³⁵ نْهَار نِّي وَامِي د ثُوْوض ثْمدِّيث، ينَّا-ٱسن عِيْسَى إِ يمحْضَارن نّس: "يَالّه أَ نࢲْوَام غَار وجمَّاض-ين." ³⁶ وَامِي سمْحن ذِي ڒْغَاشِي، ئِرُوْح عِيْسَى اَكِذْسن ذِي ثْغَرَّابُوْت نِّي إِي ذِي يدْجَا عَاذ. اَكِذس ذِنِّي ثِغَرُّوْبَا نّغْنِي. ³⁷ ئِكَّر-د يجّن ن اَرِّيح يجْهذ اَطَّاس ذِي ڒبْحَر، ڒمْوَاج شَّاثنْت ثَغَرَّابُوْت نِّي اَڒ وَامِي ثبْذَا تْعمَّر س وَامَان. ³⁸ ن تَّا يدْجَا غَار پُـوْپَّـا ن ثْغَرَّابُوْت يطّص يسُوْمّث يجّن ن ثْسُوْنْتَا. سْفَاقن-ث يمحْضَارن نَّان-اَس: "آ لْمُعَلِّم مَا وَار ش يتْهِيمِي شَا مَانَايَا؟ أَقَا نشِّين نتْمتَّا!" ³⁹ ئِكَّر يسْبدّ اَرِّيح ينَّا-ٱس إِ ڒبْحَر: "سْقَار، قْضع ڒْحِسّ!" أُوْشَا يبدّ اَرِّيح يرْسَا ڒْحَاڒ. ⁴⁰ ينَّا-ٱسن: "مَايمِّي تݣّْوْذم قَاع اَمُّو؟ مَا عَاذ وَار ذَايْوم بُو لْإِيمَان؟" ⁴¹ ݣّْوْذن اَطَّاس نَّان إِ وَايَاوْيَا: "مِين يعْنَا وَانِيتَان؟ ؤُڒَا ذ اَرِّيح ذ ڒبْحَر تْطَاعَان-اَس!"
¹ ئِࢲْوَا عِيْسَى غَار وجمَّاض-ين ن ڒبْحَر غَار ثْمُوْرْث ن يجَرِيثِيْين. ² وَامِي يضْرَا زِي ثْغَرَّابُوْت يڒْقَا يجّن ن ورْيَاز ذَايس جّنّ ذ اَعفَّان يُوْسَا-د زݣ يمضْڒَان. ³ يزدّغ ذِنِّي ذݣ يمضْڒَان. وَار يزمَّر ؤُڒَا ذ يجّن اَث يقّن وَاخَّا س سْنَاسڒ. ⁴ أَطَّاس ن تْوَاڒَاثِين شرّْفن-ث زݣ يفَاسّن ذ يضَارن س سْنَاسڒ ذ لقْتِينَا وَلَكِن يقطّو سْنَاسڒ يتْرزَّا لقْتِينَا. وَار يزمَّر ؤُڒَا ذ يجّن اَث يطّف. ⁵ ئِتِيڒِي دْجِيڒث ذ نْهَار ذݣ يمضْڒَان ذ يذُوْرَار يسْنكَّر ثْغُوْيّث يجَرّح يخف نّس س وزْرُو. ⁶ وَامِي يࢲْرَا عِيْسَى زِي ڒݣّْوَاج، يُوْزّڒ غَارس يسجّذ-اَس. ⁷ ئِنْدق-د س يِجّن ن ثْمِيجَّا ثجْهذ ينَّا-ٱس: "آ عِيْسَى آ مِّيس ن أَربِّـي يُوْعْڒَان، مِين ثخْسذ زَّايِي؟ تتَّارغ زَّايك إِ أَربِّـي حمَا وَار ذَايِي تْعدِّيبذ شَا!" ⁸ ينَّا مَانَايَا مِينْزِي عِيْسَى تُوْغَا ينَّا-ٱس: "آ جّنّ أَعفَّان فّغ زݣ ورْيَاز-أَ!"
⁹ ئِسقْسَا-ث عِيْسَى ينَّا-ٱس: "مَامّش ذَاش قَّارن؟"
ينَّا-ٱس: "نش قَّارن-اَيِي أَبرُّو مِينْزِي نشِّين اَطَّاس إِذْنغ." ¹⁰ ئِحشّم-يث اَطَّاس حمَا وَار ثن يسّكِّي بَارَّا إِ جِّهث نِّي. ¹¹ ذِي ڒْوقْث نِّي ذِنِّي يجّن ن ثْحِيمرْث ذ ثَمقّْرَانْت ن يِيڒْفَان ثَرْوس خ وذْرَار. ¹² تَّارن زَّايس جْنُوْن نِّي نَّان-اَس: "سكّ-اَنغ غَار يِيڒْفَان-ين حمَا اَذَايْسن نَاذف." ¹³ وَامِي ثن يجَّا، فّْغن جْنُوْن نِّي يعفَّانن ؤُذْفن ذݣ يِيڒْفَان نِّي. ثُوْزّڒ ثْحِيمرْث نِّي ثهْوَا خ وذْرَار غَار ڒبْحَر ثغْرق ذِنِّي. تُوْغَا لْعَدَد نْسن عْڒَاين اَڒفَاين.
¹⁴ يِنِّي يَروّْسن اَروْڒن سُوْفْغن ڒخْبَار ذِي ثنْدِينْت ذ ڒدْشُوْرَاث. فّْغن-د يِوْذَان حمَا اَذ خْزَرن مِين يوقْعن. ¹⁵ ؤُسِين-د غَار عِيْسَى ؤُفِين اَرْيَاز نِّي إِي ذِي تُوْغَا يدْجَا اَبرُّو ن جْنُوْن يَرض اَرُّوض نّس يقِّيم يݣنْفَا س ڒَعْقڒ نّس. أُوْشَا ݣّْوْذن اَطَّاس. ¹⁶ خْبَرن-ثن ڒشْهُوْذ خ مِين يوقْعن إِ ورْيَاز نِّي إِي ذِي تُوْغَا دْجَان جْنُوْن ذ مِين ذَاسن يوقْعن إِ يِيڒْفَان. ¹⁷ أُوْشَا بْذَان تتَّارن زَّايس حمَا اَخَاسن يبعّذ زِي جِّهث نْسن.
¹⁸ وَامِي تُوْغَا ينَّاي ذِي ثْغَرَّابُوْت، ئِتَّار زَّايس ورْيَاز نِّي إِي ذِي تُوْغَا دْجَان جْنُوْن ينَّا-ٱس: "اجّ-اَيِي اَكِش رَاحغ." ¹⁹ وَلَكِن عِيْسَى يُوْݣِي، ينَّا-ٱس: "رُوْح غَار ثدَّارْث نّش ذ ڒحْبَاب نّش سْخبَّر-يثن س مِين ذَاش يݣَّا سِيذِي أَربِّـي ذ مَامّش شك يرْحم." ²⁰ ئِرُوْح ورْيَاز نِّي يبْذَا يتْخبَّار ذِي لْإِقْلِيم ؤُمِي قَّارن دِيكَاپْـلِس زِي مِين ذَاس يݣَّا عِيْسَى. قِّيمن يوْذَان نِّي مَارَّا ذهّْشن.
© 2020 Awal n Arebbi ℗ 2008 Hosanna