¹ ذݣ ومزْوَارُو يدْجَا وَاوَاڒ.
أَوَاڒ نِّي يدْجَا اَك أَربِّـي.
أَوَاڒ نِّي ذ نتَّا إِݣ يدْجَان ذ أَربِّـي.
² ذݣ ومزْوَارُو يدْجَا اَك أَربِّـي.
³ زَّايس إِي د يخْڒق أَربِّـي مَارَّا،
أُو بْڒَا اَوَاڒ نِّي وَار تِيڒِي ؤُڒَا ذ يجّن ن ثْمسْڒَايْث زِي مِين د يخْڒق.
⁴ ذَايس إِي ثدْجَا ثُوْذَارْث،
أُو ثُوْذَارْث نِّي نتَّاث ذ نُّوْر إِ يِوْذَان.
⁵ نُّوْر نِّي يتْشعْشِيع ذِي ثَادْجسْت،
ثَادْجسْت نِّي وَار ذَاس ثْزمَّر.
⁶ يُوْسَا-د يجّن ن ورْيَاز يسّكّ-يث-يذ أَربِّـي قَّارن-اَس يَحْيَى. ⁷ نتَّا يُوْسَا-د ذ شَّاهذ حمَا اَذ يشْهذ إِ نُّوْر، حمَا س شْهَاذث نّس اَذ اَمْنن مَارَّا يوْذَان. ⁸ نتَّا يَحْيَى وَار يدْجِي شَا ذ نُّوْر؛ لَّا، يُوْسَا-د اَذ يشْهذ إِ نُّوْر، ⁹ يعْنِي نُّوْر نِّي نِيشَان تُوْغَا د يتَاسن غَار دُّنشْت-أَ اَذ يشعْشع خ كُڒ بْنَاذم.
¹⁰ نُّوْر نِّي تُوْغَا ئِدْجَا ذِي دُّنشْت. وَاخَّا ذ نتَّا إِݣ يݣِّين دُّنشْت، أَيثْبَاب ن دُّنشْت وَار ث سِّينن شَا. ¹¹ يُوْسَا-د غَار ثْمُوْرْث نّس، أَيثْبَاب ن ثْمُوْرْث نّس وَار ث قْبِيڒن شَا. ¹² يِنِّي إِي ث يقبْڒن ؤُمْنن زَّايس زݣ يِيسم نّس، يُوْشَا-ٱسن نتَّا ثِزمَّار حمَا اَذ ذوْڒن ذ ثَارْوَا ن أَربِّـي. ¹³ يِيْنَا وَار د خْڒِيقن شَا عْلَاحْسَاب دُّوْرِّيث ؤُڒَا عْلَاحْسَاب مِين تخْس دَّات ؤُڒَا عْلَاحْسَاب ڒْخَاضَر ن ورْيَاز؛ لَّا، ذ أَربِّـي إِي ثن د يجِّين.
¹⁴ أَوَاڒ-أَ يذْوڒ ذ بْنَاذم، ئِزْذغ جَارَانغ. نشِّين نࢲْرَا لْعَظَمَا غَارس يدْجَان، لْعَظَمَا-يَا ثدْجَا غَار مِّيس وَاحْذس ن بَابَاس. نتَّا يشُّوْر س اَرْضَا ذ لْحَقِيقَا. ¹⁵ ئِشْهذ خَاس يَحْيَى، ئِتْبرَّاح ينَّا: "ذ وَا إِي خف تُوْغَا سِّيوْڒغ نِّيغ-اَوم اَذ د يَاس يجّن منْبَعْد إِ نش، وَلَكِن نتَّا يمْغَار خَافِي مِينْزِي تُوْغَاث قْبڒ مَا ٱذ يڒِيغ نش."
¹⁶ س لْبَرَكَا نّس ثَمقّْرَانْت يبَرك-اَنغ مَارَّا س اَرْضَا خ اَرْضَا. ¹⁷ شَّرِيعَا ن أَيث-إِسْرَائِيل ثمُّوْش خ وفُوْس ن مُوْسَى. اَرْضَا ذ لْحَقِيقَا نِثنْتِي ؤُسِينْت-يد خ وفُوْس ن عِيْسَى لمَسِيح. ¹⁸ ؤُڒَا ذ يجّن وَار يࢲْرِي أَربِّـي عَمَّارْص. مِّيس وَاحْذس إِݣ يدْجَان ذݣ وُوْڒ ن بَابَاس ذ نتَّا إِي ذَانغ د يسْمظْهَارن سِيذِي أَربِّـي.
© 2020 Awal n Arebbi ℗ 2008 Hosanna