¹ داي ضارت ن-ؤينّا، ئرا ربّي أد ئجرب سيدنا إبراهيم أها ئغراس: «إبراهيم!» داي ئنّاياس سيدنا إبراهيم: «نعم أسيدي!»² داي ئنّاياس ربّي: «أوي إسحاق، ممّيك أفردي نّا غورش ئعزّين داي تدّود غر تمازيرت ن موريا أها تݣديييت د تامغروصت ئغوسن خف عاري نّا دّيخ أد-اش سنعتخ».³ داي ئكر سيدنا إبراهيم أسكّا ثيفوت، ئݣر تاباردا يي وغيّول نّس، ئرژ ئكشيضن يي تمغروصت نّا غا ئسغوس أها مّونن أݣّيدس سين زݣ ئسمغان نّس د إسحاق ممّيس. داي ئدّو غر أنسا نّا س-ئنّا ربّي.⁴ داي ݣ واسّ ويسّ شراض، يانّاي سيدنا إبراهيم زݣ تّيساع عاري نّا غر ئخصّا أد ئدّو.⁵ داي ئنّا سيدنا إبراهيم يي يسمغان نّس: «قّيمات كنّيوني دا س-أغيّول، ئد نكّين د-ؤربا ندّا أندّو غر عاري، أنعبد ربّي أها نغولد غيرون».⁶ داي ئݣ سيدنا إبراهيم ئكشيضن ن تمسغوست يي ممّيس إسحاق خف تاداوت، ياسي نتّا أصفض ن لعافيت د تخدميت، أها دّون سّين نّسن.⁷ داي لّيݣ أر تدون ئنّا إسحاق يي ئبّاس: «أيبّا!» داي ئنّاياس سيدنا إبراهيم: «نعم أممّي». داي ئنّاياس إسحاق: «ها لعافيت د-ئكشيضن، ماني أحولي ن تمغروصت نّا غا نسغوس؟»⁸ داي ئنّاياس سيدنا إبراهيم: «ئدّا ربّي س-ئخف نّس أد-اخ ئوش أحولي ن تمغروصت نّا غا نسغوس، أممّي». داي تامّان ݣ-ؤبريد سّين نّسن.
⁹ داي نتّا ئوضن أدغار نّا س-ئسنعت ربّي، ئبنو سيدنا إبراهيم يون ؤسغرص أها ئݣ غيفس ئكشّيضن، داي ئشرف ممّيس أفلّا ن-ئكشّيضن نّا ئݣا خف ؤسغرص.¹⁰ داي ياژض سيدنا إبراهيم أفوس حما أد ياسي تاخدميت أد ئغرص يي ممّيس.¹¹ داي ئغراسد لملاك ن مولانا زݣ ئݣنّا: «إبراهيم! إبراهيم!» داي ئنّاياس سيدنا إبراهيم: «نعم أسيدي».¹² داي ئنّاياس لملاك: «أد-ؤر سروسا أفوس نّش خف ؤربا، أد-ؤر-اس تݣّا شا ؤر-ئحلين! دغي، سّنخ ئس دا تݣّاد س واوال ن ربّي، ئدّخ ؤر يي تكّيسد ممّيش أفردي».¹³ ئهزّا سيدنا إبراهيم ألّن نّس يانّاي يان ؤحولي ئطواعر زݣ أشّيون نّس غر يون ؤزݣّار. داي ئدّو ياوتيد، ئغرصاص أها ئسغوست ݣ وانسا ن ممّيس.¹⁴ داي ئݣ سيدنا إبراهيم ئسم يي و دغار نّا "مولانا نّا ياكان". أها سولن لا س تينين غر دغي: "خف عاري ن مولانا، ئدّا مولانا أد-اخ ئوش أينّا خ ئخصين".
¹⁵ داي ئغرد لملاك ن مولانا يي سيدنا إبراهيم لمرت تيسنات زݣ ئݣنّا¹⁶ أها ئنّاياس: «ئنّا مولانا: "ئدّخ تݣيد أياد أها ؤر يي تكّيسد ممّيش أفردي، دا ش تݣالّاخ س-ئسم ئنو ئسّ:¹⁷ ديّخ أك باركخ، سعدوخ تاروا نّش أل ثݣ أنشت ن-ئتران ن-ئݣنّا د-ؤكژاژ نّا ئلّان ݣ-ئميسّي ن لبحر أها تْورت تيمدنين ن-ئعداون نّش.¹⁸ ݣ وودم ن تاروا نّش دّيخ أد باركخ لݣنوس كول ن واشال، ئدّخ يي تݣيد س رّاي"».¹⁹ داي ياغولد سيدنا إبراهيم غر ئسمغان نّس، أها كرن عايدن كول نسن غر بئر سبع ماني ݣ-ئزدغ سيدنا إبراهيم.
© 2024 Bible Society of Morocco, used with permission