Siḏna Brahim iṭaƹ i Arebbi

1 Zeg wami nemserqa ṯwarat ṯangarut, min teƹna rḥajeṯ icijjin atcekkaḏ?

2 Min teƹna rḥajeṯ icisxeyqan simanaya, i min ṯeḥḏajiḏ ḥuma aḏitwaḥesen rḥar?

3 Min tƹnant ṯimsrayin i tḥḏajan iwḏan gi lmujtamaƹ ineḵ? Muxas ɣa negg anƹawn ayawya gi min itxessan mixef nmhawaḍ?

4 Min teƹna ṯiɣuri ṯangarut zeg wami nemserqa? Min nermeḏ x Siḏi Arebbi ḏ iwḏan?

5 Gu mserqi aneggaru, cek ṯqerreḏ atebqeḏ min ṯremḏeḏ. Min ṯeggiḏ i mux iƹḏa?

6 Ugmi ṯcarkeḏ cin ḥajeṯ zgi ṯɣuri ṯangarut? Mux istajben?

7 Necnin nḥeded attas n l'iḥtiyajat gu mserqi aneggaru. Nxetet ḥuma anlebba l'iḥtiyajat. Mux iƹḏa?

8 Ruxa, awaḥiṯ anseǧ i ijjen ṯɣuri ḏ jḏiḏ zgi Arebbi...

1 Awarni manaya, ixeṣṣ Arebbi aḏ ijarreb Brahim, uca ireɣayased s yisem nnes. Yarrad xas Brahim innas: "Ha qqayi". 2 Innas Arebbi: "Awi mmic Isḥaq wenni xak iƹizzen aṭṭas minzi wenni iy ɣarek, ṯruḥeḍ ɣar ṯmurṯ n Muriya, ṯgeƹƹḏeḏ cek ḏ mmic ɣar uḏrar iy ḏac ɣa ssecneɣ ḥima aḏas ṯɣerseḏ ḏinni ḏ teḍḥiyeṯ ƹelḥasebi". 3 Ṯiwcca nnes ikkar Brahim ɣar ṣbaḥ zic, iḥres i uɣyur nnes, yuwi akiḏes ṯnayen isemɣan ḏ mmis Isḥaq, amc iysi akccuḍ i ṯimssi bac aḏ iḥerq teḍḥiyeṯ, uca iruḥ ɣar umcan nni ixf ḏas issiwer Arebbi. 4 Ḏi nhar wis ṯert ayyam, igeƹƹeḏ ṯiṭṭawin nnes, zi ɣar reggwaj izra amcan nni. 5 Inna i isemɣan nnes: "Kenniw qqimem ḏa akeḏ uɣyur, nec ḏ uḥenjira a ngeƹƹeḏ ḏiha sennej a nsejeḏ i Arebbi, umbeƹd aɣarwem d nḏwer". 6 Yarbu Brahim xef mmis Isḥaq akccuḍ ƹelḥaseb ṯimssi, netta yiysi ḏi ifassen nnes min zi ɣa icƹer ṯimssi ḏ ṯxeḏmecṯ uca geƹƹḏen s ṯnayen iḏsen. 7 Ḏeg ubriḏ innas Isḥaq i babas: "Xzared ɣari a baba". Innas babas: "Ha qqayi a mmi". Uca innas: "Ɣarneɣ ṯimssi ḏ ukccuḍ, maca mani iǧa izmar xas ɣa negg?" 8 Yarra xas babas innas: "Ḏ Arebbi iy d ɣa iḍberen i yixf nnes izmar i manaya". Uca geƹƹḏen s ṯnayen iḏsen. 9 Armi uḍen ɣar umcan ixf ḏasen issiwer Arebbi, iṭṭef Brahim ibna ijjen rmeḏbeḥ, ismun akccuḍ uca icarf mmis Isḥaq, iggiṯ xef rmeḏbeḥ sennej i ukccuḍ. 10 Uca iswizzeḍ s ufus nnes, yiysi ṯxeḏmecṯ ḥima aḏ iɣers i mmis. 11 Rxeddennit issiwer-d ɣars ijjen lmelayka n Arebbi zeg ujenna innas: "Brahim! Brahim!" Yarra xas innas: "Aqqayi". 12 "War swizziḍ s ufus nnec ɣar uḥenjir! War ḏas tegg ura ḏ ijjen rḥajeṯ! Rexxu ssneɣ belli cek teggwḏeḏ Arebbi, suyinni war xafi ṯminƹeḏ mmic ijjen iy ɣarek". 13 Igeƹƹeḏ Brahim aṭṭawen nnes uca izra ijjen uḥuri awarnas innuɣ zeg waccawen ḏi rɣabeṯ, uca iruḥ yuwiṯiḏ iɣersas isḥerqiṯ x ṯimssi ḏ teḍḥiyeṯ i Arebbi ḏeg umcan n mmis. 14 Isemmayas Brahim i umcan nni, <Arebbi iḍebbar>. 15 Ireɣad lmelayka nni zeg ujenna amur nneḍnit x Brahim 16 innas: "Aqqa iqqar Arebbi: Ḏi ṭṭuƹeṯ min teggiḏ, war xafi ṯminƹeḏ bu mmic waxxa wenni iy ɣarek, juǧeɣ belli 17 ac berkeɣ s ijjen lbereka ṯemɣar, aḏ semɣareɣ ddurriṯ nnec amcnaw iṯran ujenna ḏ yijḏi n rebḥar. Ddurriṯ nnec aḏ twereṯ ṯimiddan n reƹḏu nnes. 18 U zi ddurriṯ nnec iy ɣa berkeɣ marra regnus n ṯmurṯ, raḥqqac ṭṭaƹeḏayi". 19 Umbeƹd iƹeqbed Brahim ɣar isemɣan nnes, uca kkaren ƹeqben-d marra ɣar umcan nni umi qqaren Anu n Sebƹa mani izḏeɣ Brahim.

1 Ruxa, cin ḥed axdiƹaweḏ lmeqteƹa s wawaren ines, ameḵnaw itƹawaḏit i cin umdukkar iƹamas isiseǧen. Janaɣ aṯnƹawen mara ittu cin ḥajeṯ niɣ yanu ci slxata'. Mara yuqaƹ manaynni mumkin anseqsa "mani ṯufiḏ manaynni gi ṯiɣuri?"

2 Min ḏanaɣ ṯsermeḏ ṯiɣuri-ya x Siḏi Arebbi, x tbiƹaṯ ines, ḏ min itegg?

3 Min nremmeḏ x iwḏan, zagsen ixf nneɣ, zgi ṯɣuri-ya?

4 Muxas atebqeḏ lḥaqiqa n Siḏi Arebbi zgi ṯɣuri-ya gi ṯuḏarṯ ineḵ simana-ya? Man rxeḏmeṯ ḏ rḥajeṯ itxeṣṣaḵ ateggeḏ?

5 Min iƹna wa migi atcarkeḏ lḥaqiqa zgi ṯɣuri qber ma anemserqa ṯwarat nedden? Ma ṯesneḏ cin iwḏan nedden i yazun aḏektacfen awar n Siḏi Arebbi gi application-na maṯalan amux necnin?

6 Mixef ididqarab ankemmer amserqi-ya, janex anqarer mermi anemserqa ṯwarat nedden ḏ min iƹna wa axan isehren amserqi idigguran.

7 Ntcajaƹ'ic atsejleḏ nuqat x min tenniḏ ateggeḏ ḏ atƹawḏeḏ atesriḏ i ṯiɣuri-ya gi riyam qber amserqi idigguran. Wenni igisgguran izemma aḏicarek ṯiɣuri ḏ tira nix ḏ awar mara cin ḥed waɣasci. Mixef naggur, awaḥiṯ anseqsa Siḏi Arebbi aḏaniƹawen.