Ƹecra n Ȓuṣiyaṯ ḏ Dbiḥaṯ

1 Zeg wami nemserqa ṯwarat ṯangarut, min teƹna rḥajeṯ icijjin atcekkaḏ?

2 Min teƹna rḥajeṯ icisxeyqan simanaya, i min ṯeḥḏajiḏ ḥuma aḏitwaḥesen rḥar?

3 Min tƹnant ṯimsrayin i tḥḏajan iwḏan gi lmujtamaƹ ineḵ? Muxas ɣa negg anƹawn ayawya gi min itxessan mixef nmhawaḍ?

4 Min teƹna ṯiɣuri ṯangarut zeg wami nemserqa? Min nermeḏ x Siḏi Arebbi ḏ iwḏan?

5 Gu mserqi aneggaru, cek ṯqerreḏ atebqeḏ min ṯremḏeḏ. Min ṯeggiḏ i mux iƹḏa?

6 Ugmi ṯcarkeḏ cin ḥajeṯ zgi ṯɣuri ṯangarut? Mux istajben?

7 Necnin nḥeded attas n l'iḥtiyajat gu mserqi aneggaru. Nxetet ḥuma anlebba l'iḥtiyajat. Mux iƹḏa?

8 Ruxa, awaḥiṯ anseǧ i ijjen ṯɣuri ḏ jḏiḏ zgi Arebbi...

1 Uca issiwer Arebbi s marra awaren-a: 2 Nec ḏ Arebbi l'ilah nnec iy c d issufɣen zi ṯmurṯ n Miṣra mani ic tuɣa ḏ ismeɣ. 3 War ƹbeḏ bu l'aliha nneḍnit illa nec. 4 War tegg bu l'aṣnam. War tegg bu taṣwirṯ iy min iǧan ḏeg ujenna ḏ min ḏays sennej n ṯmurṯ ḏ min ḏays ḏeg waman swedday n ṯmurṯ. 5 War ḏasen tesjeḏ ca war aṯen ƹbeḏ ca, raḥqqac nec ḏ Siḏi Arebbi l'ilah nnec. War xeseɣ ca aḏ tƹebḏeḏ can l'aliha nneɣnit mbra zzayi. Tƹeqbeɣ iḥenjiren x dnub iy ggin lwalidin nsen ḏ lwalidin n lwalidin nsen zi yinni ḏayi icerhen. 6 Teggeɣ rxir ḏi ruruf n l'ajyal zi yinni ḏayi texsen ḏ yinni ṭaƹen ruṣiyaṯ inu. 7 War nṭeq ca ḏi rbaṭer isem n Siḏi Arebbi l'ilah nnec, raḥqqac Siḏi Arebbi itƹeqeb wenni inṭeqen ḏi rbaṭer s yisem nnes. 8 War xeddem ca ḏi nhar n ssebt nhar n retwaḥ ḥima aḏ yiri ḏ nhar amqeddes. 9 Setta ayyam iy ɣa ṯxeḏmeḏ, egg marra cɣuraṯ nnec. 10 Maca nhar n ssebt nhar n retwaḥ n Siḏi Arebbi l'ilah nnec, war ḏays xeddem ca cek, mmic, yeǧic, ismeɣ nnec, ṯaxeddant nnec, niɣ rebhimeṯ nnec, niɣ rbarrani iy kic iǧan. 11 Raḥqqac Siḏi Arebbi igga ajenna ḏ ṯmurṯ ḏ rebḥar ḏ marra min ḏays ḏi setta ayyam. Uca yertaḥ ḏi nhar n ssebt. Suyinni ibarak Siḏi Arebbi nhar n ssebt, iggiṯ amqeddes. 12 Weqqar babac ḏ yemmac ḥima aḏ irin wussan nnec ḏi ṯmurṯ ḏ iziran, iy ɣa ac yuc Siḏi Arebbi l'ilah nnec. 13 War neqq ca. 14 War zenna ca. 15 War taccar ca. 16 War cheḏ bu zzur x wajjar nnec. 17 War ƹceq ca ḏi ṯemɣarṯ n wajjar nnec, niɣ ṯaddarṯ nnes, niɣ ismeɣ nnes, niɣ ṯaxeddant nnes, niɣ ifunasen nnes, niɣ yiɣyuren nnes, niɣ can rḥajeṯ nnes

1 Siḏi Arebbi issiweȓ ak Musa inna-as: 2 "Amma wenni iƹeṣṣan itḍeyyaƹ ijjen n ttiqeṯ ak Arebbi iƹni ixeddeƹ ajjar nnes x yijjen n lʼamana niɣ x yijjen n ḍḍamana niɣ itacar-iṯ niɣ iḍeǧem-iṯ 3 niɣ isnuffar xas ijjen n ṯmesȓayṯ ṯweddar-as isxarriq xas niɣ itechaḏ xas ẓẓur niɣ ḏ marra min teggen yiwḏan ƹeṣṣan Arebbi zi ṯmesȓayin nni. 4 Wami iƹṣa Arebbi aḏ itub x min igga itxeṣṣa-ṯ aḏ d yarr min ḏas yucar niɣ ḏ min ḏas iysi s uḍȓam nni niɣ ḏ lʼamana nni niɣ ḏ min tuɣa ḏas iweddaren isnuffar-iṯ xas, 5 niɣ ayyi ṯamesȓayṯ itechaḏ xas ẓẓur. Itxeṣṣa-ṯ aḏ d yarr marra manayenni aḏ yarni akiḏes ṯaxemmasṯ aḏ yuc manayenni marra i bab nnes nhar nni iy ɣa iraḥ aḏ iqeddem dbiḥeṯ i yixef nnes. 6 Itxeṣṣa-ṯ aḏ ixeǧes abruṣi aṯ yawi ɣar ȓefqi iƹni ɣar Siḏi Arebbi ijjen n ṣṣeḏqeṯ x ttuba nnes iƹni ij uḥuȓi zi ṯḥimarṯ nnes bȓa ȓƹib niɣ ḏ min isewwa. 7 Ammu ȓefqi nni axas ixeǧes lfidya zzaṯ n Siḏi Arebbi aḏas iɣfar marra ṯimesȓayin nni mixef itub.

1 Ruxa, cin ḥed axdiƹaweḏ lmeqteƹa s wawaren ines, ameḵnaw itƹawaḏit i cin umdukkar iƹamas isiseǧen. Janaɣ aṯnƹawen mara ittu cin ḥajeṯ niɣ yanu ci slxata'. Mara yuqaƹ manaynni mumkin anseqsa "mani ṯufiḏ manaynni gi ṯiɣuri?"

2 Min ḏanaɣ ṯsermeḏ ṯiɣuri-ya x Siḏi Arebbi, x tbiƹaṯ ines, ḏ min itegg?

3 Min nremmeḏ x iwḏan, zagsen ixf nneɣ, zgi ṯɣuri-ya?

4 Muxas atebqeḏ lḥaqiqa n Siḏi Arebbi zgi ṯɣuri-ya gi ṯuḏarṯ ineḵ simana-ya? Man rxeḏmeṯ ḏ rḥajeṯ itxeṣṣaḵ ateggeḏ?

5 Min iƹna wa migi atcarkeḏ lḥaqiqa zgi ṯɣuri qber ma anemserqa ṯwarat nedden? Ma ṯesneḏ cin iwḏan nedden i yazun aḏektacfen awar n Siḏi Arebbi gi application-na maṯalan amux necnin?

6 Mixef ididqarab ankemmer amserqi-ya, janex anqarer mermi anemserqa ṯwarat nedden ḏ min iƹna wa axan isehren amserqi idigguran.

7 Ntcajaƹ'ic atsejleḏ nuqat x min tenniḏ ateggeḏ ḏ atƹawḏeḏ atesriḏ i ṯiɣuri-ya gi riyam qber amserqi idigguran. Wenni igisgguran izemma aḏicarek ṯiɣuri ḏ tira nix ḏ awar mara cin ḥed waɣasci. Mixef naggur, awaḥiṯ anseqsa Siḏi Arebbi aḏaniƹawen.