14 زُونْدْ أُكَانْ يَانْ أُرْݣَازْ إرَا أَيْمُّدُّو،إغْرْ إيْسْمْݣَانْ نْسْ إفْلْ أَسْنْ أَيّْدَا نْسْ غْ ݣْرْ إفَاسّْنْ نّْسْنْ، 15 إفْكْ إيَّانْ ݣِيتْسْنْ سْمُّوسْتْ لُوزْنَاتْ نْ وُورْغْ،إفْكْ إوَيَّاضْ سْنَاتْ،إفْكْ إوَيَّاضْ يَضْنِينْ يَاتْ،كْرَيْݣَاتّْ يَانْ دْ أَيْلِّي مِي إژْضَارْ.إنْكْرْ إلْمَّا إمُّدُّو. 16 إدُّو وَلِّي مِي إفْكَا سْمُّوسْتْ لُوزْنَاتْ نْ وُورْغْ،إزّْنْزْ إسْغْ سْرْسْنْتْ،يَوِيدْ صَحَا نْ سْمُّوسْتْ يَضْنِينْ فْ أُفْلاَّ. 17 غْمْكَانّْ دْ وَلِّي يُومْژْنْ سْنَاتْ لُوزْنَاتْ أُلاَ نْتَّانْ،إسْكْرْ صَحَا نْ سْنَاتْ يَضْنِينْ. 18 وَلاَيْنِّي وَلِّي يُومْژْنْ يَاتْ،إدَّا إغْزْ غْ وَكَالْ إمْضْلْنّْ ݣِيسْ لْمَالْ نْ سِيدِيسْ. 19 زْرِينْ إسْݣَّاسْنْ،هَادْ سِيدِيسْ نْ إسْمْݣَانْ لِّي يُوضَادْ إنْحِسِيبْ دِيدْسْنْ. 20 يَاشْكْدْ وَلِّي يُومْژْنْ سْمُّوسْتْ لُوزْنَاتْ نْ وُورْغْ،يَوِيدْ سْمُّوسْتْ لُوزْنَاتْ يَضْنِينْ،إنَّايْسْ:هَا سْمُّوسْتْ لُوزْنَاتْ لِّيِّ تْفْكِيتْ أَسِيدِي،هَا سْمُّوسْتْ يَضْنِينْ لِّيِّ صَحَنِينْ فْ أُفْلاَّ نّسْنْتْ. 21 إنَّايْسْ سِيدِيسْ:إفُولْكِي ݣِيكْ غُونْشْكَادْ أَيْسْمْݣْ إصْلْحْنْ غْ إلاَّ لَمَانْ!إلاَّ ݣِيكْ لاَمَانْ غْ مَايْدْرُوسْنْ،غِلاَدْ رَاكّْ سْرْسْخْ فْ مَايْݣُّوتْنْ.زَايْدْ كْشْمْ سْ لْفْرْحْ نْ سِيدِيكْ! 22 يَاشْكْدْ وَلِّي يُومْژْنْ سْنَاتْ لُوزْنَاتْ نْ وُورْغْ أُلاَ نْتَّانْ إنَّايْسْ:سْنَاتْ لُوزْنَاتْ أَيِّ تْفْكِيتْ أَسِيدِي،هَا سْنَاتْ يَضْنِينْ صَحَنْتِيِّي فْ أُفْلاَّ! 23 إنَّايْسْ سِيدِيسْ:إفُولْكِي ݣِيكْ غُونْشْكَادْ أَيْسْمْݣْ إصْلْحْنْ غْ إلاَّ لاَمَانْ!إلاَّ ݣِيكْ لاَمَانْ غْ مَايْدْرُوسْنْ،غِلاَدْ رَاكّْ سْرْسْخْ فْ مَايْݣُّوتْنْ.زَايْدْ كْشْمْ سْ لْفْرْحْ نْ سِيدِيكْ! 24 يَاشْكْدْ إلْمَّا وَلِّي مِي إفْكَا يَاتْ لُوزْنْتْ إنَّايْسْ:سّْنْخْ أَسِيدِي إسْ تْݣِيتْ يَانْ أُرْݣَازْ إشْقَّانْ،أَرْ تْمْݣّرْتْ غِّلِّيغْنّْ أُورْ تْكْرْزْتْ،أَرْ تّْسّْمُونْتْ غِّلِّيغْنّْ أُورْ تْلُوحْتْ أَمُودْ. 25 إكْصَاضْخْ،دُّوخْ حْضُوخْنّْ لُوزْنْتْ نْكْ غْ دُّو وَكَالْ.غِلاَدْ هَا أَيْدَا نْكْ! 26 إوَاجْبْدْ سِيدِيسْ إنَّايْسْ:يَاكْ أَݣَارْ إسْمْݣْ إخُويّْنّْ،تْسّْنْتْ إسْ أَمْݣّرْخْ غْ إنَّاغْ أُورْ كْرْزْخْ،أَرْ سّْمُونْخْ غْ إنَّاغْ أُورْ لُوحّْ أَمُودْ، 27 إلاَّ فْلاَّكْ أَنّْ تْݣْتْ لُوزْنْتْ إنُو دَارْ إدْ بُوصّْرْفْ،لُوقّْتْ نَّادْ أُشْكِيخْ أَسِيخْ أَيْلِّي إݣَانْ وِنُو سْمُونْخْ سُولْ دِيدْسْ صَحَا؟ 28 هْيَّ كّْسَاتْ أَسْ لُوزْنْتْ نَّا دَارْسْ،تْفْكْمْتّْ إوَلِّي دَارْ مْرَاوْتْ لُوزْنَاتْ. 29 أَشْكُو كْرَا دَّارْ إلاَّ كْرَا،رَايْسْ إتّْفْكْ أُݣَّارْ.وَنَّا دَارْ أُورْ إلِّي يَاتْ،أَيْلِّي نِيتْ دَّارْسْ إلاَّنْ أَرَايْسْ إتّْيَوْكَّاسْ. 30 أَمَّا إسْمْݣْ أَدْ غْ أُورْ تْلِّي لْفَايْتّْ،لُوحَتِّينْ غْ تِلاَّسْ نْ بْرَّا،غِينّْ أَغْ رَادْ إلِينْ إمْطَّاوْنْ دْ إسْقِجِّيْنْ نْ أُخْسَانْ.
Copyright © Call of Hope, Germany www.call-of-hope.com