15 إغْ دَرُونْ عْزِّيخْ أَرْ تْسْكَارْمْ سْ وَوَالْ إنُو. 16 هَيِّ رَادْ ضَالْبْخْ إبَابَا أَدَاوْنْدْ إفْكْ يَانْ أُمْعِيوْنْ يَضْنِينْ لِّي رَا بْدَّا دِيدُونْ يِلِي، 17 أَتّْ إݣَانْ دْ رُّوحْ نْ لْحَقّْ لِّي سْ أُورْ ژْضَارْنْ مْدّْنْ أَتّْ قْبْلْنْ،أَشْكُو أُورَاتْ تَّنَّايْنْ أُلاَ سّْنّْتْ.وَلاَيْنِّي كْنِّي تْسّْنْمْتْ أَشْكُو إلاَّ دِيدُونْ دْ إرَا سُّولْ ݣِيوْنْ يِلِي. 18 أُورَّاكّْنْ فْلْخْ زُونْدْ إݣِيݣِيلْنْ،رَادّْ سُولْ دَرُونْ وُرِّيخْ. 19 إغْ إكَّا لْحَالْ كْرَا إدْرُوسْنْ أُورَّايِّ سُولْ تَّنَّايْنْ أَيْتْ دُّونِيتْ،وَلاَيْنِّي كْنِّي رَايِّ تَّنَّايْمْ.نْكِّي دّرْخْ كْنِّي رَا تْدّْرْمْ. 20 غَسَّانّْ أَرَا تِّسَّانْمْ إسْ لِّيخْ غْ بَابَا،تِلِيمْ ݣِي،إلِيخْ ݣِيوْنْ. 21 وَنَّا دَارْ لُصِيَّاتْ إنُو أَرْ سْرْسْنْتْ إسْكَارْ نْتَّانْ أَدَّارْ عْزِّيخْ.دْ وَلِّي دَارْ عْزِّيخْ رَا يْعْزُّو دَارْ بَابَا،إعْزُّو دَرِي أُلاَ نْكِّي سْبَايّْنْخْ أَسْدْ إخْفْ إنُو».
22 إنَّايْسْ يَهُوذَا أُورْدْ لِسْخَرْيُوطْ:«مَايْجْرَانْ أَسِيدِي أَيْلِّيغْدْ نْكّْنِي أَمِ رَادّْ تْسْبَايّنْتْ إخْفْ نْكْ أُورْدْ إمْدّْنْ كُلُّوتْنْ؟» 23 إوَاجْبْدْ يَسُوعْ إنَّايْسْ:«وَنَّا دَارْ عْزِّيخْ أَرْ إسْكَارْ سْ وَوَالْ إنُو أَرْ إتْعْزُّو دَارْ بَابَا،دَارْسْ أَسْ رَانْدُّو نْزّغْ دِيدْسْ. 24 وَنَّا دَارْ أُورْ عْزِّيخْ أُورْ أَيْسْكَارْ سْ وَوَالْ إنُو.أَوَالْ أَدْ لِّي مِي تْسّْفْلْدْمْ أُورْ إݣِي وِنُو أَيْݣَا دْ وِينْ بَابَا لِّيِّيدْ يُوزْنّْ. 25 هَيِّ نِّيخْ أَوْنْ مَيَادْ مَاحْدّْ لِّيخْ سُولْ دِيدُونْ. 26 وَلاَيْنِّي رُّوحْ لْقُدُسْ لِّي إݣَانْ أَمْعِيوْنْ لِّي رَايْوْنْدْ يَازْنْ بَابَا سْ إسْمْ إنُو،رَايْوْنْ إمَّالْ كْرَيْݣَاتّْ تَغَوْسَا،أَرَاوْنْدْ إسِّكْتَايْ كْرَا سْ أَوْنْ نِّيخْ.
27 لْهْنَا أَدَاوْنْ فْلْخْ،لْهْنَا نُو أَدَاوْنْ فْكِيخْ،أُورْدّْ غْمْكْلِّيتْ أَكَّانْ مْدّْنْ أَدْ أَوْنْتْ فْكِيخْ.أَدْ أُورْ هُولْنْ أُلاَوْنْ نُّونْ أُلاَ تْكْصُوضْمْ.
Copyright © Call of Hope, Germany www.call-of-hope.com