Lkanisa ttiwec s taḍḥiyaṯ

Zeg wami nemserqa ṯwarat ṯangarut, min teƹna rḥajeṯ icijjin atcekkaḏ?

Min teƹna rḥajeṯ icisxeyqan simanaya, i min ṯeḥḏajiḏ ḥuma aḏitwaḥesen rḥar?

Min tƹnant ṯimsrayin i tḥḏajan iwḏan gi lmujtamaƹ ineḵ? Muxas ɣa negg anƹawn ayawya gi min itxessan mixef nmhawaḍ?

Min teƹna ṯiɣuri ṯangarut zeg wami nemserqa? Min nermeḏ x Siḏi Arebbi ḏ iwḏan?

Gu mserqi aneggaru, cek ṯqerreḏ atebqeḏ min ṯremḏeḏ. Min ṯeggiḏ i mux iƹḏa?

Ugmi ṯcarkeḏ cin ḥajeṯ zgi ṯɣuri ṯangarut? Mux istajben?

Necnin nḥeded attas n l'iḥtiyajat gu mserqi aneggaru. Nxetet ḥuma anlebba l'iḥtiyajat. Mux iƹḏa?

Ruxa, awaḥiṯ anseǧ i ijjen ṯɣuri ḏ jḏiḏ zgi Arebbi...

³² Jmaƹeṯ nni n ȓmuminin ɣarsen uȓ nsen ḏ ȓaƹqeȓ nsen kif-kif. Uȓa ḏ ijjen zzaysen war iḥesseb min ɣares nnes waḥḏes, carrcen marra ṯimesȓayin jarasen. ³³ Cehhḏen arrusul s yijjen n jjheḏ ḏ ameqqran x lqiyama iy igga Siḏiṯneɣ Ƹisa wami ikkar zi ȓmewṯ. Arebbi igga xasen marra ijjen n lbaraka ṯemɣar. ³⁴ War iǧi uȓa ḏ ijjen zzaysen ma iḥḏaj. Li'anna yinni iy ɣar iǧa ṯimura ḏ ṯuḏrin traḥen znuzan-ṯent tawin-d tmenyaṯ nni, ³⁵ srusan-ṯent ɣar iḍaren n arrusul tferraqen-ṯent ƹlaḥsab mkuȓ ijjen min iḥḏaj. ³⁶ Ḏinni ijjen qqaren-as Yusef, ƹaweḏ semman-ṯ arrusul s Barnaba iƹni <wenni itcejjaƹen.> Netta zi ccurfa n Ayṯ-Lawi ḏ mmis n ṯendint n Qubruṣ. ³⁷ Ikkar izzenz ijjen n ṯmurṯ iy ɣares, yuwi-d tmenyaṯ nni isers-iṯent ɣar iḍaren n arrusul.

¹ Fa ay ayṯma, nexs aḏ tessnem x arḍa nni iy ḏasent yuca Arebbi i ṯjumaƹ n ȓmuminin ig iǧan ḏi lʼiqlim n Masidunya. ² Ṯekka xasen ijjen n ȓmiḥneṯ ḏ ṯameqqrant ṯeqseḥ xasen aṭṭas. Waxxa niṯni ḏ ipubriṯen war ɣarsen walu walakin niṯni ȓefraḥeṯ nsen ṯemɣar. Zi manayenni iy zi teffeɣ ijjen n ṣṣaḏaqa ḏ ṯameqqrant aṭṭas. ³ Aqa nec cehhḏeɣ ṣeddqen s min zemmaren aḏ ucen, qa ḏ ṣṣaḥ ṣeddqen ktar zi min zemmaren. Ggin manaya s ȓxaḍar nsen waḥeḏsen, ⁴ ttaren zzayneɣ s wuȓ nsen aḏ ƹawnen s ȓxir-a ȓmuminin ṣṣaliḥin iy iǧan ḏi ṯendint n Lquds. ⁵ Neccin neḏhec wami ggin manayenni. Ƹlaḥsab min ixes Arebbi sellmen ḏ amezwaru ȓxaḍar nsen i Siḏiṯneɣ u ƹaḏ sellmen-ṯ i neccin. ⁶ Amenni iy nweṣṣa Titus wami tuɣa ibḏa ijemmeƹ zi qbeȓ ȓxir n ṣṣaḏaqa-ya zzaywem, ȓexxu nweṣṣa-ṯ at ikemmeȓ. ⁷ Kenniw teggem zyada ḏi marra ṯimesȓayin, iƹni ḏi lʼiman nwem ḏ lxuṭba nwem ḏ ṯusna nwem ḏ mammec iy tḥawaȓem s wuȓawen nwem u ḏ ȓemḥibbeṯ nwem i neccin. Ammu iy ɣa ṯeggem mliḥ aṭṭas ḏi ȓxir n ṣṣaḏaqa-ya ƹaweḏ. ⁸ War qqareɣ ca manaya ḏ ijjen n ȓuṣiyeṯ; Nec rezzuɣ aḏ jarrbeɣ lḥaqiqa n ȓemḥibbeṯ nwem iƹni tcabbaheɣ min teggem kenniw ak mammec tḥawaȓen iwḏan nneɣni s wuȓawen nsen ḏi ȓxeḏmeṯ-a. ⁹ Aqa ṯessnem arḍa n Siḏiṯneɣ Ƹisa Lmasiḥ. Tuɣa netta ɣares kuȓci, walakin ƹlaḥsab neccin ismeḥ ḏi kuȓci manayenni bac aɣarneɣ yiȓi kuȓci s manayenni iy ḏi ismeḥ. ¹⁰ Ȓexxu nec aḏawem uceɣ array inu ḏi manaya, azzayes ṯawim nnfaƹ. Azeḏɣaṯ kenniw ig iṣeddqen ḏ imezwura; u kenniw ƹaweḏ ḏ imezwura iy ṯexsem aḏ teggem manayenni. ¹¹ Ȓexxu u labud aḏ tkemmȓem ccɣeȓ-a s min ṯzemmarem aḏ tṣeddqem. Iƹni min ṯebḏam s wuȓawen nwem, iwa ƹaweḏ kemmȓem-ṯ. ¹² Liʼanna bnaḏem meȓa s ȓxaḍar nnes, min ɣa iṣeddeq aḏ itwaqbeȓ. Walakin ƹlaḥsab min ɣares ḏ agȓa maci ƹlaḥsab min war ɣares. ¹³ Cuf, neccin ma nrezzu aḏ tucem fus i yiwḏan nneɣni, axawem ibesseȓ dqeȓ? Lla, nrezzu mkuȓ ijjen aɣares yiȓi ȓḥaqq nnes nican. ¹⁴ Ḏi ȓweqṯ-a ṯanita min ḏawem ɣa iceṭṭen ḏ agȓa aḏ infeƹ i min teḥḏajan niṯni. Menbaƹd, min ḏasen ɣa iceṭṭen aḏ infeƹ i min teḥḏajam kenniw. Ammu iy ɣa yiȓi ȓḥaqq nnes nican i mkuȓ ijjen. ¹⁵ Mammec iqqar Lkitab: "Wenni ismunen aṭṭas war ḏas itceṭṭi walu, wenni ismunen ḏrus war ḏas itxeṣṣi walu."

Ruxa, cin ḥed axdiƹaweḏ lmeqteƹa s wawaren ines, ameḵnaw itƹawaḏit i cin umdukkar iƹamas isiseǧen. Janaɣ aṯnƹawen mara ittu cin ḥajeṯ niɣ yanu ci slxata'. Mara yuqaƹ manaynni mumkin anseqsa "mani ṯufiḏ manaynni gi ṯiɣuri?"

Min ḏanaɣ ṯsermeḏ ṯiɣuri-ya x Siḏi Arebbi, x tbiƹaṯ ines, ḏ min itegg?

Min nremmeḏ x iwḏan, zagsen ixf nneɣ, zgi ṯɣuri-ya?

Min nremmeḏ zgi ṯɣuri-ya necnin ka kanisa?

Muxas atebqeḏ lḥaqiqa n Siḏi Arebbi zgi ṯɣuri-ya gi ṯuḏarṯ ineḵ simana-ya? Man rxeḏmeṯ ḏ rḥajeṯ itxeṣṣaḵ ateggeḏ?

Min iƹna wa migi atcarkeḏ lḥaqiqa zgi ṯɣuri qber ma anemserqa ṯwarat nedden? Ma ṯesneḏ cin iwḏan nedden i yazun aḏektacfen awar n Siḏi Arebbi gi application-na maṯalan amux necnin?

Mixef ididqarab ankemmer amserqi-ya, janex anqarer mermi anemserqa ṯwarat nedden ḏ min iƹna wa axan isehren amserqi idigguran.

Ntcajaƹ'ic atsejleḏ nuqat x min tenniḏ ateggeḏ ḏ atƹawḏeḏ atesriḏ i ṯiɣuri-ya gi riyam qber amserqi idigguran. Wenni igisgguran izemma aḏicarek ṯiɣuri ḏ tira nix ḏ awar mara cin ḥed waɣasci. Mixef naggur, awaḥiṯ anseqsa Siḏi Arebbi aḏaniƹawen.