8 حْمْدَاتْ إسِيدِي رْبِّي أَرْ تَاقْرَامْ إيْسْمْ نْسْ،مْلاَتْ إلْݣْنُوسْ أَيْلِّي كُلُّو سْكْرْنْ. 9 سْلّْغَايْتْ أَسْ تَلّْغَاتْ نْ تُولْغَا،سَوَلاَتْ فْ لَعَجَايْبْ نْسْ لِّي كُلُّو سْكْرْنْ. 10 تّْعْنَّايْتْ سْ إسْمْ نْسْ إݣَانْ لْقُدُّوسْ،فْرْحَاتْ أَوْلاَوْنْ نْ وِلِّي سِݣِّيلْنِينْ سِيدِي رْبِّي. 11 سِݣِّيلاَتْ سِيدِي رْبِّي دْ أُدْوَاسْ نْسْ،سِݣِّيلاَتْ بْدَّا أُودْمْ نْسْ أَتّْنْ تْنْمَقَّارْمْ، 12 تِّكْتَيَادّْ لَعَجَايْبْ نْسْ لِّي سْكْرْنْ،تِّكْتَيَادّْ لْمُعْجِزَاتْ نْسْ دْ لَحْكَامْ لِّي فْ إسَاوْلْ. 13 وَا أَمُودْ نْ إسْرَائِيلْ لِّي إݣَانْ إسْمْݣْ نْسْ،وَا تَرْوَا نْ يَعْقُوبْ لِّي سْتِينْ، 14 هَانّْ أَيْݣَا دْ سِيدِي رْبِّي بَابْ نْخْ،لَحْكَامْ نْسْ كْتُورْنْ كُلُّو أَكَالْ. 15 تِّكْتَيَادّْ بْدَّا لْعَهْدْ نْسْ،تِّكْتَيَادّْ أَيْلِّي سْ إقَّاوْلْ إلُلُوفْ نْ تَسُوتِينْ، 16 لْعَهْدْ لِّي إبِّي دْ إبْرَاهِيمْ،دْ تْݣَلِّيتْ لِّي إݣُّولّْ إيْسْحَقْ. 17 لْعَهْدْ لِّي إسْبِيدّْ دْ يَعْقُوبْ إݣْتْ دْ لْفْرْضْ،إݣْتْ دْ لْعَهْدْ إدَاوْمْنْ إيْسْرَائِيلْ. 18 إنَّايْسْ:كِيّْ أَمِي رَادْ فْكْخْ أَكَالْ نْ كَنْعَانْ لِّي يَاوْنْدْ تَّاغْ سْ تْصْغَارْتْ لِّي رَاتْكُّسُومْ. 19 لِّيغْ سُولْ تْدْرُوسْمْ تْحُدُّومْ،أُورْ تْݣِيمْ أَبْلاَ يَانْ مْنَّاوْ إمْزَّانْ غِّينّْ، 20 أَرْ تّْرْحَالْمْ غْ تْمْتِّي سْ تَيَّاضْ،تْمَّاتِّيمْ غْ تْݣْلْدِيتْ أَدْ سْ تَيَّاضْ. 21 أُورْ يُجِّي يَانْ أَفْلاَّسْنْ إفّْغْ أَغَرَاسْ،إسْ أَفْلاَّسْنْ طّْژِينْ إݣْلْدَانْ. 22 أَنّْ أُورْ تْݣْمْ أَفُوسْ سْ وِلِّي سْتِيخْ،أَدْ أُورْ تْضْرُّومْ لَنْبِيَّا نُو.
23 سْلّْغَايْتْ إسِيدِي رْبِّي أَيَايْتْ وَكَالْ كُلُّوكْنْ،تّْرْزَّفَاتْ سْ لَخْبَارْ نْ نّْجَا نْسْ أَسّْ أَرْ أَسّْ. 24 سَوَلاَتْ فْ لْمَجْدْ نْسْ إتْمْتّْوِينْ،سَوَلاَتْ فْ لَعَجَايْبْ نْسْ إلْݣْنُوسْ. 25 أَشْكُو سِيدِي رْبِّي إمْقُّورْ إݣَا وِينْ تُولْغَا ݣُّوتْنِينْ،إلاَّ فْلاَّخْ أَتّْ نِكْصَاضْ أُݣَّارْ نْ إدْ رْبِّي يَضْنِينْ. 26 أَشْكُو إدْ رْبِّي نْ لْݣْنُوسْ أُورْ ݣِينْ أَبْلاَ لَصْنَامْ،أَمَّا سِيدِي رْبِّي نْتَّانْ أَيْسْكْرْنْ إݣْنْوَانْ. 27 أَكْلاَلُو دْ تْمُّغْرَا لاَّنْ غْ أُمْنِيدْ نْسْ،أَدْوَاسْ دْ لْفْرْحْ أَيْلاَّنْ غْ لْمَقَامْ نْسْنْ، 28 تّْعْبَدَاتْ سِيدِي رْبِّي أَتِقْبِلِينْ نْ لْݣْنُوسْ،سَوَلاَتْ فْ لْمَجْدْ نْسْ دْ أُدْوَاسْ نْسْ، 29 حْمْدَاتْ سِيدِي رْبِّي أَرْ تّْمْجَّادْمْ إسْمْ نْسْ.أَوِيَادّْ أَسْكْمُورْ تَاشْكْمْدْ سْ أُمْنِيدْ نْسْ،سْجْدَاتْ إسِيدِي رْبِّي غْ أُكْلاَلُو نْ لْقَدَاسَة نْسْ. 30 إكْصَاضْ أَتّْ أَيَايْتْ وَكَالْ كُلُّوكْنْ،نْتَّانْ أَيْسَسْتْوَانْ أَكَالْ أُورْ أَيْتّْمْدُودِيْ. 31 فْرْحَاتْ أَيْݣْنْوَانْ أَرْ تّْزْرِّيرْمْ سْ لْفْرْحْ أَيَكَالْ،تّْبْرَّحَاتْ غْ ݣْرْ لْݣْنُوسْ أَرَاسْنْ تِّنِيمْ:«هَانّْ سِيدِي رْبِّي إݣَا أَݣْلِّيدْ». 32 أَدّْرَاتّْ أَيِيلّْ دْ أَيْلِّي ݣِيوْنْ إلاَّنْ،فْرْحَاتْ أَسْ أَيْݣْرَانْ دْ مَا ݣِّيوْنْ إلاَّنْ، 33 تِزِي أَنّْ رَادْ سْلّْغَانْ وَدَّاݣْنْ نْ تَݣَانْتْ غْ أُمْنِيدْ نْ سِيدِي رْبِّي،أَشْكُو يُشْكَادْ أَيُّوتْ لْحُوكْمْ فْ وَكَالْ. 34 شْكْرَاتْ سِيدِي رْبِّي أَشْكُو إݣَا وَادْ إصْلْحْنْ،أَشْكُو تَايّْرِي نْسْ أُورْ إتْبْدَّالْنْ تْݣَا تِينْ وَبَدَانْ، 35 إنَاتْ أَسْ:«فُكُّيَاخْ أَبَابْ نْخْ أَمْجّْنْجْمْ نَّاخْ،سْمُونْ أَخْدْ غْ ݣْرْ لْݣْنُوسْ تْفُكُّوتْ أَخْ ݣِيسْنْ أَنْتَّالْغْ إسْمْ نْكْ إقْدّْسْنْ أَرْ نْتّْعْنَّا سْ تُلْغَا نْكْ. 36 تُولْغَا إسِيدِي رْبِّي بَابْ نْ إسْرَائِيلْ غْمْنْ غَادْ إزْرِينْ أَرْ تِينْ وَبَدَانْ».
وَاجْبْنْدْ كُلُّو مْدّْنْ نْسْ نَّانْ أَسْ:«آمِينْ» سْبّْحْنْ إسِيدِي رْبِّي.
Copyright © Call of Hope, Germany www.call-of-hope.com