17 يَازْنْ بُولُسْ غْ مِيلِيتُسْ مَادّْ يَقّرَانْ إيّمْغَارْنْ نْ لْكْنِيسَة نْ أَفَسُسْ. 18 لِّيغْتِيدْ لْكْمْنْ إنَّايْسْنْ:«هَتِي تْسّْنْمْ مَامْنْكْ أَسْ دِيدُونْ زّْرِيخْ أُسّْفَانْ لِّي كِّيخْ غْ ݣْرَتُونْ،غْمْنْ أَسّْ إزْوُرْنْ لِّيغْدْ كْشْمْخْ سْ أَسِيَّا. 19 سَلاَخْ أَيْلِّي إݣَانْ وِينْ رْبِّي بْلاَ نْ تَضْنَّايْتْ،إمْطَّاوْنْ ݣُّوتْنِينْ أَسْ زّرِيخْ تَسَّاسِينْ فْ سِّبّْتْ نْ وُدَايْنْ لِّي فْلِّي تّمْشِوِرْنِينْ. 20 أُجُّونْ فْلاَّوْنْ حْضِيخْ كْرَا نْ وَوَالْ غْ تْلاَّ لْفَايْتّ أُورْ أَوْنْتْ مْلِيخْ،أَرْكُنْ سّْلْمَادْخْ غْ لْݣْدَّامْ نْ مْدّْنْ أُلاَ غْ تْݣْمَّا نُّونْ، 21 أَرْ أَقّرَاخْ إوْدَايْنْ أُلاَ أَيْتْ لْيُونَانْ أَدّْ أَضُونْ سْ دَارْ رْبِّي تُوبْنْ أَمْنّْ سِّيدِيتْنْخْ يَسُوعْ لْمَسِيحْ. 22 غِلاَدْ هَيِّ رَادْ دُّوخْ سْ أُورُشَلِيمْ أَشْكُو إزْوُرِيِّ سْرْسْ رُّوحْ لْقُدُسْ،أُورْ سّْنْخْ مَرَايِّ يْجْرُو غِّينّْ. 23 وَلاَيْنِّي رُّوحْ لْقُدُسْ أَرِيِّ إتّعْلاَمْ غْ كْرَيْݣَاتّْ تَمْدِينْتْ إسْ سّرِي قّلْنْتْ لْحْبُسَاتْ دْ تَسَّاسِينْ غِّينّْ. 24 مَشّْ أُورْ أَسْكَارْخْ لْحْسَابْ إيَّاتْ،أُلاَ تْغْلاَ دَرِي تُودْرْتْ إنُو،أَرْدْ سْكْرْخْ أَيْلِّي فْلِّي إلاَّنْ سْ لْفْرْحْ،كْمّلْخْ لْخْدْمْتْ لِّي أُومْژْخْ غْ دَارْ سِيدِيتْنْخْ يَسُوعْ،أَسْتّْ إݣَانْ دْ أَدْ أَكَّاخْ تُوݣَّا أَرْ تّبْشَّارْخْ سْ نّْعْمْتْ نْ رْبِّي. 25 هَتِي كِّيخْ كُلُّو دَرُونْ لِّيغْ أَكْنْ تّْبْشَّارْخْ سْ تْݣْلْدِيتْ نْ رْبِّي،غِلاَدْ سّْنْخْ إسُّولْ أُورَّا تّْژْرْمْ أُودْمْ إنُو. 26 مَيَادْ أَفْ رَادَاوْنْ فْكْخْ تُوݣَّا أَدْ غَسَّادْ إنِيخْ أَوْنْ:هَانّْ أُورْ سُولْ فْلِّي لِّينْ دّْنُوبْ نْ حْتَّا يَانْ، 27 أَشْكُو سَاوْلْخْ أَوْنْ فْ أَيْلِّي كُلُّو إرَا رْبِّي،أُورْ فْلاَّوْنْ حْضِيخْ يَاتْ. 28 غِلاَدْ ضُفَاتْ إخْفَاوْنْ نُّونْ تْسّْكْسَامْ سْ تُوّْرُوتْ كُلُّوتّْ لِّي فْكْنْ إݣَا رُّوحْ لْقُدُسْ دْ إمْكْسَاوْنْ،أَتّْكْسْمْ لْكْنِيسَة نْ رْبِّي لِّي إسْغَا سْ إدَامّْنْ نّْسْ. 29 أَشْكُو سّْنْخْ إغْ مُّوتْخْ إسْ رَادّْ كْشْمْنْ سْ ݣْرَتُونْ كْرَا نْ أُشَّانّْ شْقَّنِينْ أُرَّادْ حْنُّونْ غْ تُوّْرُوتْ. 30 ݣْرَتُونْ نِّيتْ أَغْ رَادّْ نْكْرْنْ كْرَا نْ مْدّْنْ لِّي رَا يْسّلْمَادْ أَوَالْ يُونْفْنْ إوْغَرَاسْ فَانّ لْدِينْ إمْحْضَارْنْ سْ دَارْسْنْ أَتّْنْ ضْفُورْنْ. 31 أَوَا أَوُّوزَاتْ،أَرْدْ تِّكْتَايْمْ إزْدْ إمْطَّاوْنْ أَسْ تُّصُّوخْ كْرَيْݣَاتّْ يَانْ غْ يِّيضْ دْ أُزَالْ،كْرَا نْ كْرَاضْ إسْݣَّاسْنْ أَيَادْ. 32 غِلاَدْ أَيَيْتْمَا فْلْخْكْنْ غْ ݣْرْ إفَاسّْنْ نْ رْبِّي دْ وَوَالْ نْ نّْعْمْتْ نْسْ لِّي إژْضَارْنْ أَكّْنْ إبْنُو إفْكْ أَوْنْ تَكَسِيتْ،كْنِّي أُلاَ كُلُّو وِلِّي ݣَنِينْ وِينْ رْبِّي. 33 هَانّْ أُجُّونْنّْ ݣِيخْ لَعْقّْلْ غْ نّْقْرْتْ أُلاَ أُورْغْ أُلاَ تِيمْلْسَا نْ يَانْ. 34 تْسّْنْمْ إزْدْ إفَاسّْنْ أَدْ أَسَادْ تّْرَرَاخْ أَيْلِّي حْتَجَّاخْ دْ أَيْلِّي حْتَجَّانْ إسْمُونّْ إنُو. 35 مْلْخْ أَوْنْ سْ أَيْلِّي كُلُّو سْكَارْخْ نْ تَوُّرِي إسْ إخْصَّا أَنْكِّيتْ تَكْرَّايْتْ أَرْ نْتَّاوْسْ إدّْرَاوْشْ،أَرْدْ نْتِّكْتَايْ أَوَالْ نْ سِيدِيتْنْخْ يَسُوعْ لِّي يْنَّانْ:أَسْعْدِيْ أَيْݣَا وَلِّي إَكَّانْ أُݣَّارْ نْ وَلِّي إتَّامْژْنْ». 36 لِّيغْ أَسْنْ إنَّا مَيَادْ،إرْكْعَا دِيدْسْنْ فْ إفَادّْنْ نْسْ إژَّالّْ. 37 أَرْ كُلُّو إلْمَّا أَلاَّنْ أَرْ تْسْلاَّمْنْ دْ بُولُسْ أَرَاسْ تّْسُدُونّْ. 38 إغَمَا ݣِيسْنْ لْحَالْ،دْ أَنِّيتْ بَهْرَا ݣِيسْنْ إغَمَانْ دْ وَوَالْ لِّي سَاسْنْ إنَّا:«غْمْنْ غَسَّادْ أُورْ سُولْ رَا تّْژْرْمْ أُودْمْ إنُو».مُونّْ إلْمَّا دِيدْسْ أَرْ دَارْ تَنَاوْتْ.
Copyright © Call of Hope, Germany www.call-of-hope.com