17 أَسّْ إزْوُرْنْ غْ أُسَّانْ نْ لْعِيدْ نْ أُرْخْصِيصْ،أُشْكْنْدْ إمْحْضَارْنْ دَارْ يَسُوعْ نَّانْ أَسْ:«مَنِي تْرِيتْ أَدْ أَكْنّ ݣِيسْ نِيوْجَادْ إمْنْسِي نْ لْعِيدْ نْ نّْجَا؟» 18 إنَّايْسْنْ:«زَيْدَاتْ سْ تْمْدِينْتْ دَارْ فْلاَّنْ تِنِيمْ أَسْ:إنَّايْكْ سِيدِي هَتِي لُوقّْتْ إنُو تْقْرّبْدْ.هَانّْ دَارْكْ أَغْ رَادْ زّرِيخْ لْعِيدْ نْ نّْجَا نْكِّي دْ إمْحْضَارْنْ إنُو». 19 سْكْرْنْ إمْحْضَارْنْ لِّي أَيْلِّي سَاسْنْ إنَّا يَسُوعْ إوْجَادْنْ إمْنْسِي نْ لْعِيدْ نْ نّْجَا.
20 تَدْݣَّاتْ،إݣَّاوْرْ يَسُوعْ أَيْشْتَّا نْتَّانْ دْ سِينْ دْ مْرَاوْ لِّي. 21 لِّيغْ أَشْتَّانْ إنَّايْسْنْ:«لْحَقّْ أَدَاوْنْ تِّنِيخْ،هَانّْ يَانْ ݣِيوْنْ رَايِّ إزّْنْزْ». 22 إغَمَا بَهْرَا ݣِيسْنْ لْحَالْ،نْكْرْنْ أَرْتْ سَقّسَانْ يَانْ سْ يَانْ،أَرْ أَسْ تِّنِينْ:«إزْدْ نْكِّينْ أَسِيدِي؟» 23 إوَاجْبْدْ إنَّايَسْنْ:«وَلِّينّ دِيدِي إݣَانْ أَفُوسْ نْسْ أَرْ دِيدِي إسّْضُوصْ غْ أُرُكُو أَدْ أَرَايِّ إزّْنْزْ! 24 يِوْسْ نْ أُفْݣَانْ إقَّانْدْ أَيْمّتْ غْمْكْلِّي فْلاَّسْ إتّْيُرَانْ غْ وَرَّاتْنْ نْ رْبِّي.وَلاَيْنِّي تْجْرَا غْ وَلِّي رَا إزّْنْزْ يِوْسْ نْ أُفْݣَانْ.يُوفْ أَسْ مْلاَدّْ إسْدْ أَكّْ أُورْ إلُولْ!» 25 إسَاوْلْدْ يَهُوذَا لِّي رَاتّْ إزّْنْزْ إنَّايْسْ:«إزْدْ نْكِّينْ أَسِيدِي؟»إوَاجْبْدْ يَسُوعْ إنَّايْسْ:«غْمْكْلِّي سْ تْنِّيتْ».
26 أَرْ نِيتْ شْتَّانْ،يَسِيدْ يَسُوعْ أَغْرُومْ إشْكْرْ فْلاَّسْ رْبِّي إبْضُوتْ إفْكْتْ إيّْمْحْضَارْنْ نْسْ،إنَّايَسْنْ:«أَمْژَاتْ،شَّاتْ،غْوَادْ أَيْݣَانْ دَّاتْ إنُو!» 27 يَسِيدْ لْكَاسْ إشْكْرْ فْلاَّسْ إفْكْ أَسْنْتْ إنَّايَسْنْ:«سُويَاتْنّ كُلُّو ݣِيسْ، 28 أَشْكُو غْوِيدْ أَيْݣَانْ إدَامّْنْ إنُو لِّي ݣَنِينْ وِينْ لْعَهْدْ لّْجْدِيدْ،إدَامّْنْ لِّي رَايْنّْغْلْ فْ سِّبّْتْ نْ كِݣَانْ دْ مْدّْنْ فْ أَدْ تّْغْفْرْنْ دّْنُوبْ نْسْنْ. 29 أَرَاوْنْ تِّنِيخْ:غْمْنْ غِلاَدْ أُورَّا سُّولْ سُوخْ غْ لْغْلّْتْ نْ وَضِيلْ أَرْ غَسَّانّْ لِّيغْ رَادْ دِيدُونْ سُوخْ تِينْ لّْجْدِيدْ غْ تْݣْلْدِيتْ نْ بَابَا». 30 أَرْ تْزْرِّيرْنْ أَرْ تَّالْغْنْ رْبِّي،حْمْدْنْ أَسْ،فّْغْنْدْ سْ أُوّرِيرْ نْ تَزِّيِّينْ.
Copyright © Call of Hope, Germany www.call-of-hope.com