11 هْيَّ إكْتَيَادّ إزْدْ لْݣْنُوسْ أَتّݣَامْ سْ لَصْلْ،أَرْكْنْ تّنْعَاتْنْ وِلِّي خْتْنِّينْ سْ وِلِّي أُورْ خْتْنِّينْ مْقَّارْ تْݣَا لْخْتَانْتْ أَيْلِّي يْسْكْرْ بْنَادْمْ غْ دَّاتْ نْسْ سْ أُفُوسْ نْسْ، 12 إكْتَيَادّ إسْتِّينْ تْكَّامْ غَكُدَانّ أُورْ تْسّْنْمْ لْمَسِيحْ،تْݣْمْ إبْرَّانِيْنْ فْ أَيْتْ إسْرَائِيلْ،أُورْ تْسّْنْمْ يَاتْ فْ إدْ لْعَهْدْ لِّي سَاسْنْ إقَّاوْلْ رْبِّي،أُورْ دَرُونْ كْرَا نْ رّْجَا غْ دُّونِيتْ أُلاَ تْسّْنْمْ رْبِّي. 13 وَلاَيْنِّي غِلاَدْ غْ تْݣَامْ وِينْ لْمَسِيحْ يَسُوعْ،كْنِّي لِّينّْ أَݣُّݣْنِينْ غَادْ إزْرِينْ فْ رْبِّي،تُورِّيمْ تْݣْمْ وِلِّينّ سْرْسْ أَكْمُورْنِينْ سْ إدَامّْنْ نْ لْمَسِيحْ. 14 أَشْكُو لْمَسِيحْ سْ إخْفْ نْسْ أَيْݣَانْ لْهْنَا نْخْ،إݣْ وَلِّي إݣَانْ أُدَايْنْ دْ لْݣْنُوسْ دْ يَانْ،إخْلُو أَغْرَابْ نْ لْعْدَاوْتْ لِّيتْنْ إبْضَانْ. 15 إسِتِّي لُصِيَّاتْ نْ شّْرْعْ دْ لْفَرَايْضْ نْسْ سْ لْمُوتْ نْسْ،أَݣِّيسْ ݣْنْ أُدَايْنْ دْ لْݣْنُوسْ يَانْ ݣْنْ وِينْ لّْجْدِيدْ،غْمْكَانّْ أَسْ رَا إسْكْرْ لْهْنَا غْ ݣْرَاتْسْنْ، 16 إصْمْصِلِيحْتْنْ دْ رْبِّي ݣْنْ زُونْدْ يَاتْ دَّاتْ،إسِتِّي لْعْدَاوْتْ غْ ݣْرَاتْسْنْ سْ لْمُوتْ نْسْ فْ إݣِّي نْ صّْلِيبْ. 17 يَاشْكْدْ إبْشّرْكُنْ سْ لْهْنَا،كْنِّي لِّينّْ أَݣُّݣْنِينْ فْ رْبِّي أُلاَ كْنِّي لِّي سْرْسْ أَكْمُورْنِينْ. 18 أَشْكُو لْمَسِيحْ أَسْ نْژْضَارْ كُلُّو يَاخْ أَنّْ نَكْمُورْ سْ دَارْ بَابَاتْنْخْ سْ يَانْ رُّوحْ. 19 هْيَّ أُورْ سُولْ تْݣِيمْ إمْزَّانْ دْ إبْرَّانِيْنْ،وَلاَيْنِّي غِلاَدْ تْݣَامْ يَانْ دْ أَيْتْ رْبِّي،تْݣْمْ غْ أَيْتْ تْݣْمِّي نْسْ، 20 تّْبْنُومْ فْ لّْسَاسْ نْ إرْقَّاصْنْ دْ لَنْبِيَّا،إݣْ يَسُوعْ لْمَسِيحْ سْ إخْفْ نْسْ أَژْرُو نْ تْغْمْرْتْ 21 لِّي سْ كُلُّو إتّْغِي لْبْنِي أَرْ إتّْزَيَّادْ أَيْݣْ لْهَيْكَلْ نْ رْبِّي. 22 نْتَّانْ أَكّْنْ كُلُّو إبْنَانْ أُلاَ كْنِّي أَشْكُو تْݣَامْ وِينْسْ،أَتّْݣْمْ تِݣْمِّي نْ رْبِّي لِّيغْ أَيْزْدّْغْ سْ رُّوحْ نْسْ.
Copyright © Call of Hope, Germany www.call-of-hope.com