3 إوَاجْبْدْ يَسُوعْ إنَّايْسْ:«لْحَقّْ دْ صَّاحْتْ أَدَاكْ تِّنِيخْ:أُورْ إلِّي كْرَا نْ يَانْ لِّي رَا يْژْرْ تْݣْلْدِيتْ نْ إݣْنْوَانْ إغْدْ أُورْ إلُولِي تِيسْ سّْنَاتْ تّْوَالْ غْ أُفْلاَّ». 4 إنَّايْسْ نِيقُودِيمُوسْ:«مَامْنْكْ أَسْ يُوفَا يَانْ أَدّْ إلاَلْ إغْ إشِيبْ؟مَاخّْ إسْ سُّولْ إژْضَارْ أَدَّاخْ يَضُو تِيسْ سّْنَاتْ تّْوَالْ سْ أُحْلِيݣْ نْ مَاسْ أَدّْ دَاخْ إلاَلْ؟» 5 إوَاجْبْدْ يَسُوعْ إنَّايْسْ:«لْحَقّْ دْ صَّاحْتْ أَدْ أَكْ تِّنِيخْ:إغْدْ أُورْ إلُولْ كْرَا نْ يَانْ غْ وَمَانْ دْ رُّوحْ أُورْ إژْضَارْ أَيْكْشْمْ سْ تْݣْلْدِيتْ نْ رْبِّي. 6 وَنَّادْ إلُولْنْ غْ دَّاتْ دَّاتْ أَيْݣَا،وَنَّادْ إلُولْنْ غْ رُّوحْ رُّوحْ أَيْݣَا. 7 أَدْ أُورْ تّعْجَّابْتْ إغَاكْ نِّيخْ:إقَّانْدْ أَدّْ تْلاَلْتْ غْ أُفْلاَّ. 8 أَضُو أَرْ إصْوَاضْ سْ إنَّا إرَا،أَرْ تْسّْفْلِيتّْ إلْحْسّْ نْسْ وَلاَيْنِّي أُورْ تْسّْنْتْ مَنِيدْ إكَّا أُلاَ مَنِي سْ إدَّا.غْمْكَانّْ أَيْتْݣَّا كُولْ مَادّْ إلُولْنْ غْ رُّوحْ».
9 إسْقّْسَاتْ نِيقُودِيمُوسْ:«مَامْنْكْ أَسْ رَايِّلِي مَيَادْ؟» 10 إوَاجْبْدْ يَسُوعْ إنَّايْسْ:«تْݣِيتْ أَسْلْمَادْ نْ أَيْتْ إسْرَائِيلْ سُولْ أُورْ تْسّْنْتْ مَيَادْ! 11 لْحَقّْ دْ صَّاحْتْ أَدَاكْ تِّنِيخْ:أُورْ أَنْسَوَالْ أَبْلاَ فْ أَيْلِّي نْسّْنْ،أَرْ نَكَّا تُݣَّا فْ أَيْلِّي نْژْرَا،وَلاَيْنِّي كْنِّي أُورْ تْقّْبْلْمْ تُݣَّا نْخْ. 12 إغْ أَيْوْنْ سَوَالْخْ فْ لِيمُورْ نْ وَكَالْ سُولْ أُورْ تُومْنْمْ،مَامْنْكْ زَا أَسْ رَا تَّامْنْمْ إغَايْوْنْ سَوَالْخْ فْ لِيمُورْ نْ إݣْنْوَانْ؟ 13 أُورْ جُّونْ إلِّي مَايْغْلِينْ سْ إݣْنْوَانْ أَبْلاَ وَلِّيدْ إݣُّوزْنْ غْ إݣْنْوَانْ أَتّْ إݣَانْ دْ يِوْسْ نْ أُفْݣَانْ لِّي إلاَّنْ غْ إݣْنْوَانْ.
14 أَشْكُو غْمْكْلِّي يُوݣْلْ مُوسَى تَبْنْكَالْتْ غْ لْخْلاَ أَسْدْ إقَّانْ أَيْتّْيَݣَالْ يِوْسْ نْ أُفْݣَانْ، 15 فْ أَدْ أُورْ إمّْتْ كْرَا سّْرْسْ يُومْنّْ وَلاَيْنِّي رَادَّارْسْ تِلِي تُودْرْتْ إدُومْنْ. 16 أَشْكُو غُونْشْكَادْ أَسْ بَهْرَا إرَا رْبِّي أَيْتْ دُّونِيتْ أَيْلِّيغْ فْلاَّسْنْ إسْبّْلْ يِوْسْ لِّي دَارْسْ إݣَانْ يَانْ،فْ أَدْ أُورْ إمّْتْ كْرَا سّْرْسْ يُومْنّْ،وَلاَيْنِّي رَا دَّارْسْ تِلِي تُودْرْتْ إدُومْنْ. 17 أَشْكُو أُورْدْ يُوزْنْ رْبِّي يِوْسْ سْ دُّونِيتْ فْ أَيُّوتْ لْحُوكْمْ فْ أَيْتْ دُّونِيتْ،وَلاَيْنِّي أَفْتِيدْ يُوزْنْ دْ أَتّْنْ سْرْسْ إجّْنْجْمْ. 18 وَنَّا سْرْسْ يُومْنّْ أُورَّا فْلاَّسْ إتُّوتْ لْحُوكْمْ،مَشّْ وَنَّا سْرْسْ أُورْ يُومْنّْ إسْ يَادْ فْلاَّسْ إتُّوتْ لْحُوكْمْ،أَشْكُو أُورْ يُومْنْ سْ يِوْسْ نْ رْبِّي لِّي دَارْسْ إݣَانْ يَانْ. 19 لْحُوكْمْ أَدْ إݣَاتْ:إسْدْ تُشْكَا تِفَاوْتْ سْ دُّونِيتْ،وَلاَيْنِّي مْدّْنْ رَانْ تِلاَّسْ أُݣَّارْ نْ تِفَاوْتْ أَشْكُو خْشْنّْ لَفْعَالْ نْسْنْ. 20 أَشْكُو كْرَا يْسْكَارْنْ ݣَارْ لَفْعَالْ أَرْ إتّْحَشَا تِفَاوْتْ،أُورَادْ إتَّاشْكَا سْ دَارْ تِفَاوْتْ فْ أَدْ أُورْ تّْيَوْفْضَاحْنْ لَفْعَالْ نْسْ. 21 وَلاَيْنِّي يَانْ إسْكَارْنْ لْحَقّْ أَرْدْ إتَّاشْكَا سْ دَارْ تِفَاوْتْ فَادّْ بَايّْنْ لَفْعَالْ نْسْ إزْدْ لْجْهْدْ نْ رْبِّي أَسْ تّْيَوْسْكَارْنْ».
Copyright © Call of Hope, Germany www.call-of-hope.com