-ث مَارَّا يوْذَان.
¹⁶ يُوْسَا-د غَار وبِيلَاج ن نَاصِرَا مَانِي يربَّا. نْهَار ن سّبْث ن لْعِبَادَا يرُوْح غَار ثمْزِيذَا اَم ڒبْدَا، ئِكَّر حمَا اَذ يغَر. ¹⁷ ؤُشِين-اَس لْكِتَاب نِّي ن نَّبِي إِشَعْيَا، يرْزم-يث يُوْفَا اَمْشَان إِي ذِي يُوْرَا وَاوَڒ-أَ:
¹⁸ <أَقَا أَرُّوْح ن سِيذِي أَربِّـي اَقَاث خَافِي،
ئِخْضَر-اَيِي حمَا اَذ بشَّرغ ڒْمُسَاكِين.
ئِسّكّ-اَيِي-د اَذ خْبَرغ لْحُرِّيَا إِ يمحْبَاس،
يِنِّي يتْوَاضَرْغْڒن اَثن اَرّغ تْوَاڒَان،
يِنِّي يتْوَاضڒْمن اَذَاسن د رْخُوْغ.
¹⁹ أَذ خْبَرغ خ وسݣّْوَاس ن اَرْضَا ن سِيذِي أَربِّـي.>
²⁰ ئِبلّع لْكِتَاب نِّي، يَارَّا-ٱس-ث إِ وخدَّام يقِّيم. مَارَّا يِنِّي يدْجَان ذِي ثمْزِيذَا قِّيمن تخزَّارن ذَايس. ²¹ ئِبْذَا يقَّار-اَسن: "نْهَارَا قَا يفّغ-د وَاوَاڒ ن لْكِتَاب-أَ إِي ؤُمِي ثسْڒِيم."
²² مَارَّا سَّاوَاڒن خَاس مْلِيح، تْعجّْبن ذݣ وَاوَاڒن يصبْحَانن إِي د يفّْغن زݣ وقمُّوْم نّس. نَّان خَاس: مَا وَار يدْجِي شَا وَانِيتَا ذ مِّيس ن يُوْسف؟
© 2020 Awal n Arebbi ℗ 2008 Hosanna