16 لِّيغْ أَسْرْسْنْ إتّْقّْلْ بُولُسْ غْ أَثِينَا،إخْصْرْ بَهْرَا لْخَاطْرْ نْسْ لِّيغْ إژْرَا تَمْدِينْتْ أَنّْ تْعْمّْرْ سْ لَصْنَامْ. 17 إنْكْرْ أَرْ إسَوَالْ دْ وُدَايْنْ دْ وِلِّي تّْعْبَدْنِينْ رْبِّي غْ أُݣْرَاوْ،دْ وِلِّيدْنّْ إتّلْمُقُّورْ غْ سُّوقّْ كْرَيْݣَاتّْ أَسّْ. 18 نْكْرْنْ كْرَا نْ أَيْتْ لْفَلْسَفَا نْ أَيْتْ أَبِيقُورْ دْ أَيْتْ رِّوَاقّْ نْݣَبَالْنْ دِيدْسْ،نَّانْ أَسْ كْرَا ݣِيتْسْنْ:«مَاسْ إرَا بُو تَقُّورْتْ أَدْ أَتّْ يِنِي؟»نَّانْ أَسْ وِيَّاضْ:«إرْوَاسْ إسْ أَيْسَوَالْ فْ كْرَا نْ إدْ رْبِّي لِّي أُورْ نْسِّينْ».أَشْكُو أَرَاسْنْ إسَوَالْ فْ يَسُوعْ دْ وَاسّْ لِّيغْ رَادّْ نْكْرْنْ إمْتِّيتْنْ. 19 أَوِينْتِيدْ سْ أُجْمُوعْ نْ أَرْيُوسْ بَاغُوسْ نَّانْ أَسْ:«إسْ إمّْكْنْ أَدَاخْ تْمْلْتْ مَيْݣَا أُلْمُودْ أَدْ لّْجْدِيدْ لِّي فْ أَتْسَوَالْتْ؟ 20 أَشْكُو أَرْ دَارْكْ نْسّْفْلِيدْ إكْرَا نْ تْغَوْسِوِينْ لِّي دَارْنْخْ ݣَنِينْ لَعْجْبْ،نِرِي غِلاَدْ أَنِّيسَّانْ مَادْ ݣَانْتْ». 21 أَشْكُو أَيْتْ أَثِينَا كُلُّوتْنْ دْ إبْرَّانِيْنْ لِّي ݣِيسْ زدْغْنِينْ أَرْ زّرَايْنْ لُوقّْتْ نْسْنْ كُلُّوتّْ غْ تْجْمَّاعْتْ،أَرْݣِيسْ سَوَالْنْ نْغْ أَسّْفْلِيدْنْ إيّسْوِنْݣِيمْنْ لّْجْدِيدْ.
22 إفْتُو بُولُسْ إبْدّْ غْ تُژُّومْتْ نْ أُجْمُوعْ نْ أَرْيُوسْ بَاغُوسْ إنَّايْسْنْ:«ژْرِيخْكْنْ أَيَايْتْ أَثِينَا تُومْژْمْ بَهْرَا غْ دِّينْ نُّونْ غْ كْرَيْݣَاتّْ تَسْݣَا. 23 أَشْكُو أَرْ زِّݣِيزْخْ غْ تْمْدِينْتْ نُّونْ أَرْسْمُقُّولْخْ غْ إدْ لْهَيْكَلْ لِّيغْ أَتّْعْبَادْمْ أَفْخْنّ يَانْ أُمْغْرِيصْ إتّيُورَا فْلاَّسْ:«وِينْ رْبِّي لِّي أُورْ نْسِّينْ».رْبِّي أَدْ لِّي تّعْبَادْمْ أُورْتْ تْسِّينْمْ نْتَّانْ أَفْ رَايْوْنْ سَوْلْخْ. 24 رْبِّي لِّي يْخْلْقّنْ دُّونِيتْ وَلاَ مَݣِّيسْ،إݣْ بَابْ نْ إݣْنْوَانْ دْ وَكَالْ،أُورْ أَيْتْزّْدْغْ غْ تْݣْمَّا لِّي سْكْرْنْ إفَاسّْنْ، 25 أُورَاتْ سْنِضِيفْنْ إفَاسّْنْ نْ مْدّْنْ زُونْدْ إغْ إلْكْمْ فْ كْرَا،أَشْكُو نْتَّانْ نِّيتْ أَيَّكَّانْ إكْرَيْݣَاتّْ يَانْ تُودْرْتْ إݣْ ݣِّيسْ رُّوحْ إفْكْ أَسْ كْرَيْݣَاتّْ تَغَوْسَا. 26 إدَامّْنْ نْ يَانْ أُرْݣَازْ أَغْ كُلُّو إخْلْقّْ تِمْتّْوِينْ لِّي كُلُّو زْدْغْنِينْ غْ إݣِّي نْ وَكَالْ،إسْكْرْ إزْمَازْ إتُودْرْتْ نْسْنْ إسْكْرْ إوْتَّا إتْمِيزَارْ نْسْنْ، 27 فْ أَدْ سِݣِّيلْنْ رْبِّي إغْ إتّْيَافْ أَنّْ دِيدْسْ نْمُقُّورْنْ أَفْنْتْ،مْقَّارْنّْ نِيتْ أُورْ يَݣُّوݣْ فْ حْتَّا يَانْ ݣِيتْنْخْ. 28 أَشْكُو نْتَّانْ أَغْ نْدّْرْ أَرْ ݣِيسْ نْزِّݣِيزْ نِلِي ݣِيسْ.غْمْكْلِّي سْ إنَّا يَانْ غْ إنْضَّامْنْ نُّونْ:أُلاَ نْكّْنِي نْݣَا تَرْوَا نْسْ. 29 إغْ نْݣَا تَرْوَا نْ رْبِّي،إخْصَّايْخْ أَدْ أُورْ نْغَالْ إسْ إݣَا رْبِّي غْ صِّفَاتْ نْسْ زُونْدْ لَصْنَامْ لِّي تّْسْكْرْنِينْ غْ أُورْغْ نْغْدّْ نّْقْرْتْ نْغْدّْ أَژْرُو لِّي يْسْنْݣَدَّا بْنَادْمْ إسْكْرْتْنْ سْ غْمْكْلِّي سَاسْ إنَّا لَعْقّْلْ نّْسْ. 30 غَادْ إزْرِينْ أُورْ إحَاسْبْ رْبِّي مْدّْنْ فْ إزْمَازْ لِّيغْ جْهْلْنْ أُورْتْ سّْنّْ،غِلاَدْ هَانّْ أَرْ يَقّْرَا إكْرَيْݣَاتّْ يَانْ غْ إنَّاغْ إلاَّ أَدّْ يِوْرِّي سْ أُغَرَاسْ. 31 أَشْكُو إسْكْرْ يَانْ وَاسّْ لِّيغْ رَا كُّلُّو إحْكْمْ فْ مْدّْنْ سْ لْحَقّْ،فْ أُفُوسْ نْ يَانْ أُرْݣَازْ لِّي يْسْتِي،إفْكْ فْلاَّسْ تَمَتَارْتْ إمْدّْنْ كُلُّوتْنْ سْ غْمْكْلِّتِيدْ إسّْنْكْرْ غْ ݣْرْ إمْتِّيتْنْ».
32 لِّيغْ أَسْ سّْفْلْدْنْ وِلِّينّ مُونِّينْ إبْدْرْ تَنْكْرَا نْ إمْتِّيتْنْ أَرْ إضْسَّا كْرَا ݣِيتْسْنْ،وِيَّاضْ نَّانْ أَسْ:«نْرَا ݣِيكْ أَدَاخْ تْسَاوْلْتْ فْ مَيَادْ ضُّورْ يَضْنِينْ!» 33 إفّْغْدْ بُولُسْ إفْلْنّْ أَجْمُوعْ نْسْنْ. 34 وَلاَيْنِّي كْرَا ݣِيتْسْنْ ضْفُورْنْ بُولُسْ أَمْنّْ،إݣْ ݣِيسْنْ دِيُونِيسِيُوسْ لِّي إݣَانْ يَانْ غْ أُجْمُوعْ نْ أَرْيُوسْ بَاغُوسْ،دْ يَاتْ تّْمْغَرْتْ إسْمْ نْسْ دَامَارِسْ دْ وِيَّاضْ يَضْنِينْ لِّي دِيدْسْنْ لاَّنِينْ.
Copyright © Call of Hope, Germany www.call-of-hope.com