1 غِلاَدْ أُورْ سُولْ إتُّوتْ كْرَا نْ لْحُوكْمْ فْ وِلِّي لاَّنِينْ غْ لْمَسِيحْ يَسُوعْ،أَرْ زِّݣِيزْنْ سْ رُّوحْ أُورْدّْ سْ دَّاتْ. 2 أَشْكُو شّْرْعْ نْ رُّوحْ لِّي يَكَّانْ تُودْرْتْ غْ لْمَسِيحْ يَسُوعْ إفْسِيِّ غْ أُسّْكْرْفْ نْ شّْرْعْ نْ لْمْعْصِيْتْ دْ لْمُوتْ. 3 أَشْكُو أَيْلِّي أُورْ إلْكْمْ شّْرْعْ فْ سِّبّْتْ نْ دَّاتْ لِّي إبِّينْ لْجْهْدْ نْسْ،إلْكْمْتْ رْبِّي لِّيغْدْ يُوزْنْ يِوْسْ فْ صِّيفْتْ نْ دَّاتْ نْ أُفْݣَانْ لِّي إعْصَانْ،إكْفّْرْ فْ لْمْعْصِيْتْ،يُوتْ لْحُوكْمْ فْ لْمْعْصِيْتْ غْ دَّاتْ، 4 فَادّْ ݣِينْخْ إكْمّْلْ رْبِّي مَا إصْلْحْنْ لِّي ݣِينْخْ إرَا شّْرْعْ،نْكّْنِي لِّي زِّݣِيزْنِينْ سْ رُّوحْ أُورْدّْ سْ دَّاتْ. 5 وِلِّي ضْفُورْنِينْ دَّاتْ هَانّْ أَيْلِّي إݣَانْ وِينْ دَّاتْ أَغْتّْ تَّوِينْ،وَلاَيْنِّي وِلِّي ضْفُورْنِينْ رُّوحْ هَانّْ أَيْلِّي إݣَانْ وِينْ رُّوحْ أَغْتّْ تَّوِينْ. 6 أَشْكُو يَانْ إضْفُورْنْ دَّاتْ أَرْتْنْ تَّوِي سْ لْمُوتْ،وَلاَيْنِّي يَانْ إضْفُورْنْ رُّوحْ أَرْتْنْ إتَّوِي سْ تُودْرْتْ دْ لْهْنَا. 7 يَانْ إضْفُورْنْ دَّاتْ أَيْݣَا دْ لْعْدُو نْ رْبِّي،أَشْكُو أُورْ أَيْسّْفْلِيدْ سْ شّْرْعْ نْ رْبِّي أُلاَ إژْضَارْ أَسْ. 8 وِلِّي ضْفُورْنِينْ دَّاتْ أُورْ ژْضَارْنْ أَدْ سّْرْضُونْ رْبِّي. 9 أَمَّا كْنِّي رُّوحْ أَغْتّْ تِوِيمْ أُورْدْ دَّاتْ،إغْ ݣِيوْنْ إزْدْغْ رُّوحْ نْ رْبِّي.وَلاَيْنِّي يَانْ دَارْ أُورْ إلِّي رُّوحْ نْ لْمَسِيحْ،هَانّْ أُورْ إݣِي وِينْ لْمَسِيحْ. 10 دْ إغْ ݣِيوْنْ إلاَّ لْمَسِيحْ،دَّاتْ نُّونْ رَا تّْمّْتْ فْ سِّبّْتْ نْ لْمْعْصِيْتْ،وَلاَيْنِّي رُّوحْ نْسْ إݣَايْوْنْ تُودْرْتْ أَشْكُو تّْيَوْزْكَّامْ. 11 إغْ ݣِيوْنْ إزْدْغْ رُّوحْ نْ رْبِّي لِّيدْ إسّْنْكْرْنْ يَسُوعْ غْ ݣْرْ إمْتِّيتْنْ،هَانّْ وَلِّيدْ إسّْنْكْرْنْ لْمَسِيحْ غْ ݣْرْ إمْتِّيتْنْ نْتَّانْ أَرَادّْ إرَارْ دَّاتْ نُّونْ لِّي إمُّوتْنْ سْ تُودْرْتْ سْ رُّوحْ نْسْ لِّي ݣِيوْنْ إزْدْغْنْ. 12 هْيَّ أَيَيْتْمَا أُورْ فْلاَّخْ إلِّي أَنْضْفُورْ دَّاتْ أَنْسْكَارْ سْ ݣَارْ شَّهَوَاتْ نْسْ. 13 أَشْكُو إغْ تْضْفُورْمْ ݣَارْ شَّهَوَاتْ نْ دَّاتْ رَا تّْمّْتْمْ غْ لْجِهْتْ نْ رُّوحْ،وَلاَيْنِّي إغْ أَتّݣَّامْ تّْمِي إݣَارْ لَفْعَالْ نْ دَّاتْ سْ رُّوحْ رَا تّْدّْرْمْ. 14 أَشْكُو وِلِّي مِي إزْݣُّورْ رُّوحْ نْ رْبِّي،نْتّْنِي أَيْݣَانْ تَرْوَا نْ رْبِّي. 15 أَشْكُو أُورْ تُومْژْمْ رُّوحْ لِّي رَاكّْنْ إݣْ دْ إسْمْݣَانْ إرَارْكْنْ سْ تْكْصَّاضْ،وَلاَيْنِّي أَتُّومْژْمْ دْ رُّوحْ لِّيكْنْ إݣَانْ دْ تَرْوَا نْ رْبِّي.رُّوحْ أَدْ أَسْ نَقّْرَا:«أَبَا،وَا بَابَاتْنْخْ». 16 رُّوحْ أَدْ نِيتْ أَيَّكَّانْ تُوݣَّا دْ لَرْوَاحْ نْخْ إسْ نْݣَا تَرْوَا نْ رْبِّي. 17 إغْ نْݣَا تَرْوَا نْ رْبِّي هْيَّ رَا نْكُّسُو لْبَرَكَاتْ نْسْ،نْكّْنِي دْ لْمَسِيحْ.إغْ أَدِيدْسْ نْتّْرْفُفُونْ هَانّْ رَا دِّيدْسْ نِلِي غْ لْمَجْدْ.
18 أَشْكُو حْقَّاقّْخْ إنْݣَاژْنْ نْ غِلاَدْ إسْ أُورْ ݣِينْ يَاتْ غْ أُمْنِيدْ نْ لْمَجْدْ لِّي رَادْ أَخْدْ إسْبَايّْنْ رْبِّي.
Copyright © Call of Hope, Germany www.call-of-hope.com