⁹ داي يقّيس سيدنا عيسى لقيسث أد ئي وينّا أر تّينين ݣ ـ ئخفاون نسن هاثين منان أها أر تحقّارن وييّاض، ئنّاياسن:¹⁰ «دّان سين ن - ئرݣزن غر ثدّارث ن - ربّي حما أد ژّالّين، يوكّ أفرّيسي د - وايّاض أصنّاك.¹¹ داي يبدّ ؤفرّيسي أر ئتژالّا ئنݣراس د ـ ئخف نّس أر ئتّيني: "أربّي، داش تحمادخ ئدّخ ؤر ݣيخ ئمعصي أم ميدّن ضنين نّا دا تّاشرنين، أرتغشّان، أر تفسادن، ؤلا ݣيخ أمّ ؤصنّاك أد.¹² دا تّاژومخ سناث ن - ثيلمرّات ݣ - ؤسبيع، أر تّكّسخ لعشور خف ؤينّا داد تّراراخ كول".¹³ ئيد أصنّاك، ئبدّا ݣ - تّيساع ؤر ئغي أود أد ئهزّا ألّن نّس س ـ ئݣنّا، أر ئكّاث ئدمارّ نّس أر ئتّيني: "أربّي رحميي، هاثين ݣيخ ئمعصي!"».
¹⁴ «أداون ئنيخ: هاثين أصنّاك أد ئدّا غر ثادّارث نّس ئرضا غيفس ربّي، ؤر ئيد أم ؤفرّيسي. ئدّخ ؤنّا يسّمژين س ـ ئخف نّس ئدّا أد ئيسّ ئتّوسخاثر ئيد ؤنّا يسخاثرن س ـ ئخف نّس ئدّا أد ئيسّ ئتّوسّمژي».
(ماتّى 19:13-15؛ مارقوس 10:13-16)
¹⁵ أويند ييتس ن - ميدّن أراو نسن ئي سيدنا عيسى أد غيفسن ئسيرس ئفاسّن حما أثن ئسبارك. نتّا أنّاين ئمحضرّ أينّا قّيمين أر غيفسن تفقّاعن.¹⁶ ئيد سيدنا عيسى ئغراياسن ئي يشيرّان أها ينّا: «أدجّاث ئشيرّان أد غوري ددّون، ثحيداماسن ئدّخ هاثين وينّا ݣانين أمّ نثني أمي ثݣا ثݣلديتّ ن ـ ربّي ثينسن.¹⁷ سثيتّ أداون ئنيخ: هاثين ؤنّا ؤر ئݣين أم شا ݣ ـ ئشيرّان أد ؤر دا يكتّشم غر ثݣلديتّ ن - ربّي».
(ماتّى 19:16-30؛ مارقوس 10:17-31)
¹⁸ يوث ن ـ ثيلمرتّ، ئسقسا يان ؤخاثار ن ـ ووداين سيدنا عيسى ينّاياس: «أياسّلماد ئژيلن، ماي تݣّخ حما أد كّوساخ ثودرث ن - وابدا ݣ ـ دّجنث؟»¹⁹ داي ينّاياس سيدنا عيسى: «مّاخ ألّيݣ ئي ثنّيد ژيلخ؟ ؤر ئلّي أود يوكّ نّا يژيلن غاس ربّي ئويل نّس.²⁰ شݣّين ثسّند لفرايض ن ـ شّرع: أد ؤر تفساد، أد ؤر نقّا، أد ؤر تّاكر، أد ؤر زلّا شّهات نّش، وقّر ئبّاش د - مايش».²¹ داي ينّاياس ؤرݣاز: «أياد كول دا ثتݣّخ زݣّوس مژّييخ».
²² نتّا يسلّا سيدنا عيسى ئي وياد أها ينّاياس: «ئسول ئقّيماش يان ؤسكّين: زّنز أيدّا نّش كول أها ثبضوتّ ئي يمژلاض، داي ييلي غورش لكنز ݣ - ييݣنّا، أها ثدّوددّ تّفاردي».²³ نتّا يسلّا ؤرݣاز ئي وينّا، داي يقّيم ديكس لحال عنوݣّا ئدّخ ثيد يوفا لحال ئطّرّح شايݣان.
²⁴ لّيݣ ثيانّاي سيدنا عيسى ئدّا يقّيما ديكس لحال عنوݣا أها ينّاياسن ئي يمحضرّ نّس: «مشثا أيد ئوعر خف وينّا طرّحنين أد كشمن غر ثݣلديتّ ن - ربّي!²⁵ هاثين ئوهن ؤكتشّوم ن - ؤلغم زݣ ثيطّ ن - ثساروتّ ن - ثݣني خف ؤكشّوم ن - ونّا يطّرّحن غر ثݣلديتّ ن - ربّي».²⁶ داي نّان وينّا أر سّغادنين: «ئوا مايد ئمس ؤنّا يغين أد ئتّوفوكّا؟»²⁷ أها ينّاياسن سيدنا عيسى: «أينّامي ؤر غين ميدّن، ئغيياس ربّي».
²⁸ داي ينّاياس بطرس: «هاثين نوكّني نزري أينّا يݣان وينّخ كول، أها نتفارش!»²⁹ داي ينّاياسن سيدنا عيسى: «أداون ئنيخ سثيتّ: كول ؤنّا يزرين ثادّارت نّس، نغد ثامطّوط نّس، نغد أيثماس، نغد لوالدين نّس، نغد أراو نّس خف ثݣلديتّ ن - ربّي،³⁰ ئدّا أد يامژ ؤݣار ن - ؤياد ݣ - دّونيث، أها ثيلي غورس ثودرث ن - وابدا ݣ ـ دّجنث».
(ماتّى 20:17-19؛ مارقوس 10:32-34)
© 2024 Bible Society of Morocco, used with permission