36 إسَّنَاتْ كُلُّو أَيَايْتْ إسْرَائِيلْ تْحْقَاقّْمْ إزْدْ يَسُوعْ أَدْ لِّي كْنِّي تْصْلْبْمْ،إسْتْ إݣَا رْبِّي دْ سِيدِيتْنْخْ إݣْتْ دْ لْمَسِيحْ».
37 لِّيغْ سّْفْلْدْنْ وِلِّينّْ حَضْرْنِينْ إوَوَالْ أَدْ،تّْݣْرَاژْتْنْ غْ أُلاَوْنْ نّْسْنْ،سْقّْسَانْ بُطْرُسْ دْ إرْقَّاصْنْ أَنّْ يَضْنِينْ نَّانْ أَسْنْ:«مَرَزَّا نْسْكْرْ أَيَيْتْمَاتْنْخْ؟» 38 إنَّايْسْنْ بُطْرُسْ:«أَضُيَادّْ سْ أُغَرَاسْ،إعْمّْدْ كْرَيْݣَاتّْ يَانْ ݣِتُونْ سْ إسْمْ نْ يَسُوعْ لْمَسِيحْ،أَدَاوْنْ إغْفْرْ رْبِّي دّْنُوبْ نُّونْ تَامْژْمْ تِكِّيتْ نْ رُّوحْ لْقُدُسْ، 39 أَشْكُو لْعَهْدْ وِنُّونْ أَيْݣَا دْ وِينْ تَرْوَا نُّونْ دْ وِلِّينّْ كُلُّو أَݣُّݣْنِينْ،دْ وِينْ كُولْ مَامِ إغْرَا رْبِّي سِيدِيتْنْخْ». 40 أَرْ سْرْسْنْ إسَوَالْ بُطْرُسْ سْ تُوݣْتّْ نْ إوَلِيوْنْ يَضْنِينْ يُصُّوتْنْ إزّْعْمْتْنْ إنَّايْسْنْ:«بْضُيَاتْ دْ تَسُوتْ أَدْ إكْنَانْ!» 41 إݣُوتْنْ وِلِّي قّْبْلْنِينْ أَوَالْ نْسْ سْ لْفْرْحْ،تّْعْمّْدْنْ،ݣْنْ وِلِّي أَسْنِينّْ سْمْدْنِينْ غْ وَاسّْ أَنّْ كْرَا نْ كْرَاضْ وَلْفِيوْنْ.
42 أَرْ بْدَّا سّْفْلِيدْنْ إوْلْمُودْ نْ إرْقَّاصْنْ،مُونّْ إلْعِبَدَا،أَرْ أَطَّانْ أَغْرُومْ،أَرْ طّْژَلاَّنْ. 43 أَرْ سْكَارْنْ إرْقَّاصْنْ لْمُعْجِزَاتْ تّْمِتَارْ ݣُّوتْنِينْ،كْشْمْنْتْ تْكْصَّاضْ كْرَيْݣَاتّْ يَانْ. 44 مُونّْ كُلُّو وِلِّي أُمْنِّينْ ݣْنْ يَانْ،مُونّْ كُلُّو إكْرَا دَارْسْنْ إلاَّنْ شْرْكْنْتْ. 45 أَرْ زّْنْزَانْ لْمْلاَكَاتْ نْسْنْ دْ أَيْلِّي كُلُّو طَّافْنْ أَرْتْنْ كُلُّو أَطَّانْ ݣْرَاتْسْنْ،أَرْ أَكَّانْ إكْرَيْݣَاتّْ يَانْ أَيْلِّي سْ إحْتَجَّا. 46 أَرْنّْ كُلُّو تّْمُونّْ كْرَيْݣَاتّْ أَسّْ غْ لْهَيْكَلْ ݣْنْ يَانْ.أَرْ أَطَّانْ أَغْرُومْ غْ تْݣْمَّا نْسْنْ،أَرْ شْتَّانْ تِرَامْ نْسْنْ سْ لْفْرْحْ،دْ وُولْ إصّْفَانْ، 47 أَرْ تّْسْبَّاحْنْ إرْبِّي،رْضُونْ كُلُّو فْلاَّسْنْ مْدّْنْ.أَرْنّْ إسّْمُودْ رْبِّي إلْكْنِيسَا كْرَيْݣَاتّْ أَسّْ وِلِّي نْجْمْنِينْ.
Copyright © Call of Hope, Germany www.call-of-hope.com