19 أَدْ أُورْ تْسّْمُونْمْ لْكْنُوزْ غْ إݣِّي نْ وَكَالْ لِّيغْ أَتْنْ تْشْتَّا تُوّْكَّا دْ تَنِيݣْتْ،دْ غِلِّيغْ أَنّْ سْرْسْنْ كَّاتْنْ إمْخَّارْنْ نّْقَابْ أَكْرْنْتْنْ. 20 وَلاَيْنِّي سّْمُنَاتْنّْ لْكْنُوزْ نُّونْ غْ إݣْنْوَانْ،غِلِّيغْ أُورْ تْلِّي تُوّْكَّا أُلاَ تَنِيݣْتْ مَتّْنْ إشْتَّانْ،أُلاَ لاَّنْ ݣِيسْ إمْخَّارْنْ لِّي رَانّْ سْرْسْنْ يُوتْ نّْقَابْ أَكُرْنْتْنْ. 21 أَشْكُو إنَّاغْنّْ إلاَّ لْكْنْزْ نْكْ أَغْ رَانّْ يِلِي وُولْ نْكْ أُلاَ نْتَّانْ. 22 تِيطّْ أَيْݣَانْ لْقّْنْدِيلْ نْ دَّاتْ.إغْ تْݣَا تِيطّْ نْكْ تِينْ وَفُولْكِي،هَانّْ دَّاتْ نْكْ رَا كُلُّو تِسّْفَاوْ. 23 إغْ تْݣَا تِيطّْ نْكْ تِينْ ݣَارْ،هَانّْ دَّاتْ نْكْ رَا كُلُّو تِلاَّسْ.إغْ إلْمَّا تْݣَا تِفَاوْتْ لِّي ݣِيكْ إلاَّنْ تِلاَّسْ،سْمْدْنْتْ تِلاَّسْ إتِيَّاضْ.
24 أُورْ إژْضَارْ يَانْ أَيْݣْ إسْمْݣْ إسِينْ إدْ سِيدِيسْ،أَشْكُو إمَّا أَيْحَشَا يَانْ إعْزُّو دَارْسْ وَيَّاضْ،نْغْ بْدَّا إضْعَا يَانْ إحْݣْرْ وَيَّاضْ.أُورْ تْژْضَارْمْ أَتّْݣْمْ إسْمْݣَانْ نْ رْبِّي دْ وِينْ لْمَالْ غْ يَانْ ضُّورْ. 25 مَيَادْ أَفْ أَيْوْنْ تِّنِيخْ:أَدْ أُورْ تَحْلْمْ غْ تُودْرْتْ نُّونْ تَسِيمْ لْهْمّْ إمَارَا ݣِّيسْ تْشْتَّامْ دْ مَارَا ݣِّيسْ تْسَّامْ،أُلاَ تُوسِيمْ لْهْمّْ إمَارَا تّْلْسَّامْ إدَّاتْ نُّونْ.مَاخّْ أُورْ تُوفْ تُودْرْتْ مَتْشَا تَافْ دَّاتْ تِمْلْسَا؟ 26 سْمُقّْلاَتْ غْ وَيْلاَلْنْ نْ إݣْنْوَانْ،أُورْ أَكّْرْزْنْ أُورْ أَمْݣّْرْنْ،أُلاَ أَرْ سّْمُونّْ لْغْلاَّتْ سْ إحُنَا،وَلاَيْنِّي بَابَاتُونْ لِّي إلاَّنْ غْ إݣْنْوَانْ إݣَبْلْتْنْ سْ مَادْ شْتَّانْ.مَاخّْ كْنِّي أُورْتْنْ تُوفْمْ سْ كِݣَانْ؟ 27 مَانْوَا ݣِتُونْ إژْضَارْنْ إغْ يُوسِي لْهْمّْ أَدّْ إزَايْدْ يَانْ إغِيلْ إتِدِّي نْسْ؟ 28 مَافْ زَا تُسِيمْ لْهْمّْ إتْمْلْسَا؟سْمُقّْلاَتْ غْ إجْدِّيݣْنْ نْ قَوْشْ غْ إݣْرَانْ مَامْنْكْ أَسْ أَتِّمْغُورْنْ،أُورْ أَشْقّْلْنْ أُورْ أَژْطَّانْ. 29 وَلاَيْنِّي أَرَاوْنْ تِّنِيخْ:حْتَّا سُلَيْمَانْ غْ تْمُّغْرَا نْسْ كُلُّوتْنْتْ أُورْ إلْسِي غْمْكْلِّي إلْسَا يَانْ ݣِيتْسْنْ. 30 إغْ أَزَا إسّْلْسَا رْبِّي تُݣَا لِّي إتِّلِينْ غَسَّادْ غْ إݣْرَانْ أَزْكَّا تْضْرْنّْ غْ أُفَرْنُو سْ غْمْكَادْ،مَاخّْ أُورْ إژْضَارْ أَكّْنْ إسّْلْسْ أَوِلِّي مِي إدْرُوسْ لِيمَانْ؟ 31 أَدْ أُورْ تَّسِيمْ لْهْمّْ أَرْ تِّنِيمْ:مَارَا نْشّْ؟مَارَا نْسُو؟مَارَا نْلْسْ؟ 32 أَشْكُو مَيَادْ كَا أَفْ أَكُلُّو تِّزِّيلْنْ لْݣْنُوسْ،دْ بَابَاتُونْ لِّي إلاَّنْ غْ إݣْنْوَانْ إسّْنْ إسْ تْلْكْمّْ فْ مَيَادْ كُلُّوتْ. 33 وَلاَيْنِّي سِݣِّلاَتْ زْوَارْ أَيْلِّي إݣَانْ وِينْ تْݣْلْدِيتْ نْ رْبِّي دْ لْحَقّْ نْسْ،تِغَوْسِوِينْ أَدْ كُلُّوتْنْتْ رَادْ أَوْنْتْنْتْنّْ إسْمْدْ. 34 أَدْ أُورْ تَسِيمْ لْهْمّْ إوْزْكَّا أَشْكُو أَزْكَّا رَا يَّسِي لْهْمّْ نْسْ،كْرَيْݣَاتّْ أَسّْ إلاَّ سْ تْمَّرَا نْسْ.
Copyright © Call of Hope, Germany www.call-of-hope.com