1 Tuɣa fiɣar ḏ aḥraymi x marra ruḥuc igga Arebbi. Ikkar ufiɣar isseqsa ṯamɣarṯ, innas: "Ḏ ṣṣeḥ innawem Arebbi itxeṣṣa kenniw war ṯettem zi marra recjjur n rƹarseṯ?"
2 Ṯarra xas ṯemɣarṯ, ṯennas: "Nzemmar azzaysent necc marra,
3 illa ṯacjjarṯ iy d yusin ḏi rwesṭ n rƹarseṯ innaneɣ Arebbi: War zzays ṯettem ca, war tetḥeḏam ura ḏ aḥaḏi bac war tmettim".
4 Innas ufiɣar i ṯemɣarṯ: "War tmettim ca!
5 Arebbi issen belli ɣir azzays ṯeccem, aḏawem narzment ṯiṭṭawin uca aḏ tirim am netta, ṯessnem rxir ḏ ccerr".
6 Ṯzra ṯemɣarṯ belli min turu ṯecjjarṯ iṣbaḥ i mecca iṣbaḥ ixezzran, ṯenwa belli aḏas ṯarzem rƹaqer uca ṯekkes zzays, ṯecca, ṯucas i waryaz nnes, Adam, yecca zzays.
7 Nnarzment ṯiṭṭawin nsen uca ssnen belli ḏ iƹariyanen iǧan. Ṭṭfen ṯifray n warṯu, seṯran zzaysent ixf nsen.
8 Ɣar uƹcci, armi iy d iṣuḍ arriḥ, tesran rḥes n Arebbi armi tuɣa iggwar ḏi rƹarseṯ uca nufaren zzays jar recjjur.
9 Ireɣas Siḏi Arebbi i Adam, innas: "Mani ṯeǧiḏ?"
10 Yarra xas innas: "Tesriɣ i rḥes nnec ḏi rƹarseṯ uca ggweḏeɣ raḥqqac ḏ aƹaryan iy ǧeɣ uca nufareɣ".
11 Innas Siḏi Arebbi: "Uw iy ḏac innan belli cek ḏ aƹaryan? Ma ṯecciḏ zi ṯecjjarṯ iy xac ḥarmeɣ?"
12 Yarrad xas Adam: "Ṯamɣarṯ iy kiḏi ṯeggiḏ ṯamƹecarṯ, nettaṯ iy ḏayi yucin zi ṯecjjarṯ nni uca cceɣ zzays".
13 Uca innas Siḏi Arebbi i ṯemɣarṯ: "Maymmi ṯeggiḏ manaya?"
Ṯennas: "Iɣarrayi ufiɣar uca cceɣ zzays".
14 Innas Siḏi Arebbi i ufiɣar:
"Aqqac menƹul jar marra lḥayawan ḏ ruḥuc armi ṯeggiḏ manaya.
Aḏ tuyureḏ x uƹddis aḏ tƹiceḏ x ucar min ɣa ṯekkeḏ teddareḏ.
15 Aḏ ggeɣ reƹdawṯ jarac ḏ ṯemɣarṯ, jar ddurriṯ nnec ḏ ṯenna nnes, netta aḏac yarbez azǧif, cek aṯ ṯzeƹfeḏ zi inarez".
16 Innas Arebbi i ṯemɣarṯ:
"Aḏ tiysiḏ ddist s tamara, aḏ taruḏ s reḥriq, aḏ tƹeccqeḏ rebda ɣar waryaz nnem, maca aḏ tiriḏ swedday lḥukem nnes".
17 Inna Siḏi Arebbi i Adam:
"Aremi ṯeggiḏ array n ṯemɣarṯ nnec uca ṯecciḏ zi ṯecjjarṯ iy xac ḥarmeɣ, rexxu itwanƹer ṯamurṯ ḏi ṭṭuƹaṯ nnec, u s tamara aḏ tecceḏ min ɣa ṯaru ṯmurṯ min ɣa ṯekkeḏ teddareḏ.
18 Aḏac tseɣmi isennanen ḏ ṯzeggwarṯ, u cek aḏ tƹiceḏ zi arbiƹ n tmurṯ.
19 Aḏ tecceḏ aɣrum s ṯiḏi n ṯanyarṯ nnec ar ɣa ṯḏewreḏ ɣar ṯmurṯ manis d ṯusiḏ, raḥqqac ṯxerqeḏ zi ucar aḏ tḏewreḏ ɣar ucar".
20 Isemmayas Adam i ṯemɣarṯ nnes <Ḥuwa>, u Ḥuwa yexs aḏ yini <ṯuḏarṯ>, raḥqqac nettaṯ ḏ immas n marra min iddaren.
21 Igga Arebbi i Adam ḏ Ḥuwa arruḍ s yirem uca iserḍiṯen zzays.
22 Inna Siḏi Arebbi: "Bnaḏem rexxu iḏwer am ijjen zzayneɣ, issen rxir zi ccerr. Aḏ tafeḏ izemmar aḏ ikkes zi ṯecjjarṯ itticen ṯuḏarṯ u aḏ icc ḥima aḏ iƹic i rebda".
23 Uca issufɣiṯ Siḏi Arebbi zi rƹarseṯ bac war itett zi tcejjarṯ nni itticen ṯuḏarṯ uca iffeɣ bac aḏ ixḏem ṯamurṯ iy zi d ixreq.
24 Armi yuzzer Arebbi x bnaḏem zi rƹarseṯ, igga ṯaƹassast s lmelayka ḏ ssif n ṯimssi x ubriḏ iy tawin ɣar ṯecjjarṯ nni itticen ṯuḏarṯ.
© 2020 Awal n Arebbi ℗ 2008 Hosanna