Arebbi ixȓeqd dduniṯ

1 Zeg wami nemserqa ṯwarat ṯangarut, min teƹna rḥajeṯ icijjin atcekkaḏ?

2 Min teƹna rḥajeṯ icisxeyqan simanaya, i min ṯeḥḏajiḏ ḥuma aḏitwaḥesen rḥar?

3 Min tƹnant ṯimsrayin i tḥḏajan iwḏan gi lmujtamaƹ ineḵ? Muxas ɣa negg anƹawn ayawya gi min itxessan mixef nmhawaḍ?

4 Ruxa, awaḥiṯ anseǧ i ijjen ṯɣuri ḏ jḏiḏ zgi Arebbi...

1 Ḏeg umzwaru ixreq Arebbi ajenna ḏ ṯmurṯ. 2 Tuɣa ṯamurṯ ṯexra, tuɣa ṯaǧest x rebḥar, Arruḥ n Arebbi itḥekum x waman. 3 Inna Arebbi: "Aḏ tiri ṯfawṯ", uca ṯeḍhared. 4 Izra belli ṯfawṯ ṯeṣbaḥ uca iferq jar ṯfawṯ ḏ ṯaǧest. 5 Isemma ṯfawṯ <nhar>, ṯaǧest isemmayas <ǧireṯ>. Tuɣa ḏ nhar amzwaru. 6 Inna Arebbi ƹaweḏ: "Aḏ yiri min ɣa ibḍan aman x ṯnayen". 7 Uca igga min ibḍan jar waman nennej ḏ yin n wedday. 8 Isemma yinni nennej <ajenna>. Tuɣa ḏ nhar wis ṯnayen. 9 Inna Arebbi ƹaweḏ: "Aḏ munen waman iǧan swedday ujenna ḏeg ijjen umcan maḥend aḏ teḍhar ṯmurṯ". 10 Uca isemma i umcan yuzɣen <ṯamurṯ>, isemma waman <rebḥar>. 11 Inna ƹaweḏ: "Aḏ tsseɣmi ṯmurṯ arbiƹ ḏ recjjur". 12 Ṯsseɣmid ṯmurṯ arbiƹ ḏ recjjur. 13 Tuɣa ḏ nhar wis ṯraṯa. 14 Inna Arebbi ƹaweḏ: "Aḏ irint ṯifawin ḏeg ujenna ḥima aḏ bḍant nhar zi ǧireṯ bac aḏ sbeyynent rfarq jar wussan ḏ rechur ḏ iseggwusa. 15 U zeg ujenna aḏ ucent ṯfawṯ i ṯmurṯ". 16 Igga ṯnayen ṯifawin ṯimqqranin, ṯamqqrant <ṯfucṯ>, ig iḥekkmen x nhar, ṯamzyant <ṯaziri>, ig iḥekkmen x ǧireṯ, amc d yarni xasent ura ḏ yiṯran. 19 Tuɣa ḏ nhar wis arbƹa. 20 Inna Arebbi ƹaweḏ: "Aḏ kṯarent ḏeg waman ṯimsrayin iddaren, aḏ uḍwan ijḍaḍ ḏeg ujenna sennej i ṯmurṯ". 21 Uca ixerqed reḥwayj n rebḥar ḏ marra min iddaren ḏeg waman ƹelḥaseb mkur nuƹ. Amen d ixerq ƹaweḏ ƹla mkur nuƹ ijḍaḍ. 22 Iberkiṯen Arebbi inna: "Arwem, ṯekṯarem, ṯƹemmarem rebḥur, aḏ ikṯaren ijḍaḍ x ṯmurṯ". 23 Tuɣa ḏ nhar wis xemsa. 24 Inna Arebbi ƹaweḏ: "Aḏ itwaffeɣ zi ṯmurṯ ƹla mkur nuƹ n lḥayawan ḏ ruḥuc". 25 Uca igga marra manaya.

1 Ruxa, cin ḥed axdiƹaweḏ lmeqteƹa s wawaren ines, ameḵnaw itƹawaḏit i cin umdukkar iƹamas isiseǧen. Janaɣ aṯnƹawen mara ittu cin ḥajeṯ niɣ yanu ci slxata'. Mara yuqaƹ manaynni mumkin anseqsa "mani ṯufiḏ manaynni gi ṯiɣuri?"

2 Min ḏanaɣ ṯsermeḏ ṯiɣuri-ya x Siḏi Arebbi, x tbiƹaṯ ines, ḏ min itegg?

3 Min nremmeḏ x iwḏan, zagsen ixf nneɣ, zgi ṯɣuri-ya?

4 Muxas atebqeḏ lḥaqiqa n Siḏi Arebbi zgi ṯɣuri-ya gi ṯuḏarṯ ineḵ simana-ya? Man rxeḏmeṯ ḏ rḥajeṯ itxeṣṣaḵ ateggeḏ?

5 Min iƹna wa migi atcarkeḏ lḥaqiqa zgi ṯɣuri qber ma anemserqa ṯwarat nedden? Ma ṯesneḏ cin iwḏan nedden i yazun aḏektacfen awar n Siḏi Arebbi gi application-na maṯalan amux necnin?

6 Mixef ididqarab ankemmer amserqi-ya, janex anqarer mermi anemserqa ṯwarat nedden ḏ min iƹna wa axan isehren amserqi idigguran.

7 Ntcajaƹ'ic atsejleḏ nuqat x min tenniḏ ateggeḏ ḏ atƹawḏeḏ atesriḏ i ṯiɣuri-ya gi riyam qber amserqi idigguran. Wenni igisgguran izemma aḏicarek ṯiɣuri ḏ tira nix ḏ awar mara cin ḥed waɣasci. Mixef naggur, awaḥiṯ anseqsa Siḏi Arebbi aḏaniƹawen.