¹ ئي تيزويري ئخلق ربّي ئݣنوان د واشال.
² أشال يورا ؤر ديكس أود حاح، تقّن تالّست خف وامان. د روح ن ربّي لا ئتفرفير نّيݣ ن وودم ن وامان.
³ داي ئنّا ربّي: «أد ييلي ؤسيد!» أها ييلي ؤسيد.⁴ يانّاي ربّي ئس ئژيل ؤسيد، داي ئبضو ئنݣر ن-ؤسيد د تالّست.⁵ ئسمّا ربّي أسيد أسّ أها ئݣّا يي تالّست ئضّ. تزري تادݣّـات تدود تيفاوت، هان أسّ أمزْوارو.
⁶ داي ئنّا ربّي ديخ: «أت تيلي يوت ن لوساعيت، حما أت تبضو ئنݣر ن وامان د وامان».⁷ داي ئݣ ربّي لوساعيت نّا. أها ئبضو ئنݣر ن وامان ن دّاو ن لوساعيت د وامان ن وافلّا. داي ئجرو ئمشيس.⁸ داي ئسمّا ربّي لوساعيت نّا ئݣنّا. تزري تادݣّات تدود تيفاوت، هان أسّ ويسّ سّين.
⁹ داي ئنّا ربّي: «أد مّون وامان نّا ئلّان دّاو ن-ئݣنّا ݣ يون ؤدغار، حما أت تضهير تاغارت». داي ئجرو ئمشيس.¹⁰ ئسمّا ربّي تاغارت أشال أها ئݣ يي وامان نّا ئمون ݣ يون ؤدغار لبحور. يانّاي ربّي أينّا ئژيل.¹¹ داي ئنّا ربّي: «أد ئسمغي واشال تيزݣزوت: توݣا مانيݣ لّان ئفسان، د-ئسكلا نّا ياكّان لغلت نّاݣ لّان ئفسان، خف لانواع نسن». داي ئجرو ئمشيس.¹² داي ئسّوفغد واشال تيزݣزوت: توݣا ئتݣّان ئفسان خف لانواع نّسن، د-ئسكلا نّا ياكّان لغلت مانيݣ لّان ئفسان، خف لانواع نّسن. يانّاي ربّي أينّا ئژيل.¹³ تزري تادݣّات تدود تيفاوت، هان أسّ ويسّ شراض.
¹⁴ ئنّا ربّي ديخ ألتو: «أد-ئلين ئسيدّن ݣ لوساعيت ن-ئݣنّا، أد بضون ئنݣر ن واسّ د ييض، ݣين تيميتار نّا س مي توياسّان لاعياد د ووسّان د-ئسݣّاسن.¹⁵ أها سيدّن خف واشال زݣ لوساعيت ن-ئݣنّا». داي ئجرو ئمشيس.¹⁶ ئݣ ربّي سين ن-ئسيدّن ئخاتارن: ئݣا تافوشت، أسيدّ أخاتار حما أد ئنبض ݣ واسّ، د وايور، أسيدّ أمژيان حما أد ئنبض ݣ ييض. أها ئݣ أود ئتران.¹⁷ داي ئݣتن ݣ لوساعيت ن-ئݣنّا حما أد سيدّن خف واشال،¹⁸ نبضن خف واسّ د ييض أها بضون ئنݣر أسيدّ د تالّست. يانّاي ربّي أينّا ئژيل.¹⁹ تزري تادݣّات تدود تيفاوت، هان أسّ ويسّ ربعا.
²⁰ داي ئنّا ربّي: «أد عمرن وامان س لموخليقات درنين. د-ئجضاض أت تافراون ݣ لوساعيت ن-ئݣنّا نّيݣ ن واشال».²¹ داي ئخلق ربّي لهيشات ن لبحر د-ؤينّا ئدّرن كول أر تحرّاشن ݣ وامان خف لانواع نّسن د طّيور نّا ئتّافراون خف لانواع نّسن. يانّاي ربّي أينّا ئژيل.²² داي ئسبارشتن ربّي، ئنّاياسن: «تّارويات، توعدوم تعمرم أمان ن لبحر. أها ؤعدون أود ئجضاض ݣ واشال».²³ داي تزري تادݣّات أها تدود تيفاوت، هان أسّ ويسّ خمسا.
²⁴ داي ئنّا ربّي: «أد ئسّوفغ واشال لموخليقات دّرنين خف لانواع نّسن: لبهايم د كول ماݣ تمروردن خف ؤديس د لوحوش، كو يون خف نّوع نّس». داي ئجرو ئمشيس.²⁵ ئمشيد أس ئخلق ربّي قّاح: لوحوش ن واشال خف لانواع نّسن د لبهايم خف لانواع نّسن د-ئمرارادن خف لانواع نّسن. يانّاي ربّي أينّا ئژيل.
© 2024 Bible Society of Morocco, used with permission