¹ داي ݣ - ووسّان نّا، ئنبض ؤݣلّيد ن ـ رّومان أوغوسطوس أد تّوحاسبن ئمزداغ ن - ثميزار نّا خف ئنبض كول.² أحاسب أد، ئݣان أمزوارو كول، ئتّواݣ لّيݣ ئݣا كيرينيوس أنبّاض خف ثمازيرث ن - سوريا.³ داي يدّو كو يوكّ غر - ثمدينث نّا زݣ ئݣا أديكسنّ ئزمّمن ئسم نّس.
⁴ أها يݣّافي يوسف أود نتّا زݣ ثمدينث ن - نّاصيرا، يلّان ݣ - ثمازيرث ن - لجاليل، غر ثمدينث ن - سيدنا داود نّامي دا تّينين بيت لاحم، ئلّان ݣ - ثمازيرث ن - أيث ياهودا، ئدّخ ئݣا زݣ ييرو ن - سيدنا داود،⁵ حما أد ئزمّم ئسم نّس نتّا د - مريم نّا يتّر، ثيلي س - ؤديس.⁶ لّيݣ نّلّان ݣ - بيت لاحم، ثيوضاس لوقث ن - ثاروا.⁷ داي ثارو ممّيس أمنزو، أها ثتّلث ݣ - ئشرويضن ثسّݣنث ݣ - يوث ثفراوث ئدّخ ؤر ؤفين أنسا ݣ - لفندق.
⁸ يافد لحال ييتّس ن - ئمكساون ݣ - ثمازيرث نّا أر نسّان ݣ - ييݣران، أر تݣّين ثاوالا خف وولّي نسن أر ثن حطّون ݣّيض.⁹ داي يفّغد غورسن يان لمالاك، أها يسّيدّد غيفسن لعزّ ن - ربّي، داي ݣّدن شايݣان.¹⁰ ماشان ئنّاياسن لمالاك: «أد ؤر تݣّداث! هاثين ئويخاوند يان ؤنغميس ئژيلن نّا غا يسّفرحن ميدّن كول:¹¹ هاثين ئلولاياون أسّا، ݣ ـ بيت لاحم ثامدينث ن - سيدنا داود، وونّا يتّفوكّان، نتّا لماسيح مولانا.¹² هاياون ثاماثارث نّاس ثتّاكزم: ثدّام أنّ ثافيم يوث ن - ثسلميا يتّلن ݣ ـ ئشرويضن ثݣن ݣ - يوث ثفراوث».
¹³ شوي يبدّد ثاما ن ـ لمالاك يان ؤربيع أخاثار ن - ئعسكّرين ن - ييݣنّا، أر تسبّاحن ربّي أر تّينين:¹⁴ «لعزّ ئي ربّي سافلّا ݣ - ئݣنوان، د - لهنا خف واشال ئي وينّا خف ئرضا».
¹⁵ نتّا دّان زّيكسن لمالايكاث غر أجنّا، داي ميونّان ئمكساون ئنݣراتسن: «كّراثاخ أندّو دغي غر ثمدينث ن - بيت لاحم حما أنانّاي أياد نّا يجران نّاس أخ ئعلم مولانا».¹⁶ داي دّون س - ثازّلا، أفيننّ مريم د - يوسف، د ـ ثسلميا ثجن ݣ - ثفراوث.¹⁷ نتّا أنّاينتّ، قّيمين أر تقّيسن أينّاسن ئنّا لمالاك خف ؤربا ياد.¹⁸ كول وينّا سلّانين ئي وينّا نّان ئمكساون قّيمان هبضن.¹⁹ ئيد مريم تفّر أياد كول ݣ - وول نّس أر ديكس تخمّام.
²⁰ داي أغولن ئمكساون ئبردان نسن، أر تمجّادن ربّي، أرث تسبّاحن خف ؤينّا مي سلّان د - ؤينّا أنّاين كول ئدّخ ئجرا أم ؤينّاسن ئنّا لمالاك.
© 2024 Bible Society of Morocco, used with permission