¹ مَارَّا يِنِّي يدْجَان ذ يعشَّارن ذ يِنِّي يعصَّان قَارّْبن-د غَار عِيْسَى حمَا اَذَاس صنّْطن. ² ڒْحِزب ن يفَرِّيسِيْين ذ يمْسڒْمَاذن ن شَّرِيعَا سَّاوَاڒن ذِي عِيْسَى نَّان: "أَرْيَاز-أَ يتْرحَّاب زݣ يِنِّي يعصَّان يتتّ اَكِذْسن!"
³ ئِنْدق-د عِيْسَى ينَّا-ٱسن ڒْمَعْنَا-يَا: ⁴ "ئِجّن زَّايْوم غَارس مِيَّا ن يحُوْڒِيْين مَثَالَان. مڒَا يودَّار-اَس يجّن زَّايْسن، أَتَاف اَذ يجّ تسْعَا أُو تسْعِين ذِي ڒخْرَا اَذ يرَاح اَذ يرْزُو خ ونِّي يودَّارن اَڒ ث غَا يَاف. أَمنِّي نِغ لَّا؟ ⁵ خمِّي ث غَا يَاف اَث يِيسِي خ ؤُغِيڒ نّس اَذ يفَرح. ⁶ أَذ يذْوڒ غَار ثدَّارْث نّس اَذ د يڒَاغَا خ يمدُّوْكَاڒ نّس ذ جِّيرَان نّس اَذَاسن يِينِي فَرْحم اَكِذِي اَقَا ؤُفِيغ اَحُوْڒِي نِّي إِي تُوْغَا ذَايِي يودَّارن! ⁷ أَذَاوم ينِيغ: أَذ فَرْحن ذݣ وجنَّا اَطَّاس خ يِجّن مڒَا يذْوڒ-د غَار وبْرِيذ كْتَار زِي مِن غَا فَرْحن خ تسْعَا أُو تسْعِين نِّي وَار فِّيغن شَا اَبْرِيذ.
⁸ نِغ، شَان ثمْغَارْث غَارس عشْرَا ن دِينَار مَثَالَان، ئِودَّار-اَس يجّن. أَتَاف اَذ تْشعّڒ ڒْقنْدِيڒ اَذ تْسكّ ذِي ثدَّارْث اَذ ترْزُو اَطَّاس خ دِينَار نِّي اَڒ ث غَا ثَاف. أَمنِّي نِغ لَّا؟ ⁹ خْمِي ث غَا ثَاف، أَذ تْڒَاغَا خ ثْمدُّوْكَاڒ ذ ثَاجَّارِين اَذَاسنْت ثِينِي: فَرْحنْت اَكِذِي اَقَا ؤُفِيغ دِينَار نِّي إِي تُوْغَا ذَايِي يودَّارن! ¹⁰ أَذَاوم ينِيغ: أَمنِّي يجّن مڒَا يعْصَا منْبَعْد يتُوْب، أَتَاف اَكِذس فَرْحنْت لْمَلَائِكَاث ن أَربِّـي."
¹¹ عِيْسَى ينَّا عَاوذ: "تُوْغَا يجّن ن ورْيَاز غَارس ثْنَاين ن يحنْجِيرن. ¹² ونِّي اَمزْيَان ينَّا-ٱس إِ بَابَاس: آ بَابَا ؤُش-اَيِي ڒْحَقّ ينُو ذِي ڒْوَارْث. صَافِي يكَّر ورْيَاز نِّي يفْرق اَݣْڒَا إِ ثَارْوَا نّس. ¹³ وَامِي عْذُوْن شْوَايت ن وُوْسَّان، أَحنْجِير نِّي اَمزْيَان ييْسِي مَارَّا مِين غَارس ذ اَݣْڒَا يرُوْح غَار يِجّن ن ثْمُوْرْث ثِݣّْوج يسْـپـرْذر ذِنِّي تْمنْيَاث نّس ذِي تفْلَايس. ¹⁴ وَامِي يضيّع مَارَّا اَݣْڒَا نّس، ئِوْقع ذِي ثْمُوْرْث نِّي يجّن ن بُوْهيُّوْف وَار يُوْفِي مِين غَا يشّ. ¹⁵ سّنِّي يبْذَا يخدّم غَار يجّن ن ورْيَاز زِي ثْمُوْرْث نِّي يسّكّ-يث اَذ يَرْوس يڒْفَان ذݣ يمَرْجعِيون نّس. ¹⁶ ذَايس يمزْڒَان اَذ يجَّاون س يقَاشّْون ن ثْسْڒِيغْوَا يِنِّي إِي تتّن يِڒْفَان نِّي، وَار ث يعْثِيق حَدّ. ¹⁷ ئِبْذَا ڒخْدّنِّي يتْخمَّام مْلِيح ذݣ يِيخف نّس ينَّا: مشْحَاڒ غَارس ذ يخدَّامن غَار بَابَا يتْشطَّا خَاسن وغْرُوْم، نش اَقَايِي ذَانِيتَا تْمتِّيغ س جُّوْع. ¹⁸ ينَّا: أَذ كَّرغ اَذ ذوْڒغ غَار بَابَا اَذَاس ينِيغ: آ بَابَا عْصِيغ سِيذِي أَربِّـي، عْصِيغ شك. ¹⁹ ڒخُّو وَار سْذِيهْدْجغ شَا اَذ يڒِيغ ذ مِّيش، اݣّ-اَيِي اَم وخدَّام نّش وَاهَا. ²⁰ ئِكَّر يرُوْح غَار بَابَاس. نتَّا اَقَاث عَاذ يݣّْوج اَطَّاس خ ثدَّارْث وَامِي ث يࢲْرَا بَابَاس يقّس-اَس. ئِرُوْح غَارس يتَازّڒ يذرّع-اَس يسدْجم خَاس. ²¹ ينَّا-ٱس مِّيس: آ بَابَا عْصِيغ سِيذِي أَربِّـي، عْصِيغ شك. وَار سْذِيهْدْجغ شَا اَذ يڒِيغ ذ مِّيش.
²² ينَّا-ٱسن بَابَاس إِ يخدَّامن نّس: رُوْحم ذغْيَا اَوِيم-د تْشَامِّير ذ اَصبْحَان اَرْضم-اَس-ث. ݣّم-اَس ثْخَاذنْت ذݣ وفُوْس نّس، ݣّم-اَس ثِسِيڒَا ذݣ يضَارن نّس. [23-24] أَوِيم-د اَينْدُوْز نِّي يصحّن غَرْصم-اَس. أَ نشّ أَ نْفَرح مِينْزِي مِّي تُوْغَا يمُّوْث ڒخُّو يدَّر. تُوْغَا يودَّار ڒخُّو يتْوَاف. نِثْنِي بْذَان فَرّْحن.
© 2020 Awal n Arebbi ℗ 2008 Hosanna