¹ ݣ تيزويري، ئلّا واوال، د واوال ئلّا غر ربّي، ئݣ واوال ربّي.² ݣ تيزويري ئلّا د ربّي.³ ئݣا ربّي ئسّ مايد ئݣان شا، د بلا نتّا ؤر ئتّواݣّ مايد ئݣان شا زݣ ؤينّا ئلّان.⁴ ديكس أݣ تلّا تودرت، د تودرت-اد أسيدّ ن ميدّن أيد تݣا.⁵ أسيدّ دا ئسّادّا ݣ تالّست، والاينّي تالّست ؤر تغي أتسخسي.
⁶ ئلّا يون ن-ؤرݣاز يوزنتيد ربّي، ئسم نّس يحيى.⁷ ئدّاد أم ئنيݣي، أد-ئشاهد ئ-وسيدّ، باش أد-امنّ ميدّن كول خف نّيرت ن شّهاتّ نّس.⁸ أرݣاز-اد ؤر ئݣّي أسيد، والاينّي ئدّاد باش أد ئشاهد ئ-وسيد.⁹ أسيدّ-اد أيد ئݣان أسيدّ أرسلي نّا ديدّان غر دّونيت أها ئسّيدّ خف ميدّن كول.
¹⁰ هان أوال ئكّا ݣ دّونيت، أها تتّواݣّ ئس دّونيت، ئميل ميدّن ن دّونيت-اد ؤر سّين مايد ئمس.¹¹ ئدّاد غر تمازيرت نّس، ئميل ميدّن نّس ؤر-ئس رحيبن شا.¹² ماشان ئيتس رحبن أها أمنّ ئس، داي ئوشاسن لحقّ أد ݣين أراو ن ربّي،¹³ نّا د-ئلولان ؤر-ئد زݣ بنادم نغد زݣ شّهوات ن وول نغد أينّا ئرا بنادم، ماشان ربّي س-ئخف نّس أيتن ئݣان د واراو نّس.
¹⁴ د واوال ياغول ئݣا بنادم ئعمّرن س رّحمت د لحقّ أها ئزدغ ئنݣراخ، هاتين نانّاي لعزّ نّس، لعزّ نّا ئوشا ئبّاس ئ ممّيس أفرضي.¹⁵ ئشاهداس يحيى أها ئبرّح ئ ميدّن، ئنّاياسن: «هان ونّا أخف أون سّيولخ، لّيݣ نّيخ: "ونّا دّيدّان ضاري، أدّور نّس ئخاتر ؤݣار ن وينو، ئدّخ ئلّا ياد داثي"».¹⁶ داي زݣ لخير نّس وار لحدّ، نومژ كول نّخ لباراكا خف تايّاض.¹⁷ علاحقّ شّرع نّاخ ئوشا ربّي، ييوياختيد سيدنا موسى، ئد رّحمت د-لحقّ ييوياختنيد سيدنا عيسى لمسيح.¹⁸ أݣّد يون ؤر دجّين يانّاي ربّي، ماشان ممّيس أفرضي نّا ئݣان ربّي أها ئعزّ شايݣان غر ئبّاس، أيداخ ئسنعتن مايد ئمس.
(ماتّى 3:1-12؛ مارقوس 1:2-8؛ لوقا 3:15-17)
© 2024 Bible Society of Morocco, used with permission