¹ داي ياغولدّ سيدنا عيسى زݣ واسيف ن ـ لوردون ئتّوعمّر س - رّوح ن ـ ربّي، أها يحريث رّوح ن ـ ربّي ݣ - لخلا² أرث ئتّجرّاب شّيطان ربعين ن - واسّ، ؤر ئتشّي أود ئميقّ ݣ - ووسّان نّا. نتّا زرين أها ينغيث لاژّ.³ داي ينّاياس شّيطان: «مش ثݣيد ممّيس ن - ربّي، ئنيياس ئي وژرو ياد أد ياغول أد ئݣ أغروم».⁴ ئرار غيفس سيدنا عيسى ينّاياس: «هاثين ئتّياري ݣ ـ لشثاب ن ـ ربّي: ؤريد غاس س - ؤغروم أس دا يتّيدير بنادم».
⁵ داي يسّيليث شّيطان غر يان عاري نّا يعولّان، ئسنعثاس ثيݣلّيدين ن - دّونيث كول ݣ ـ شان لوقث ئدروسن،⁶ أها ينّاياس: «أداش ؤشخ ثانباطّ خف ثݣلّيدين أد كول د - لعزّ نسنث ئدّخ ئي تمّوشنث، د - نكّين أثنث ؤشخ ئي ونّا ريخ.⁷ ئوا مش ثبندقد خف ئفادّن نّش داثي، أد ئݣ ؤياد كول وينش».⁸ ئرار غيفس سيدنا عيسى ينّاياس: «هاثين ئتّياري ݣ ـ لشثاب ن ـ ربّي: أد ؤر تّبنداق غاس ئي مولانا يݣان ربّي نّش، د ـ غاس نتّا ييويل نّس أغا تّعبادّ».
⁹ داي ياويث شّيطان غر ثمدينث ن - لقدس، ئسّيلث غر ئخف أنافلّا ن - ثادّارث ن - ربّي أها ينّاياس: «مش ثݣيد ممّيس ن - ربّي، ئوا ݣر ئخف نّش زݣ سّياد غر سادّا،¹⁰ ئدّخ ئتّياري ݣ ـ لشثاب ن ـ ربّي: ئدّا ربّي أد ييني ئي لمالايكاث نّس أكّ حضونث.¹¹ دّانث أك أسينث ݣ - ئفاسّن نسنث حما أد ؤر ئتّمناقّار ؤضار نّش د - شان ؤژرو».¹² ئرار غيفس سيدنا عيسى ينّاياس: «هاثين ئتّياري ألثو ݣ ـ لشثاب ن ـ ربّي: أد ؤر تّجرّاب مولانا ربّي نّش».
¹³ لّيݣ ئشمّل شّيطان أينّاس أرث ئتجرّاب كول، ئدّو يحيداس أرد غورس ياف ديخ أبريد.
(ماتّى 13:53-58؛ مارقوس 6:1-6)
¹⁴ ياغول سيدنا عيسى غر ثمازيرث ن - لجاليل، ئتّوعمّر س - جّهد ن - رّوح ن - ربّي؛ داي يساقّا ؤنغميس نّس ݣ - ئحيدان نّا كول.¹⁵ ئقّيم أر ئسّقرا ݣ - ثمزݣيديوين ن ـ ووداين، أها أر ئسّ سّمغورن كول نسن.
¹⁶ داي يكّر ئدّو غر ثمدينث ن - نّاصيرا نّاݣ ئݣما. س - واسّ ن - سّبث، ئكشم غر ثمزݣيدا ن - ووداين أم ؤينّا يوالف، أها يبدّ حما أد ئقرا شا زݣ واوال ن ـ ربّي،¹⁷ داي وشيناس لشثاب ن - نّبي ئشعيّا. نتّا يرژمث، ياف أنسا نّاݣ ئتّييياري:¹⁸ «رّوح ن - ربّي يلّا غيفي ئدّخ ئي يسثي أد ئنيخ ئنغميسن ژيلنين ئي لمساكين،
أها يازنيد أد برّحخ ئيس دّان وينّا تّوامژنين أد تّورژمن،
د ـ ئدرغالن أد تّانّاين، فوكّاخ وينّا خف ئتّوعدّا،¹⁹ أها برّحخ ئيس ييوض ؤسݣّاس نّاݣ ئتّرضو ربّي خف ميدّن نّس».
²⁰ ئسمون سيدنا عيسى لشثاب ئرارث ئي ومزيلّز ن ـ ثمزݣيدا أها يوث أغجديم. أر ديكس سمقّولن وينّا لّانين ݣ - ثمزݣيدا كول.²¹ داي يسفالّ أراسن ئتّيني: «هاثين أسّا يجرا وياد نّامي ثسّغدم».²² قّيمين كول نسن أر غيفس تّينين أينّا يژيلن، أها رعبن ݣ - ئواليون غودانين نّا أرد ئتفّغن زݣ ؤقمو نّس، أر تّميينين: «ئيس ؤر ئيد ممّيس ن - يوسف أياد؟».
© 2024 Bible Society of Morocco, used with permission