¹⁵ مڒَا تْحِبِّيم-اَيِي كنِّيو، ݣّث زِي ڒُوْصِيَاث ينُو. ¹⁶ نش اَذ تَّارغ إِ بَابَا حمَا اَذَاوم يُوْش لْمُعَاوِن نّغْنِي حمَا اَكِذْوم يتِيڒِي إِ ڒبْدَا. ¹⁷ لْمُعَاوِن نتَّا ذ أَرُّوح ن لْحَقِيقَا. وَار ثْزمَّر دُّنشْت اَث تقْبڒ، مِينْزِي نتَّاث وَار ث تْوِيڒِي شَا وَار ث ثسِّين شَا. وَلَكِن كنِّيو ثسّْنم-ث مِينْزِي يقِّيم اَكِذْوم أُو اَذ يِيڒِي ذَايوم. ¹⁸ وَار كنِّيو تِجِّيغ شَا ذ يـيُوْجِيڒن، أَغَارْوم د عقْبغ. ¹⁹ شْوِيت ن ڒْوقث إِݣ يقِّيمن وَار ذَايِي ثْࢲرّ شَا دُّنشْت-أَ، وَلَكِن كنِّيو اَذَايِي ثࢲرم. وَامِي نش دَّرغ، ؤُڒَا ذ كنِّيو اَذ تدَّرم. ²⁰ ذِي نْهَار نِّي اَذ تسّْنم بلِّي نش اَقَايي ذِي بَابَا، كنِّيو ذَايِي، نش ذَايْوم. ²¹ ونِّي غَار دْجَانْت ڒُوْصِيَاث ينُو يخدّم زَّايْسنْت، أَتَاف يتْحِبَّا-اَيِي. ونِّي ذَايي يتْحِبَّان، أَتَاف اَث يحِبّ ؤُڒَا ذ بَابَا. أَث حِبّغ ؤُڒَا ذ نش، أَذَاس د سْمظْهَارغ يخف ينُو."
²² ينَّا-ٱس يَهُوْذَا (مَاشِي يَهُوْذَا إِسْخَرْيُوْطِي): "آ سِيذِي، مَايمِّي غَا د ثْسظْهَارذ يخف نّش إِ نشِّين، دُّنشْت لَّا؟"
²³ ينَّا-ٱس عِيْسَى: "ونِّي ذَايِي يتْحِبَّان، أَتَاف اَذ يخْذم زݣ وَاوَاڒ ينُو. أَث يحِبّ بَابَا، أَ نْرَاح غَارس نش ذ بَابَا، غَارس إِي غَا نزْذغ. ²⁴ ونِّي وَار ذَايِي يتْحِبِّين، أَتَاف وَار يخدّم شَا زݣ وَاوَاڒ ينُو. أَوَاڒن-أَ إِي تسْڒَام وَار دْجِين شَا ينُو لَّا، ن بَابَا إِي ذَايِي-د يسّكّن.
²⁵ ثِمسْڒَايِين-أَ نِّيغ-اَوم-ثنْت أُو نش عَاذ اَقَايِي اَكِذْوم. ²⁶ لْمُعَاوِن نِّي نتَّا ذ أَرُّوْح يقدّْسن، أَثِيذ يسّكّ بَابَا عْلَاحْسَاب يسم ينُو اَذَاوم يسڒْمذ كُڒْشِي اَكنِّيو يسْفكَّر مَارَّا مِين ذَاوم نِّيغ.
²⁷ تِيجّغ-اَوم ڒهْنَا، تِيشّغ-اَوم ڒهْنَا ينُو. وَار ذَاوم ث تِيشّغ شَا اَم ث تِيشّ دُّنشْت. ئِتْخصَّا ؤُڒَاون نْوم وَا تْخيِّيقن وَار تݣّْوْذن شَا.
© 2020 Awal n Arebbi ℗ 2008 Hosanna