¹ يون واسّ، ياغ شا يون ن-ؤرݣاز ئسم نّس لعازر، نّا ئݣان زݣ ئغرم ن بيت عنيا، نّاݣ تزدغ مريم د مرثا، ئستماس.² مريم نتات أيد يومسن زّهر ئ يضارن ن سيدنا عيسى أها تسفضاستن س-وشكوك نّس، أها ئݣ لعازر نّا ياغ شا ؤماس.³ داي تصّيفض مريم د مرثا أمازان غر سيدنا عيسى، نّانتاس: «أسيدي، هان أمدّاكل نّك نّا ئعزّين، لعازر، ياغث شا».⁴ داي نتّا ئسلّا سيدنا عيسى ئ واوال-اد، ئنّا: «ئغنشاياد ؤر دا ئصّاواض غر لموت، هاتين تصلح حما أتسباين لعزّ ن ربّي أها ئتواݣ لعزّ ئ ممّيس ن ربّي».
⁵ ييلي سيدنا عيسى أر ئتّيري مرثا د ؤلتماس د-ؤماتسن لعازر،⁶ والاينّي، لّيݣ ئسلّا ئس ياغ شا لعازر، ئقّيم ألّو سين ن ووسّان ݣ-ودغار نّا ݣ-ئلّا.⁷ ضارت ن-ؤينّا، ئنّا ئ ئمحضرن نّس: «أغولاتاخ غر تمازيرت ن-أيت يهوذا».⁸ داي نّاناس ئمحضرن نّس: «ألموعلّيم، زݣ شا ن لوقت ئدروسن، ؤداين دا ؤرزّون أش نغين س-ئژرا، ئوا مّاخ ألّيݣ تريت أت تاغولد غورسن دغي؟»⁹ ئنّاياسن سيدنا عيسى: «ئس ؤر ئد تناعش ن تاسّاعت أيد-ئلّان ݣ واسّ؟ د ونّا ئتدّون س واسّ ؤر دا تكّات تفيشيت، ئدّخ دا ئتّانّاي أسيدّ ن دّونيت-اد.¹⁰ ماشان مش دا ئتدّو شا ن يون ݣّيض ئدّا أت توّت تفيشيت، ئدّخ ؤر ديكس أسيد».¹¹ داي ضارت مايد ئنّا أوال أد، ئنّاياسن ألّو: «هان أمدّاكل نّخ لعازر ئݣن، ماشان دّيخ أد دّوخ أتّسكرخ».¹² أها نّاناس ئمحضرن نّس: «أسيدي، مش ئݣن ئقّنتين أد ئجّي».¹³ ماشان سيدنا عيسى أر ئساوال خف لموت ن لعازر، ئد نيتني غالن ئس أر ئساوال غاس خف ؤنودّم.¹⁴ داي ئنّاياسن سيدنا عيسى بطايطاي: «هان لعازر ئمّوت،¹⁵ د نكّين فرحخ خف نّيرت نّون، ئدّخ ؤر ن لّيخ دينّ، حما أتامنم ئسّي، ئوا كراتاخ أندّو غورس».¹⁶ أها ئنّا توما، نّا مي تّينين "ئكنيو"، ئ يمحضرن ضنين: «كراتاخ أندّو أود نوكّني حما أنمّت د لموعلّيم نّخ!»
¹⁷ داي نتّا ييوضدّ سيدنا عيسى، يافن لعازر ئنضل ياد س ربعا د-وسّان.¹⁸ ييلي ئغرم ن بيت عنيا تانيلا ن تمدينت ن لقدس س-أم شارض ن-ئد كيلوميتر.¹⁹ داي دّوند شايݣان ن ووداين غر مرثا د مريم أت تنت سعونّان ݣ-ؤماتسنت.²⁰ نتّا تسلّا مرثا ئس دّيدّا سيدنا عيسى، تكّر تݣراس عرّاض، ئد مريم تقّيم ݣ تادّارت.²¹ داي تنّا مرثا ئ سيدنا عيسى: «أسيدي، مور تلّيت داد، ؤر ئتّمتات ؤما!²² ماشان أود دغي سّنخ ئد أينّا تتّرت كول ئ ربّي أد-اش تييوْش».²³ أها ئنّاياس سيدنا عيسى: «هان ؤمام ئدّا أد ئكّر زݣ لموت».²⁴ داي تنّاياس مرثا: «سّنخ أسيدي ئس تينّ ئقّن أد ئكّر ݣ واسّ أنݣّارو، أسّ ݣّ دّان أد كّرن ئمتّين».²⁵ أها ئنّاياس سيدنا عيسى: «نكّين تانشرا زݣ لموت أها ݣخ تودرت. ونّا ئتّامن ئسّي أد ييدير مغار ئمّوت!²⁶ د ونّا ئدّرن أها أر ئسّي ئتّامن ؤسار ئمّوت أبدا. ئس دا تّامنت س واوال-اد؟»²⁷ داي تنّاياس مرثا: «يّيه أسيدي، نكّ دا تّامنخ ئد شݣّ أيد ئݣان لمسيح، ممّيس ن ربّي، نّا ئقاول ربّي ئس ئدّا أد ديدّو غر دّونيت».
²⁸ داي لّيݣ أس تنّا أياد، تدّو تغر ئ ؤلتماس مريم، تسيول-أس س لحسّ أها تنّاياس: «هان لموعلّيم ئدّاد أها أل-أم ئقّار».²⁹ نتّا تسلّا ئس د ييوض سيدنا عيسى، دغيا تكّر، تدّو س-ؤسدّرف غورس.³⁰ ئد سيدنا عيسى ئسول ؤر دّييويض غر ئغرم، ماشان ئسول ݣ-ودغار نّا ݣ-اس تݣرا مرثا عرّاض.³¹ والاينّي ؤداين نّا أݣّيدس ئلّان ݣ تادّارت أر تسعونّان، لّيݣ أنّاين مريم تكّر س زّرب أها تفّغ، تفارنت أها نّان بار ئس تدّا غر تنضلت باش أت ترو دينّا.³² نتّا تيوض مريم غر أدغار نّا ݣ-ئلّا سيدنا عيسى، غاس تانّايت، تكرف غرئضارن نّس أها تنّاس: «أسيدي، مور تلّيد داد ؤر ئتّمتات ؤما».³³ داي نتّا يانّايت سيدنا عيسى دا تّرو نتات د ميدّن نّا أݣّيدس دّيمون، داي ئغيّر شايݣان أها ئشوّش لخاضر نّس.³⁴ داي ئنّاياسن: «ماني ݣ تين تنضلم؟» أها نّاناس: «أسيدي، أورا أتانّايد».³⁵ داي ئقّيم سيدنا عيسى أر ئتّرو.³⁶ ئد ؤداين قّيمن أر تّينين ئنݣراتسن: «راعات، مشحال أيد ئعزّ غورس!»³⁷ ماشان ئتّس ياضن أر تّينين: «نتّا نّا د-ئرارن ئژري ئ ودرغال، ئس ؤر ئغي أد ئݣ شا ئ لعازر حما ؤر ئتّمتات؟».
³⁸ داي ئغيّر عيسى ديخ ألتو شايݣان، ئدّود غر تنضلت، نّا ئݣان أم ئفري أها تتواقن س يون ن-وژرو أخاتار.³⁹ داي ئنّاياسن سيدنا عيسى: «كّسات أژرو!» أها تنّاياس مرثا، ؤلتماس ن-ؤمتّين: «أسيدي، هاتين ئلّانّ ئرصّوض ئدّخ ربعا د-وسّان أياد س-ئنضل».⁴⁰ أها ئنّاياس سيدنا عيسى: «ئس ؤر-ام نّيخ؟ مش دا تّامند تدّيد أتانّايد لعزّ ن ربّي».⁴¹ داي كّسن ميدّن أژرو زݣ تنضلت، ئهزّا سيدنا عيسى ألّن نّس س-ئݣنّا، أها ئنّا: «أيبّا، داش تشّكارخ ئدّخ ئ تسّغتّ.⁴² نكّ سّنخ ئس غوري تسّغات كوتوال، ماشان داش تّينيخ أوال-اد خف ميدّن-اد نّا ئلّان داد، باش أد-امنّ ئد شݣّين أيي د يوزن».⁴³ داي فّير مايد ئنّا أوال-اد، ئسغوي س يون ؤغويّي ئجهدن: «لعازر، فّغدّ غر برّا!»⁴⁴ أها ئفّغدّ ؤمتّين، ئفاسّن نّس د-ئضارن نّس ئضوراسن لكتّان، د وودم نّس ئغمس س يون ن زّيف. داي ئنّاياسن سيدنا عيسى: «كسات-أس ئشرويضن نّاݣ ئتّل، تادجّيمت أد ئدّو».
© 2024 Bible Society of Morocco, used with permission