³² أوين أود يان سين ن ـ ئقطّاطعين حما أثن طّورقن د ـ سيدنا عيسى.³³ لّيݣ نّيوضن غر أدغار نّامي دا تّينين أقلقول، طّورقنث نتّا د - سين ن - ئقطّاطعين نّا، ئلّاياس يوكّ خف ؤفاسي، ييلياس وايّاض خف ؤژلماض.³⁴ داي ينّا سيدنا عيسى: «سامحاسن أيبّا ئي ميدّن أد ئدّخ ؤر سّينن ماي دا تّݣّين». أها ݣرين ئعسكرين ئلان خف ئعبان نّس بضونثن.³⁵ بدّين ميدّن أر تّراعان، أر ديكس تعژّارن ئخاثارّ ن ـ ووداين أر تّينين: «ئفوكّا وييّاض، ئوا يينياس أد ئفوكّو ئخف نّس مش ئݣا سثيتّ لماسيح نّا يسثي ربّي!»
³⁶ أر ديكس تعجّامن أود ئعسكرين أراس أكّان لخل أث ئسو.³⁷ أراس تّينين: «مشد ثݣيد أݣلّيد ن - ووداين، ئوا فوكّو ييخف نّش!»³⁸ ثيلي يوث ن ـ ثالّواحتّ ثتّواݣل خف ؤحنيݣ نّيݣاس ئتّياري ديكس: «واد أيد ئݣان أݣلّيد ن - ووداين!»
³⁹ أرت ئتّعايار يوك زݣ ئقطّاطعين نّا يتّوطورقن ثاما نّس، أراس ئتّيني: «ئيس ؤر ئيد شݣّين أيد ئݣان لماسيح؟ ئوا فوكّا ييخف نّش ثفوكّوداخ!»⁴⁰ أها ييژي غيفس وايّاض ئنّاياس: «ئيس ؤر دا توݣّدّ ربّي د ـ شݣّ دا تّمثادّ أمّ نتّا؟⁴¹ مشد نوكّني هاثين نواثا لموث خف ؤينّا يخّان نّا نݣا، ئيد أرݣاز أد هاثين ؤر ئݣي شا نّا ؤر ئحلين».⁴² داي ينّاياس ئي سيدنا عيسى: «أسيدنا عيسى، شثيي أدّاي تّثدود أتّنبض ݣ ـ ثݣلديتّ نّش».⁴³ أها ينّاياس سيدنا عيسى: «سثيتّ أداش ئنيخ: هاثين ثدّيد أتّيليد أݣّيدي أسّا ݣ - دجّنث!»
(ماتّى 27:45-46؛ مارقوس 15:33-41؛ يوحنّا 19:28-30)
⁴⁴ لّيݣ ثيوض لثناعشّ ن ـ واسّ، ثقّن ثالّسث خف ثمازيرث كول ألّيݣ ثيوض تّلاثا ن ـ ثدݣّاتّ.⁴⁵ داي ثسّولّس ثافوشث، شوي يفلي وسݣلف نّا يلّان ݣ ـ ثدّارث ن - ربّي زݣ وامّاس.⁴⁶ داي يسغويّ سيدنا عيسى ينّا: «أيبّا، دا تݣّخ رّوح ئنو ينݣر ن - ئفاسّن نّش!» ئنّا أياد، أها يسّوفغ ئمان.
⁴⁷ نتّا يانّاي ؤخاثار ن - لعسكر ن ـ رّومان مايد ئجران، ئمجّد ربّي أها ينّا: «سثيتّ ئمنا ورݣاز أد».⁴⁸ أود ميدّن نّا ددّانين أد فرّجن ݣ ـ ؤياد، لّيݣ أنّاين مايد ئجران، أغولن ئبردان نسن ئطيّراسن، أر كّاثن ئدمارّ نسن.⁴⁹ ئيد ئسمونّ ن - سيدنا عيسى، د - ثوثمين نّا ثيد ئثفارن زݣ ثمازيرث ن - لجاليل، بدّاننّ ݣ - تّيساع أر تفرّاجن ݣ ـ مايد أر ئتّجرون.
(ماتّى 27:57-61؛ مارقوس 15:42-47؛ يوحنّا 19:38-42)
⁵⁰ ييلي ݣ ـ لمݣليس ن ـ ووداين يان ؤرݣاز ئژيلن ئمنان، ئسم نّس يوسف.⁵¹ ئݣا زݣ ثمدينث ن ـ رّاما ݣ ـ ثمازيرث ن ـ أيث ياهودا. ؤر ئمساسا د - راي ن - أيث لمݣليس د ـ ؤينّا ݣّان، يافثيد لحال أود نتّا أر ئتّعايان ثاݣلديتّ ن - ربّي أدّ ثدّو.⁵² ئكّر ئدّو غر بيلاطس، ئتّراس لݣنازث ن - سيدنا عيسى.⁵³ داي يدّو يسضرتّيد زݣ وافلّا ن ـ ئحنيݣن ن ـ ؤطّورق أها يتّلتّ ݣ - لكفن، ياسيتّ ئسيرسث ݣ - يوث ن - ثمضلث ئتّوغزان ݣ - ؤقشمير، ؤر دجّين ديكس ئتّومضيل أود يون.⁵⁴ ئيݣ لحال ثادݣّاتّ وارضاراس ن ـ دّجمعا، ثدّجاور سّبث أتّكشم.
⁵⁵ داي كّرنث ثوثمين نّادّ مونّين د ـ سيدنا عيسى زݣ لجاليل ثفارنث يوسف ألّيݣّ أنّاينث ثيمضلث د - ماني ݣ ـ ثتّوسيرس لݣنازث ن ـ سيدنا عيسى.⁵⁶ داي أغولنث غر ثدّارث حبّلنث ئي لاحنوض د - زّهر نّا غا يامسنث ئي لݣنازث، أها سݣونفانث ݣ - واسّ ن - سّبث أم ؤينّا ينّا شّرع.
© 2024 Bible Society of Morocco, used with permission