¹ يوث ن ـ لمرث، مونند ئصنّاكن كول د - وينّا فّغنين أبريد ن ـ ربّي حما أد سّغدن ئي مايد أر ئتّيني سيدنا عيسى.² داي وراسن ئعجيب لحال ئي يفرّيسين د - ئسّلمادن ن - شّرع قّيمين أر تّينين: «هان أرݣاز أد دا يتّرحاب ئي وينّا عصانين ربّي أر ئتتّا أݣّيدسن!»³ داي يقّيساسن سيدنا عيسى لقيسث أد أها ينّاياسن:⁴ «مش تلّا غر شا ديݣون ميّا ن - ؤحولي، أها ياشّكاس يون زّيكسن، ئيس ؤر ئتّادجّا تسّعا وتسّعين ݣ - لخلا أها يدّو أد ئرزو خف وونّا يوشّكان أرد ئيث ياف؟⁵ داي أدّاي ثياف أها يفرح ياسيث خف ئغيرّ نّس،⁶ ياغول غر ثادّارث نّس أها يغرد ئي يمدّوكّال نّس د - وادجّارن نّس يينياسن: "فرحاث أݣّيدي هاثين ؤفيخ أحولي نو نّايي يوشّكان".⁷ أداون ئنيخ: هاثين أمشيس أود ݣ - ييݣنّا، دا يتّيلي ؤفراح س ـ يان ئمعصي نّا يثوبن ؤݣار ن - تسعا وتسعين منانين نّا ؤر ئحداجّان ئي تّوبث».
⁸ «نغد مش لّان عشرا ن - ئقاريضن ن ـ نقّرث غر شان ثمطّوطّ، أها ياشّكاس يان ؤقاريض، ئس ؤر ثسّاغا أسيدّ أها ثشطّب ثادّارث ثرزو عنوݣّا أرد ئيتّاف؟⁹ داي أدّاي تّاف، أها ثغرد ئي ثمدّوكّال نّس د - ثادجّارين نّس ثينياسنث: "فرحمت أݣّيدي ئدّخ ؤفيخ أقاريض نّايي يوشكان"».
¹⁰ «أداون ئنيخ: هاثين ئمشيد أي دا يتّيلي ؤفراح داث ن - لملايكاث ن - ربّي س - يان ئمعصي نّا يثوبن».
¹¹ داي ينّاياسن سيدنا عيسى ديخ لقيسث أد: «ئلّا يان ؤرݣاز غورس سينّ ن - واراو.¹² أها ينّاياس ؤمژّيان ديكسن: "أيبّا، ؤشيي أمور ئنو زݣ ثكاسوتّ" داي ئبضوياسن ئي واراو نّس سّين أينّا يݣان وينس كول.¹³ ماشان فّير ن - شان ووسّان دروسنين، ئسمون ؤربا أمژّيان أينّا غورس ئلّان كول، ئدّو غر يوث ن - ثمازيرث نّا يبعدن أها يسفسد أيدّا نّس كول.¹⁴ نتّا يسخسر أينّا غورس ئلّان كول، ئكّر يان بوهيّوف ئوعرن ݣ - ثمازيرث نّا، ياغول ؤر يوفي مايد ئتشّا.¹⁵ أها يدّو أد ئخدم غر يان ؤرݣاز ݣ - ثمازيرث نّا، يازنث غر ئݣران نّس حما أداس ئكس ئلفان.¹⁶ أها ينغيث لاژّ ألّيݣّ أر ئتّيني أوايد يوفان أد ئسݣيون أديس نّس غاس أود س - ثيكيطّ نّا أر تتّان ييلفان. ماشان أود يوكّ أستّ ئوشان.¹⁷ نتّا يعايتّيد ئخف نّس داي ينّا: "مشثا ن - ئخدّامن أيد ئلّان غر ئبّا دا غيفسن ئتشّاياض ووتّشي، أر تّمثاثخ نكّينثين داد س - لاژّ.¹⁸ دّيخ أد كّرخ أد دّوخ غر ئبّا أها يينيخاس: أيبّا، عصيخ ربّي أها عصوخش.¹⁹ ؤر قّيميخ واثاخ أد ݣخ ممّيش، ݣييي غاس د ـ أمّ يون زݣ ئخدّامن نّش"».
²⁰ «داي يكّر ياغول غر ئبّاس. لّيݣ ئسول ألثو ؤر نّييويض غر ثدّارث، يانّايث ئبّاس غر تّيساع أها يسّنغيث ݣ ـ ثاسا، يازّل ئݣراس ئغيل أرث ئسّودوم.²¹ داي ينّاياس ممّيس: "أيبّا، هاثين عصيخ ربّي أها عصوخش، ؤر قّيميخ واثاخ أد ݣخ ممّيش".²² داي ينّاياسن ئبّاس ئي يسمغان نّس: "سدّرفاث، أوياثدّ مرسيوث ئژيلن كول أها ثسّلسيماستّ، ثݣيماس ثالخاثمث ݣ - ؤضاض، ثاويماسدّ ئدوكا.²³ ثاويمدّ يان ؤمݣّيز نّا يقّوان أها ثغرصماس، أنتشّ، نفرح،²⁴ ئدّخ ممّي ياد ئكّا يموّث أها ياغول دغي يدّر، ياشّك أها يتّواف". داي قّيمين أر تّرشاقن».
© 2024 Bible Society of Morocco, used with permission