²⁶ داي نتّا ثلّا أليصاباث ݣ - وايور نّس ويسّ ستّا، يازند ربّي لمالاك جبرائيل غر يوث ن - ثمدينث ݣ - ثمازيرث ن ـ لجاليل ئسم نّس نّاصيرا؛²⁷ غر يوث ن - ثعرّيمث ئسم نّس مريم، ئتّواتّرن ئي يان ؤرݣاز ئسم نّس يوسف ئݣان زݣ ييرو ن - سيدنا داود.
²⁸ يكشم غورس لمالاك ئنّاياس: «أزول غيفم أثنّا خف ئرضا ربّي».²⁹ داي ثشوّش مريم زݣ ؤينّاس ئنّا لمالاك، ثقّيم أر تخمّام ݣ ـ سّلام نّس.³⁰ أها ينّاياس لمالاك: «أمريم، أد ؤر تّݣّد، هان ربّي يرضا غيفم،³¹ هاثين ئقّنشمين أتّيليد س - ؤديس، أها ثارود يان ؤربا ثݣداس عيسى.³² ئدّا أد ئيݣ أكسواث، أراس قّارن ممّيس ن - ؤنافلّا، أها يݣيث مولانا ربّي د ـ أݣلّيد ئمشينّا ثيݣا لجدّ نّس سيدنا داود،³³ داي ينبض خف أيث سيدنا يعقوب خف وابدا، أها وسار ثلّي ثنݣيرا غر ثنباطّ نّس!»
³⁴ ماشان ثنّاياس مريم ئي لمالاك: «ميمش ئتّجرو ؤياد د - نكّين سولخ ݣيخ ثاعرّيمث؟»³⁵ داي ينّاياس لمالاك: «ئدّا رّوح ن - ربّي أد غيفم دّيرس، ئسمالو غيفم جّهد ن - ؤنافلاّ، خف ؤياد أود ثاسلميا نّا ثدّيد أتّارود أتݣ ثازدّاݣث ن ـ ربّي، أراس قّارن ممّيس ن - ربّي.³⁶ هان أليصاباث ؤلث لاهل نّم ثلّا أود نتّاث س - ؤديس ن - ؤربا ݣ - ثوسر نّس، هاثين أيور نّس ويسّ ستّا أياد، نتّاث نّا خف أر تّينين ثݣا ثيݣّرث.³⁷ ئدّخ ؤر ئلّي أود يان ؤسكين نّا يوعرن خف ربّي».³⁸ داي ثنّاياس مريم: «نكّينثين ثيسمغث ن - مولانا أيد ݣيخ، قبلخ أد ئي ئتّواݣ ؤينّا ثنّيد». داي يدّو زّيكس لمالاك.
© 2024 Bible Society of Morocco, used with permission