1 غْ إسْ إزْوُورْ إخْلْقّْ رْبِّي إݣْنَّا دْ وَكَالْ. 2 إݣْ وَكَالْ لْخْلاَ،أُورْ ݣِيسْ إلِّي يَاتْ،دْلْنْتْ تِلاَّسْ إݣِّي نْ وَمَانْ دْرَنِينْ.أَرْ إتْكَّا رُّوحْ نْ رْبِّي فْ إݣِّي نْ وَمَانْ. 3 إنَّا رْبِّي:«أَتِّلِي تِفَاوْتْ» تِلِي نِيتْ تِفَاوْتْ، 4 يَنِّي رْبِّي تِفَاوْتْ تْفُولْكِي.إژْلِي إلْمَّا رْبِّي تِفَاوْتْ غْ تِلاَّسْ. 5 إݣْ رْبِّي سْ إسْمْ إتِفَاوْتْ أَزَالْ،إݣْ سْ إسْمْ إتِلاَّسْ إِضْ.تِلِي تَدْݣّْوَاتْ يِلِي زِيكّْ صْبَاحْ إݣْ لْحَالْ أَسّْ أَمْزْوَرُو.
6 إنَّا رْبِّي:«أَتِّلِي يَاتْ لْقُوبّْتْ غْ وَمَّاسْ نْ وَمَانْ.أَتّْژْلِي ݣْرْ وَمَانْ دْ وَمَانْ». 7 إسْكْرْ رْبِّي لْقُوبّْتْ أَنّْ،إژْلِي أَمَانْ لِّي لاَّنِينْ غْ دُّو لْقُوبّْتْ غْ وَمَانْ لِّي لاَّنِينْ غْ إݣِّي نْ لْقُوبّْتْ لِّي.إݣْ لْحَالْ غْمْكَانّْ. 8 إݣْ رْبِّي إلْقُوبّْتْ أَنّْ سْ إسْمْ إݣْنْوَانْ.تِلِي تَدْݣّْوَتْ يِلِي زِيكّْ صْبَاحْ،إݣْ لْحَالْ وِيسّْ سِينْ أُسَّانْ.
9 إنَّا رْبِّي:«أَدْ مُونّْ وَمَانْ لِّي لاَّنِينْ غْ دُّو إݣْنْوَانْ سْ يَاتْ تْسْݣَا،أَدّْ تْبَايّْنْ تَغَارْتْ».إݣْ لْحَالْ غْمْكَانّْ. 10 إݣْ رْبِّي سْ إسْمْ إتَغَارْتْ أَكَالْ،إݣْ إغِلِّيغْنّْ مُونّْ وَمَانْ لْبْحُورْ.يَنِّي رْبِّي مَيَانّْ إفُولْكِي. 11 إنَّا رْبِّي:«أَيْسْمْغِي وَكَالْ تَزْݣْزُوتْ:تُݣَا لِّي إسْكَارْنْ أَمُودْ،دْ أُصْغَارْ إطَّافْنْ لْغْلّْتْ أَرْ إسْكَارْ لْغْلاَّتْ زُونْدْ رّْهْضْ نْسْ،يِلِي ݣِيسْ وَمُودْ نْسْ غْ إݣِّي نْ وَكَالْ».إݣْ لْحَالْ غْمْكَانّْ. 12 إسْمْغِي وَكَالْ كْرَيْݣَاتّْ أَنَاوْ نْ تْزْݣْزُوتْ:تُݣَا لِّي إسْكَارْنْ أَمُودْ زُونْدْ أَنَاوْ نْسْ،دْ أُصْغَارْ لِّي إسْكَارْنْ لْغْلاَّتْ غْ إلاَّ وَمُودْ زُونْدْ رّْهْضْ نْسْ.يَنِّي رْبِّي مَيَانّْ إفُولْكِي. 13 تِلِي تَدْݣّْوَاتْ يِلِي زِيكّْ صْبَاحْ،إݣْ لْحَالْ وِيسّْ كْرَاضْ أُسَّانْ.
14 إنَّا رْبِّي:«أَدْ إلِينْتْ تِفَاوِينْ غْ لْقُوبّْتْ نْ إݣْنْوَانْ أَدْ ژْلِينْتْ ݣْرْ أُزَالْ دْ يِيضْ،ݣْنْتْ مَايْمَّالْنْ تِمِتَارْ دْ إزْمَازْ دْ أُسَّانْ دْ إسْݣَّاسْنْ. 15 ݣْنْتْ تِّفَاوِينْ غْ لْقُوبّْتْ نْ إݣْنْوَانْ أَدْ سُفُونْتْ إوَكَالْ».إݣْ لْحَالْ غْمْكَانّْ. 16 إسْكْرْ رْبِّي سْنَاتْ تِّفَاوِينْ مْقُّورْنِينْ:تِفَاوْتْ مْقُّورْنْ إسْكْرْتّْ أَتِّسّْفِيوْ إوْزَالْ،تِفَاوْتْ مْژِّيْنْ إسْكْرْتّْ أَتِّسّْفِيوْ إيِّيضْ،إسْكْرْ إتْرَانْ أُلاَ نْتّْنِي. 17 إݣْتْنْ رْبِّي غْ لْقُوبّْتْ نْ إݣْنْوَانْ أَدْ إسّْفِيوْنْ إوَكَالْ، 18 إسّْفِيوْنْ إوْزَالْ دْ يِيضْ،ژْلِينْ ݣْرْ تِفَاوْتْ تِّلاَّسْ.يَنِّي رْبِّي مَيَانّْ إفُولْكِي. 19 تِلِي تَدْݣّْوَاتْ يِلِي زِيكّْ صْبَاحْ،إݣْ لْحَالْ وِيسّْ كُّوژْ أُسَّانْ.
20 إنَّا رْبِّي:«أَدْ كْتُورْنْ وَمَانْ سْ كْرَيْݣَاتّْ لْمْخْلُقَّاتْ دّْرْنِينْ،إلِينْ وَيْلاَلْنْ أَرْ تَّيْلاَلْنْ غْ أُفْلاَّ نْ وَكَالْ غْ دُّو لْقُوبّْتْ نْ إݣْنْوَانْ». 21 إخْلْقّْ رْبِّي لَوْحَاشْ مْقُّورْنِينْ،دْ كْرَيْݣَاتّْ أَنَاوْ نْ لْمْخْلُقَّاتْ دّْرْنِينْ أَرْ تّْمُسُّونْتْ غْ وَمَانْ عْمّْرْنْ سْرْسْنْتْ،إخْلْقّْ كْرَيْݣَاتّْ أَنَاوْ نْ وَيْلاَلْنْ لِّي دَارْ لاَرْيَاشْ.يَانِّي رْبِّي مَيَانّْ إفُولْكِي. 22 إݣْ ݣِيسْنْ رْبِّي لْبَرَكَا إنَّايْسْنْ:«تَّرُويَاتْ،أَرْ تِّݣُوتْمْ تْعْمّْرْمْ أَمَانْ نْ لْبْحُورْ.تِݣُوتْمْ أَيَيْلاَلْنْ غْ إݣِّي نْ وَكَالْ». 23 تِلِي تَدْݣّْوَاتْ يِلِي زِيكّْ صْبَاحْ،إݣْ لْحَالْ وِيسّْ سْمُّوسْ أُسَّانْ.
24 إنَّا رْبِّي:«أَيْعْمّْرْ وَكَالْ سْ كْرَيْݣَاتّْ أَنَاوْ نْ لْمْخْلُقَّاتْ دّْرْنِينْ:غْ لْبْهَايْمْ،دْ إمْرَرَادْنْ،دْ كْرَيْݣَاتّْ أَنَاوْ نْ لَوْحَاشْ نْ وَكَالْ».إݣْ لْحَالْ غْمْكَانّْ. 25 إخْلْقّْ رْبِّي كْرَيْݣَاتّْ أَنَاوْ نْ لَوْحَاشْ نْ وَكَالْ،دْ كْرَيْݣَاتّْ أَنَاوْ نْ لْبْهَايْمْ،دْ كْرَيْݣَاتّْ أَنَاوْ نْ إمْرَرَادْنْ.يَنِّي رْبِّي مَيَانّْ إفُولْكِي.
Copyright © Call of Hope, Germany www.call-of-hope.com