³⁵ داي ئنّا سيدنا عيسى يي ئمحضرن نّس ݣ واسّ نّا غر تادوݣّات: «كّراتاخ أندّوغر أجمّاضين ن - وݣلمام».³⁶ داي فّير ماي صّيفضن لغاشي، أوين أݣيدتسن سيدنا عيسى ݣ ؤغرّابو نّاݣ ئلّا، أها تفارنت ئغرّوبا ياضن.³⁷ أها تنهم غيفسن يوت ن شّوطّ ن واضو ئجهدن، داي بدعنت تمزازين أر كّاتنت أغرّابو ألّيݣ ئدجاور أد - يعمّر س وامان.³⁸ ئد سيدنا عيسى ئݣن غر ضارت ن - وغرّابو، ئسرس أقشاش نّس خف يوت ن تالّالت، داي سفافانت ئمحضرن نس، أها نّاناس: «المعلّيم، ؤر تّيويت ديݣنخ! ندّا أنمّت؟».³⁹ ئكّر ئسغوي خف أزوو أها ئنّا يي تمزاز:«فستات! ترصّام!». داي ئرصّا ؤزوو ياغول ؤنّيرس.⁴⁰ أها ئنّا يي ئمحضرن: «مّاخ ألّيݣ تݣّدم؟ ئس تسولم ؤر تومينم؟»⁴¹ داي ݣّدن شايݣان، أها ميونّان ئنݣراتسن: «مايد ئمس ؤرݣاز - اد؟ أود أزوو د تيمزازين ضاعنت!»
¹ داي ياوض سيدنا عيسى د - ئمحضرن نس س - أجمّاضين ن - وݣلمام ن لجاليل، غر تمازيرت ن أيت جرّاس.² غاس ئرس سيدنا عيسى زݣ ؤغرّابو، ئنّالتيد يون ؤرݣاز ئفغد زݣ ئسنضال، أرݣاز - اد ئتّوسكن س وادجّنون ؤر حلينين.³ د أزدّوغ نّس ݣ يوت ن تنضلت ݣ يون ئفري. ؤر ئلّي مايد ئغين أتيامژ واخّا ئشرف س سّنسلت.⁴ ئدّخ ئتوكرف ياد شايݣان ن لمرّات زݣ ئفاسّن د - يضارن س شايݣان ن ئكوراف د أسّنسلات، ماشان ئبّيتن أها ئرّژتن، أها ؤر ئغي أݣد يون أتّيسضاع.⁵ ديما لا ئتّحوف ݣّيض د واسّ ݣ لعواري د - يسنضال، أر ئسغويّو أها أر ئستّوروست ئخف نّس س ئژرا.
⁶ لّيݣ يانّاي سيدنا عيسى زݣ تّيساع، يازّل أها ئبندق دات - اس.⁷ داي ئسيولاس س - ؤغويّي ئجهدن ئنّا: «مايد ئلّان ئنݣري د أݣّيد ك، آممّيس ن ربّي ئعولاّن؟ ؤر - اك قدّيمخ غاس ؤدم ن ربّي، أد ؤر - ي تعدّاب!».⁸ ئدخ سيدنا عيسى ئنّاس ياد: «فّغ زݣ ؤرݣاز - اد، آدجن ؤريحلين».⁹ ئسقسات ئنّاياس: «ميسم نّش؟» ئواجبت ئنّاياس: «ئسم ئنو باطايون، ئدّخ نعدّا».¹⁰ داي ئحوژّرت باطايون شايݣان حما ؤر تن ئتژّع برّا ن تمازيرت.¹¹ أها تيلي دين تاما ن عاري يوت ن توالا تامقرانت ن - ئبولخيرن أر تّاوغن.¹² أها حوژّرنت ݣار وادجّنون كولّ نّاناس: «أزناخ غر ئبولخيرن حما أنكشم ديكسن».¹³ يادجّيتن سيدنا عيسى، داي فّغن فيمرّا وادجّنون ؤر حلينين زݣ ؤرݣاز، أها كشمن ݣ - ئبولخيرن، داي دوي توالا زݣ وافلّا ن عاري غر أݣلمام غلين ديكس. أها ييلين أتّاين والفاين.
¹⁴ ئد ئمكساون ن - ئبولخيرن رولن، أها دّون أل تقيسن أياد ئ - أيت تمدينت د - أيت برّا،داي دّاند ميدّن أد أنّاين مايد ئجران.¹⁵ دّاند غر سيدنا عيسى، داي أنّاين أرݣاز نّاݣ كّان شيݣان وادجنون ئقّيم، ئلسا ئعبان، أها ئلّا ݣ لعقل نّس. داي ݣدن ميدّن.¹⁶ داي قّيسن وينّا يانّاين ئ ميدّن أينّا ئجران يي بو وادجّنون د - ئبولخيرن.¹⁷ كّرن ميدّن أل تحوژورن سيدنا عيسى أد ئفّغ زݣ تمازيرت نسن.¹⁸ داي لّيݣ ئني سيدنا عيسى أغرّابو، ئكّر بو وادجّنون أر - أس ئتّيني: «عافاش أسيدي، رّيخ أد - اݣيدش مّونخ».¹⁹ والاينّي ؤر تيودجّي سيدنا عيسى، ئنّاياس: «دّو غر تادّارت نّش د - ايت ؤخام نّش قّيساسن أينّاش ئݣا مولانا د ماكّاس ألّيݣ ديك ئحنّا».²⁰ داي ئدّو ؤرݣاز أر ئتبرّاح ݣ تمدينين عشرا س ماس ئݣا سيدنا عيسى أها رعبن ميدّن كولّ.
© 2024 Bible Society of Morocco, used with permission