32 أَوِينْنّ سِينْ إمْعْصَانْ يَضْنِينْ أَتّْنْ نّغْنْ أُلاَ نْتّْنِي دْ يَسُوعْ.
33 لِّيغْنّْ لْكْمْنْ غِلِّي مِي تِّنِينْ «تَفْنْقْلاَّ» صْلْبْنْتْ ݣِيسْ نْتَّانْ دْ إمْعْصَانْ أَنّْ،يَانْ غْ تْفَسِيتْ نْسْ دْ يَانْ غْ تْژْلْمَاطّْ نْسْ. 34 إسَاوْلْ يَسُوعْ:«غْفْرْ أَسْنْ أَ بَابَا،أَشْكُو أُورْ سّْنّْ مَادْ سْكَارْنْ».نْكْرْنْ بْضُونْ تِمْلْسَا نْسْ ݣْرَاتْسْنْ ݣْنِينّ فْلاَّسْنْتْ أَصْغَارْ.
35 بِيدّْنْ مْدّْنْ غِّينّْ أَرْ سْمُوقُّولْنْ،إلِينْ دِيدْسْنْ إرْيَّاسْنْ نّْسْنْ أُلاَ نْتّْنِي أَرْݣِيسْ ضّْصَّانْ أَرْ تِّنِينْ:«يَاكْ إجّْنْجْمْ وِيَّاضْ،مَافْ زَا أُورْ إجّْنْجْمْ إخْفْ نْسْ إغْ إݣَا لْمَسِيحْ لِّي يْسْتِي رْبِّي!» 36 أَرْݣِيسْ ضّْصَّانْ إعْسْكْرِينْ أُلاَ نْتْنِّي،أَرْ دَارْسْ تْدَّانْ أَرَاسْ أَكَّانْ لْخْلّ، 37 أَرَاسْ تِّنِينْ:«إغْ تْݣِيتْ أَݣْلِّيدْ نْ وُدَايْنْ،تْجّنْجْمْتْ إخْفْ نْكْ!» 38 يَاتْ تَلُّوحْتْ تّيَݣَالْ نِيتْ غْ إݣِّي نْ إخْفْ نْسْ إتّيُرَا ݣِيسْ سْ تِرَّا نْ أَيْتْ لْيُونَانْ تِّينْ رُّومْ تِّينْ أُدَايْنْ:«غْوَادْ أَيْݣَانْ أَݣْلِّيدْ نْ وُدَايْنْ!» 39 أَرْ إسَوَالْ يَانْ غْ إمْعْصَانْ لِّي دِيدْسْ تّيَݣَلْنِينْ سْ لْجْهَالْتْ أَرْ أَسْ إتِّنِي:«إغْدّ كْيِّينْ أَيْݣَانْ لْمَسِيحْ؟جّْنْجْمْ إخْفْ نْكْ تْجّْنْجْمْتْ أَخْ دِيدْكْ أُلاَ نْكّْنِي!» 40 أَرْتْ إطّْژِي غْوَانْ يَضْنِينْ إنَّايْسْ:«إزْدْ أُورْ أَكّْ تْكْصُوضْتْ رْبِّي،تْلِّيتْ نِيتْ غْ تْرْفُوفْنْتْ زُونْدْ نْتَّانْ؟ 41 نْكّْنِي هَتِي نْسْتَهْلاَّ لْحُوكْمْ أَدْ،أَشْكُو نْرُورَتِيدْ وَلاَيْنِّي أَرْݣَازْ أَدْ أُورْ إسْكْرْ كْرَا نْ ݣَارْ». 42 إنَّايْسْ إيَسُوعْ:«كْتِيِّيدْ أَسِيدِي إغْدْ تُوشْكِيتْ غْ تْݣْلْدِيتْ نْكْ». 43 إنَّايْسْ يَسُوعْ:«لْحَقّْ أَدَاكْ تِّنِيخْ غَسَّادْ رَا دِّيدِي تِلِيتْ غْ لْجْنْتْ».
44 لِّيغْ عْلاَيْنْ تُژُّومْتْ نْ وَاسّْ ضْرْنْتْ تِّلاَّسْ فْ تْمَزِيرْتْ أَنّْ كُلُّوتّْ أَرْ تَسَّاعْتْ تِيسّْ كْرَاطّْ. 45 تِلاَّسْ تَفُوكْتْ إبْضُو أُسْنْتْلْ نْ لْهَيْكَلْ غْ تُژُّومْتْ. 46 إكّْسْ يَسُوعْ يَاتْ تّغُويِّيتْ مْقُّورْنْ إنَّا:«وَا بَابَا ݣْرْ إفَّاسّْنْ نّْكْ أَغْ فْلْخْ رُّوحْ إنْوْ».لِّيغْ إنَّا مَيَادْ إفّْغْتْ رُّوحْ. 47 لِّيغْ إژْرَا أُمْزْوَارْ نْ لْعْسْكْرْ أَيْلِّي إجْرَانْ،أَرْ إتّْمْجَّادْ رْبِّي إنَّا:«أُورْ ݣِيسْ شّْكّْ إسْ إݣَا أُرْݣَازْ أَدْ وَادْ إصْلْحْنْ». 48 غْمْكَانّْ دْ مْدّْنْ لِّينّْ مُّونِّينْ أَدْ ژْرْنْ مَيَانّْ،لِّيغْ ژْرَانْ أَيْلِّي يْجْرَانْ، أَضُونْدْ أَرْ خْمُوشْنْ أَرْ سْغُيُّونْ. 49 أَمَّا إمْدُّكَّالْ نْ يَسُوعْ دْ تّْمْغَرِينْ لِّي تِيدْ ضْفُورْنِينْ غْمْنْ لْجَلِيلْ، بِيدّْنِينّْ غْ تُݣُّوݣْتْ أَرْدْ تَّنَّايْنْ مَيَادْ.
50 يَاشْكْدْ يَانْ غْ إمَسَايْنْ نْ أُݣْرَاوْ إسْمْ نْسْ يُوسُفْ،إݣْ يَانْ بْنَادْمْ إصْلْحْنْ يِكْصَاضْ رْبِّي. 51 نْتَّانْ أُورْدْ دِّيدْسْنْ إمْشُوشْكِي غْ رِّي نْسْنْ أُلاَ غْ أَيْلِّي سْكْرْنْ.إݣْ أُرْݣَازْ أَدْ أُرَّامَا لِّي إݣَانْ يَاتْ غْ لْمْدَايْنْ نْ وُدَايْنْ،إݣْ يَانْ غْ وِلِّي تّْقّْلْنِينْ سْ تْݣْلْدِيتْ نْ رْبِّي. 52 إدُّو إكْشْمْ سْ دَارْ بِيلاَطُسْ إضَالْبْ أَسْ دَّاتْ نْ يَسُوعْ. 53 إفْتُو إزُّوݣْزْتِّيدّ غْ صّْلِيبْ إسْلُولِّيتّ غْ يَانْ لْكْفْنْ نْ لاَّنْ،إݣْتِّينْ غْ يَانْ لْقْبْرْ إتّغْزَانْ غْ أُژْرُو.لْقّبرْ أَنّْ أُرْتَانّ جُّونْ ݣِيسْ إلِّي حْتَّا يَانْ. 54 إݣْ وَاسّْ أَنّْ أَسّْ لِّيغْ أَتِّوْجَادْنْ إوَاسّْ نْ سّْبْتْ لِّيدْ يَژْنْ. 55 مُونّْتْ دِّيدْسْ تْمْغَرِينْ لِّيدْ ضْفُورْنِينْ يَسُوعْ غْمْنْ لّجَلِيلْ،ژْرْنْتْ لْقّبرْ دْ مَامْنْكْ أَسْنّ ݣِيسْ تْلاَّ دَّاتْ نْ يَسُوعْ. 56 أَضُونْدّ إوْجَادْنْتْ تِفْلِينْ دْ تُجُّتِينْ.سُونْفُونْتْ غْ وَاسّْ نْ سّْبْتْ غْمْكْلِّي إلاَّنْ غْ شّْرْعْ.
Copyright © Call of Hope, Germany www.call-of-hope.com