1 يَسُوعْ نْتَّانْ يِوْرِّيدْ غْ وَسِيفْ نْ لُرْدُنْ إعْمّْرْ سْ رُّوحْ لْقُدُسْ،إزْوُورْ أَسْ رُّوحْ غْ لْخْلاَ، 2 إكّْنّْ ݣِيسْ سِينْ إدَ عْشْرِينْ نْ وَاسّْ أَرْتْ إتَّارْمْ إبْلِيسْ،لِّيغْ زْرِينْ أُسَّانْ أَنّْ أُورْ ݣِيسْنْ إشِّي يَاتْ،يَاغْتْ إلْمَّا لاَژّْ. 3 إنَّايْسْ إبْلِيسْ:«إغْ تْݣِيتْ يِوْسْ نْ رْبِّي،تِنِيتْ إوْژْرُو أَدْ أَيْݣْ أَغْرُومْ». 4 إوَاجْبْدْ يَسُوعْ إنَّايْسْ:«إتّيُرَا:أُورْدْ أَغْرُومْ كَا أَسْ إتْدّْرْ أُفْݣَانْ وَلاَيْنِّي أَرْ إتْدّْرْ سْ كْرَيْݣَاتّْ أَوَالْ نَّادْ إكَّانْ دَارْ رْبِّي». 5 إسَّاوْنْتْ إبْلِيسْ سْ يَانْ أُدْرَارْ يَتُّويْنْ،إمْلاَسْدْ كُلُّو تِݣْلْدَا نْ دُّونِيتْ غْ يَاتْ تَسَّاعْتْ. 6 إنَّايْسْ إبْلِيسْ:«لَحْكَامْ نْ تْݣْلْدَا أَدْ كُلُّوتْنْتْ دْ لْمَجْدْ نّْسْنْتْ رَادْ أَكْتْنْ فْكْخْ،أَشْكُو نْكِّينْ أَمِ تّْيَوْفْكَانْ أَرْتْنْ أَكَّاخْ إوَنَّا رِيخْ. 7 إغْ تْسْجْتّْ غْ لْݣْدَّامْ إنُو،مَيَادْ كُلُّوتْ رَا إݣْ وِينْكْ». 8 إوَاجْبْدْ يَسُوعْ إنَّايْسْ:«إتِّينّْ أَشِّيطَانْ،أَشْكُو إتّْيُرَا:سِيدِي رْبِّي بَابْ نُّونْ أَمِ تّْسْجَادْمْ،دْ نْتَّانْ وَحْدُوتْ أَدْ تّْعْبَادْمْ». 9 إزْوُورْ أَسْ إبْلِيسْ سْ أُورُشَلِيمْ،إسْبِيدّْتْ فْ إݣِّي نْ أُزُورْ نْ لْهَيْكَلْ،إنَّايْسْ:«إغْ تْݣِيتْ يِوْسْ نْ رْبِّي،تْلُوحْتْنّْ إخْفْ نْكْ غِّيدْ سْ إزْدَارْ، 10 أَشْكُو إتّْيُرَا:إسْ رَا يُّصُّو لْمَلاَيْكَا نْسْ أَكّْ ݣَبْلْنْتْ، 11 أَسِينْتْكْ فْ إفَاسّْنْ نْسْنْتْ أَدْ أُورْ إنْمُقُّورْ كْرَا نْ أُژْرُو دْ أُضَارْ نْكْ». 12 إوَاجْبْدْ يَسُوعْ إنَّايْسْ:«إنَّا وَرَّا نْ رْبِّي:أَدْ أُورْ تَّارْمّْ سِيدِي رْبِّي بَابْ نُّونْ». 13 لِّيغْ أَسْدْ إكَّا إبْلِيسْ كْرَيْݣَاتّْ أَرَّامْ،إفْلْتْ أَرْ أَزْمْزْ يَضْنِينْ.
14 يِوْرِّيدْ يَسُوعْ سْ تْمَزِيرْتْ نْ لْجَلِيلْ إعْمّْرْ سْ لْجْهْدْ نْ رُّوحْ لْقُدُسْ،أَوِينْدْ مْدّْنْ لَخْبَارْ نْسْ غْ لَمْوَضِيعْ أَنّْ أَسْ كُلُّو سُّتْلْنِينْ. 15 أَرْ إسّْلْمَادْ غْ إݣْرَاوْنْ نّْسْنْ،أَرْتْ كُلُّو تّْمْجَّادْنْ مْدّْنْ.
16 يَاشْكْدْ يَسُوعْ سْ تْمْدِينْتْ نْ نَّاصِرَا لِّيغْدْ إنْكْرْ.إكْشْمْ سْ أُݣْرَاوْ غْمْكْلِّي يَدْلِّي إسْكَارْ أَسّْ نْ سّْبْتْ،إنْكْرْ أَدّْ فْلاَّسْنْ إغْرْ كْرَا غْ وَرَّاتْنْ نْ رْبِّي، 17 فْكْنْ أَسْدْ أَرَّا نْ نَّبِي إشَعْيَاءْ.لِّيغْتْ إرْژْمْ إغْرْدْ فْلاَّسْنْ غِلِّيغْ إتّيُرَا: 18 «رُّوحْ نْ سِيدِي رْبِّي أَفْلِّي إلاَّنْ،إسْتِيِّي أَدْ تّبْشَّارْخْ دّْرَاوْشْ،يُوزْنِيِّيدْ أَدْ جِجِّيخْ وِلِّي مِي تْلاَّ تْرْژِي غْ أُلاَوْنْ،أَرْ تْبْرَّاحْخْ سْ أُنُّورْژْمْ إوِلِّي لاَّنِينْ غْ إسّْكْرَافْ،بْرّْحْ سْ إژْرِي إوِلِّي بُوكْضْنِينْ رْژْمْخْ إوِلِّي فْ إضْرْ لْبَاضْلْ. 19 أَرْ تّبْشَّارْخْ سْ أُسْݣَّاسْ لِّيغْ رَا يْفُوكُّو رْبِّي مْدّْنْ نْسْ». 20 إسْنُضُو أَرَّا لِّي يْفْكْتْ إوَلِّي إسْنِضِيفْنْ غْ أُݣْرَاوْ إݣَّاوْرْ.أَرْتْ كُلُّو سْمُوقُّولْنْ وِلِّي لاَّنِينْ غْ أُݣْرَاوْ. 21 إنْكْرْ إنَّايْسْنْ:«هَانّْ غَسَّادْ أَدّْ كْمّْلْنْ إوَلِيوْنْ أَدْ لِّي مِي تْسّْفْلْدْمْ». 22 أَرْ كُلُّو فْلاَّسْ أَكَّانْ وِلِّي حَضْرْنِينْ تُݣَّا عْدْلْنِينْ،أَرْ تّْعْجَّابْنْ غْ إوَلِيوْنْ فُولْكِنِينْ لِّيدْ تّفُّوغْنِينْ غْ إمِي نْسْ،أَرْ تِّنِينْ:«مَاخّْ أُورْدّْ يِوْسْ لِّي نْ يُوسُفْ أَيَادْ؟»
Copyright © Call of Hope, Germany www.call-of-hope.com