9 إسَاوْلْ سْ لْمْعْنَا أَدْ سْ كْرَا نْ مْدّْنْ لِّي تِّنِينِينْ دْ إخْفْ نْسْنْ إسْ ݣَانْ وِيدْ صْلْحْنِينْ،أُكَانْ حْݣْرْنْ وِيَّاضْ،إنَّايْسْنْ: 10 «غْلِينْ سِينْ مْدّْنْ سْ لْهَيْكَلْ أَدْ ژَّالّنْ،يَانْ ݣِيتْسْنْ إݣَا أَفَرِّسِيْ وَيَّاضْ إݣَا أَنْكَّاسْ. 11 إبْدّْ أُفَرِّسِيْ لِّي أَرْ إطْژَلاَّ دْ إخْفْ نْسْ إنَّا:«أَرْكْ تّْشْكَارْخْ أَرْبِّي،أَشْكُو أُورْ ݣِيخْ زُونْدْ مْدّْنْ يَضْنِينْ لِّي تَّكْرْنِينْ أَرْ تّفْغْنْ أَغَرَاسْ فْ وِيَّاضْ أَرْ تّْزْنُونْ، أُلاَ ݣِيخْ زُونْدْ أَنْكَّاسْ أَدْ! 12 أَرْ طَّژُومْخْ سْنَاتْ تّْوَالْ غْ إمَلاَسّْ،أَرْ كُلُّو تّْعْشَّارْخْ تِغْرَاضْ إنُو. 13 أَنْكَّاسْ لِّي نْتَّانْ،إبِيدّْنّْ غْ تُݣُّوݣْتْ أُورْ إژْضَارْ أَيَّالّ أَلّْنْ نْسْ سْ إݣْنْوَانْ،تّݣْرَاژْتْ فْ أَيْلِّي يْسْكْرْ أَرْ إتِّنِي:حْنُّو ݣِي أَرْبِّي،أَشْكُو لْمُودْنِبْ أَدْ ݣِيخْ! 14 أَرَاوْنْ تِّنِيخْ:غْوَادْ أَدّْ إݣّْزْنْ سْ تْݣْمِّي نْسْ إزْكَّاتْ رْبِّي أُورْدّْ غْوَانْ يَضْنِينْ.أَشْكُو كُولْ مَايْسِّمْغُورْنْ إخْفْ نْسْ أَرْ إتِّمْژِيْ دْ كُولْ مَايْژِمْژِيْنْ إخْفْ نْسْ أَرْ إتِّمْغُورْ».
15 أَوِينْ أَسْدْ كْرَا نْ إحْشْمِيْنْ مْژِّيْنِينْ أَفْلاَّسْنْ إسْرْسْ أَفُوسْ نْسْ.لِّيغْتْنْ ژْرَانْ إمْحْضَارْنْ أَرْتْنْ طّْژِينْ. 16 وَلاَيْنِّي يَسُوعْ إغْرَايَسْنْ إنَّايْسْنْ:«أَجَّاتْ تَّرْوَا أَدّْ دَرِي يَاشْكْنْ أَتّْنْ أُورْ تّحْصَارْمْ،أَشْكُو زُونْدْ غْوِيدْ أَمِ تْݣَا تْݣْلْدِيتْ نْ رْبِّي تِينْسْنْ. 17 لْحَقّْ أَدَاوْنْ تِّنِيخْ:وَنَّا أُورْ إقّبْلْنْ تَݣْلْدِيتْ نْ رْبِّي زُونْدْ أَرَّاوْ مْژِّيْنْ أُورَّا سّْرْسْ إكْشْمْ».
18 إسْقّْسَاتْ يَانْ غْ إرْيَّاسْنْ إنَّايْسْ:«مَرَادْ سْكْرْخْ أَسِيدِي إصْلْحْنْ أَدْ كُّوسُوخْ تُودْرْتْ إدُومْنْ؟» 19 إوَاجْبْدْ يَسُوعْ إنَّايْسْ:«مَاخّْ أَيِّ تِّنِيتْ وَادْ إصْلْحْنْ؟أُورْ إصْلْحْ يَانْ أَبْلاَ رْبِّي وَحْدُوتْ. 20 يَاكْ تْسّْنْتْ لُصِيَّاتْ نْ رْبِّي:أَدْ أُورْ تّْزْنُومْ،أَدْ أُورْ تْنْقَّامْ،أَدْ أُورْ تَّاكْرْمْ،أَدْ أُورْ تَكَّامْ تُݣَّا نْ ژُّورْ،طْهْلاَّيْتْ غْ لْوَالِدَيْنْ نُّونْ». 21 إنَّايْسْ:«خْتِّنِّي أَرْ كُلُّو سْرْسْنْتْ سْكَارْخْ غْمْنْ لِّيغْ مْژِّيْخْ». 22 لِّيغْ إسّْفْلْدْ يَسُوعْ إمَيَانْ،إنَّايْسْ:«تْخْصَّاكِينْ سُولْ يَاتْ تّْغَوْسَا:زَايْدْ زّْنْزْ كُلُّو كْرَا تْطَّافْتْ تْبْضُوتّْ فْ دّْرَاوْشْ،أَدَّارْكْ يِلِي لْكْنْزْ غْ إݣْنْوَانْ تَاشْكْدّْ تْضْفُورْتِيِّ». 23 لِّيغْ إسّْفْلْدْ وَلِّي إمَيَانْ تْطِيّْرْ أَسْ أَشْكُو إطَّافْ أَيّْدَا إݣُّوتْنْ. 24 لِّيغْتْ إژْرَا يَسُوعْ تْطِيّْرْ أَسْ إنَّايْسْ:«مْنْشْكْ أَسْ إشْقَّا أَيْكْشْمْ بُولَمّْوَالْ سْ تْݣْلْدِيتْ نْ رْبِّي! 25 إرْخَا سُولْ أَيْكْشْمْ أُورْعْمْ غْ تِيطّْ نْ تَسّْمِي فْ أَيْكْشْمْ بُولَمّْوَالْ سْ تْݣْلْدِيتْ نْ رْبِّي!» 26 نَّانْ أَسْ وِلِّي سّْفْلْدْنِينْ:«مَانْوَا زَا إژْضَارْنْ أَيْنْجْمْ؟» 27 إوَاجْبْدْ يَسُوعْ إنَّايْسْنْ:«أَيْلِّي مِي أُورْ إژْضَارْ بْنَادْمْ إژْضَارْ أَسْ رْبِّي».
28 إنَّايْسْ بُطْرُسْ:«هَيَّاخْ نْفْلْ كْرَيْݣَاتّْ تَّغَوْسَا نْضْفُورْكْ!» 29 إنَّايْسْنْ:«لْحَقّْ أَدَاوْنْ تِّنِيخْ،كُولْ مَانّْ إفْلْنْ كْرَا نْ تْݣْمِّي نْغْ لْوَلِدَايْنْ نْسْ نْغْ أَيْتْمَاسْ نْغْ تَمْغَرْتْ نْسْ نْغْ تَرْوَا نْسْ فْ سِّبّْتْ نْ تْݣْلْدِيتْ نْ رْبِّي، 30 رَا يَّامْژْ أُݣَّارْ نْ مْنَّاوْتْ تّْكَالْ نْ أَيْلِّينّْ إفْلْ غْ أُوزْمْزْ أَدْ،تِلِي دَارْسْ تُودْرْتْ إدُومْنْ غْ أُوزْمْزْ لِّي رَادّْ يَاشْكْ».
Copyright © Call of Hope, Germany www.call-of-hope.com