¹ لّيݣ ئسول يون واسّ ئ لعيد ن-ؤزرّوي ن ووداين، ݣ لوقت-اد، ئسّن سيدنا عيسى ئس تيوض تاسّاعت نّس، حما أد ئموتّي زݣ دّونيت-اد غر ئبّاس. ئكّا أر ئتّيري دّيما وينّا ئسّ يومن ݣ أر ئتݣّا لخدمت نّس ݣ دّونيت، أود دغي دا تن ئتّيري أر لحدّ.
² داي لّيݣ أر ئتّمنسيوْ سيدنا عيسى د-ئمحضرن نّس، ئغرّا شّيطان ياد يهوذا، ممّيس ن سمعان ئسخريوطي أد ئزّنز سيدنا عيسى.³ ئدّخ سيدنا عيسى ئسن ئس-أس ئݣا ربّي مايد-ئݣان شا دّاو ن تنباطّ نّس، ئسّن ألّو ئس دّيدّا زݣ ربّي أها ئدّا أد ياغول غر ربّي،⁴ أياد أخف ئكّر زݣ ئمنسي، ئكّس ئعبان نّس ئنافلّاتن، ياسي يون زّيف ن لشتّان أها ئفكّس ئسّ.⁵ فّير ن-ؤينّا، ئكّر ئفرّغ أمان ݣ يون ن طّاس، ئسفالّ أر ئسّيريد ئضارن ئ ئمحضرن، أر-اسن تن ئسّفّض س لشتّان نّا س-ئفكّس.⁶ ياوض غر سمعان بطرس، نّا س-ئنّان: «ئد شݣين أسيدي، تريد أد ئ تسّيرت ئضارن؟»⁷ داي ئرار غيفس سيدنا عيسى، ئنّاياس: «شݣّين دغي، ؤر تسّيند أينّا تݣّاخ نكّين، ماشان تدّيد أت تفروت شا واسّ».⁸ داي ئنّاياس بطرس: «ئهي أسيدي، ؤر ئ تسّيريت ئضارن تارضاراس». داي ئنّاياس سيدنا عيسى: «مش ؤر-اش سّيردخ ئضارن، ؤر-اخ ئزدي والو».⁹ داي ئنّاياس سمعان بطرس: «واخّا أسيدي، أد-ؤر-ئ سّيريد غاس ئضارن هيلّي، ماشان سّيردييي أود ئفاسّن د-ئخف».¹⁰ ئنّاياس سيدنا عيسى: «هان ونّا ئعومن ؤر ئحدادجا أد ئسّيرد، ئخصّاياس أد ئسّيرد غاس ئضارن، ئدّخ ئزدّيݣ كول نّس. كونّي تزدّيݣم، ماشان ؤر ئد كول نّون».¹¹ سيدنا عيسى ئسّن مايد ئدّان أت ت-ئزّنز، خف ؤياد أخف ئنّا: «كونّي تزدّيݣم، ماشان ؤر ئد كول نّون».
¹² داي لّيݣ أسن ئسّيرد ئضارن، ئلسا ئعبان نّس، ياغول س-أنسا نّس، أها ئنّاياسن: «ئس دا توفرّوم أينّاون ݣيخ؟¹³ ها كونّي دا ئ تقّارم: ألموعلّيم نغد سيدي. غورون لحقّ، ئدّخ تݣيخ.¹⁴ ئوا مش ݣيخ نكّ سيدي نّون د لموعلّيم نّون أها سّيردخاون ئضارن، ئلازم أود كونّي أت تمسيريدم ئضارن ئنݣراتون.¹⁵ هاتين سنعتخ-اون ميمشي ئخصّا أت تݣيم، حما أود كنّي أت تݣيم أم ؤينّاون ݣيخ نكّين.¹⁶ يّيه، ستيتّ أيد-أون تّينيخ: ؤر ئلّي شا ؤسمغ يوݣرن باب نّس، نغد شا ؤمازان يوݣرن ونّا ت-يد يوزنن.¹⁷ دغي، مش دا تّيسينم ئسكّين-اد، أياعريت نّون مش دا تّݣّام أياد.
© 2024 Bible Society of Morocco, used with permission