1 «l7a9 d SSa7t ad awn ttinikh:hann yan iffaln imi n tgrort n wolli ar d srs ya9wlay gh mani yaDnin,imikr d omkhar a iga. 2 amma walli d ikchmn gh imi n tgrort,ghwann a igan amksa n wolli. 3 nttan a mi ittnorZom waDaf tiflot ar ssflidnt wolli i wawal ns.ar ya9ra i wolli lli ganin tins s ismawn nsnt issofgh tnt. 4 igh d issofgh olli lli ganin tins,ar asnt izggor Dfornt t achko ssnnt awal ns. 5 walaynni walli igan abrraniy or ra t Dfornt,is a gis rggwlnt achko or ssnnt awal n obrraniy. 6 lm3na ad inna ysn t yaso3,walaynni nttni or fhmn ma s a ysn ittini. 7 inna ysn dakh yaso3:«l7a9 d SSa7t ad awn ttinikh:nkkin a igan imi lli gh a kchmnt wolli. 8 kollo ghwilli yi d zwarnin imakrn d imkharn ad gan,walaynni olli or srsn ssfldnt. 9 nkkin a igan imi,wanna gigi ikchmn ra injm:ar ikchm ar ittffogh ar ittafa ma gh iffrd. 10 imikr or a d ittachka bla f a ittakwr ar i9rs ar in9a.amma nkkin ochkikh d f a darsn tili todrt,tg todrt ad tad ikmmln. 11 nkkin a igan amksa iSl7n,amksa iSl7n ar nn ittgga ikhf ns immt f wolli ns. 12 amma walli igan amksa n lkri,or igi amksa lli mi gant wolli tins,igh nn iZra ochn yochka d ar iffal olli irwl yamZ wochn olli lli iftts tnt. 13 amksa ad ar irggwl achko or igi abla win lkri,or a tt ittawi gh wolli. 14 walaynni hann nkkin a igan amksa iSl7n,ssnkh olli no issannt iyi wolli no, 15 ghmklli yi issn baba ad ssnkh ola nkkin baba,nkki jlikh todrt ino f wolli no. 16 llant dari wolli yaDnin or gint gh tgrort ad,illa flli a tnt d awikh ola nttnti ad ssfldnt i wawal ino ad gnt yat towrot TTafnt yan omksa. 17 nkki 3zzikh dar baba achko sbblkh todrt ino a stt id dakh rarkh. 18 or illi ma ra yi ikks todrt ino,walaynni lkhaTr ino as ra stt sbblkh.achko illa dari ladn a stt sbblkh,yili dari ladn a stt id dakh rarkh.mayad a f iyi yoSSa baba a t skrkh.
© Tachelhit Bible (text and audio): Call of Hope, Germany. Website: Call of Hope - https://call-of-hope.com
- Tous les droits des textes et fichiers audio pour la Bible en Tamazight appartiennent à Call of Hope – Allemagne. Utilisé avec permission.