³ ئِنْدق-د عِيْسَى ينَّا-ٱس: "أَقَا تسْڒِيذ ڒْحَقّ: وَار يزمَّر ؤُڒَا ذ يجّن اَذ يࢲر ڒْمُلْك ن أَربِّـي إِلَّا مڒَا يخْڒق-د ذ جْذِيذ."
⁴ ينَّا-ٱس نِيْكُوْدِيم: "مَامّش غَا يݣّ بْنَاذم اَذ د يخْڒق ذ جْذِيذ مڒَا يوْسَار؟ مَا يزمَّر اَذ يَاذف عَاوذ ذݣ وعدِّيس ن يمَّاس اَذ د يخْڒق ذ جْذِيذ؟"
⁵ ينَّا-ٱس عِيْسَى: "أَقَا تسْڒِيذ ڒْحَقّ: مڒَا شَان يِجّن وَار د يخْڒِيق شَا س وَامَان ذ أَرُّوح ن أَربِّـي، وَار يزمَّر اَذ يَاذف ذِي ڒْمُلْك ن أَربِّـي. ⁶ مِين يتْوَاخڒْقن زِي دَّات، نتَّاث ذ دَّات. مِين يتْوَاخڒْقن زِي أَرُّوْح ن أَربِّـي، نتَّا ذ أَرُّوْح. ⁷ مڒَا نِّيغ-أَش يتخصَّا-كنِّيو اَذ د تْخڒْقم ذ جْذِيذ، وَار تْعجِّيب شَا. ⁸ أَرِّيح يتْصُوْض مَانِي يخس نتَّا. أَذ تسْڒِيذ إِ صُّوْت نّس، وَلَكِن وَار ثسِّينذ شَا مَانِيس د يكَّا ؤُڒَا ذ مَانِي غَا يرَاح. أَمُّو إِي ݣِّين مَارَّا يِنِّي يتْوَاخڒْقن س أَرُّوح ن أَربِّـي."
⁹ ينَّا-ٱس نِيكُوْدِيم: "مَامّش مَانَايَا؟"
¹⁰ يَارَّا خَاس عِيْسَى ينَّا-ٱس: "إِيوَا ثْسڒْمَاذذ شك أَيث-إِسْرَائِيل وَار ثْفهِّيمذ شَا مَانَايَا؟ ¹¹ أَقَا تسْڒِيذ ڒْحَقّ: نشِّين نسَّاوَاڒ زِي مِين نسّن، نْشهّذ س مِين نࢲْرَا، وَلَكِن كنِّيو وَار ثقْبِيڒم شَا شْهَاذث نّغ. ¹² مڒَا سِّيوْڒغ غَارْوم خ ثْمسْڒَايِين ن ثْمُوْرْث كنِّيو وَار تِيمْنم شَا، مَامّش غَا ثَامْنم مڒَا سِّيوْڒغ-اَوم خ ثْمسْڒَايِين ن وجنَّا؟ ¹³ ؤُڒَا ذ يجّن مَا يُوڒِي غَار وجنَّا إِلَّا ونِّي د يهْوَان زݣ وجنَّا، نتَّا ذ مِّيس ن بْنَاذم.
¹⁴ أَمشنَاو مَامّش يسْبدّ مُوْسَى فِيغر ن نحَّاس خ ثحْنَاشْت ذِي ڒخْڒَا، أَمُّو يتْخصَّا اَذ يتْوَاسْبدّ مِّيس ن بْنَاذم ذݣ وجنَّا. ¹⁵ مَارَّا ونِّي زَّايس غَا يَامْنن اَغَارس ثِيڒِي ثُوْذَارْث إِ ڒبْدَا."
¹⁶ وَامِي يحِبّ أَربِّـي دُّنشْت-أَ، ئِهْذَا-يَاس مِّيس أَوحْذَانِي حمَا ونِّي زَّايس غَا يَامْنن وَار يفنِّي شَا اَغَارس ثِيڒِي ثُوْذَارْث ن ڒبْدَا. ¹⁷ أَربِّـي وَار د يسّكّ شَا مِّيس غَار دُّنشْت حمَا اَذ يحَاسب يوْذَان؛ لَّا، يسّكّ-يث-يذ حمَا اَزَّايس يسنْجم يوْذَان. ¹⁸ ونِّي زَّايس يتَامْنن اَتَاف وَار يتْوَاحَاسِيب شَا. ونِّي وَار زَّايس يتِيمْنن شَا اَقَا يتْوَاحَاسَاب مِينْزِي نتَّا وَار يُوْمِين شَا زݣ يِيسم ن مِّيس ن أَربِّـي اَوحْذَانِي. ¹⁹ ذ وَا ذ لْحُكم إِي خَاس غَا يِيڒِين: نُّوْر يُوْسَا-د غَار يِوْذَان، ئِوْذَان خْسن ثَادْجسْت حْسن زِي نُّوْر مِينْزِي تݣّن شَّرّْ. ²⁰ مَارَّا ونِّي يتݣّن مِين يدْجَان ذ اَعفَّان يتْعِيفَّا نُّوْر، وَار غَارس د يتِيس شَا غَار نُّوْر حمَا وَار تْنفْضِيحنْت شَا ڒفْعَايڒ نّس. ²¹ ونِّي يخدّْمن نِيشَان اَذ د يَاس غَار نُّوْر. أَمُّو اَذ د يبَان بلِّي ڒخْذَايم نّس يتݣّ-يثنْت إِ أَربِّـي.
© 2020 Awal n Arebbi ℗ 2008 Hosanna