³ داي ئواجبت سيدنا عيسى: «يّيه، ستيتّ أيدا اش تّينيخ: هات مش ؤر د-ئلال بنادم منّا ؤجديد ؤر ئنّي أد يانّاي تاݣلديتّ ن ربّي».⁴ أها ئسقسات نيقوديموس، ئنّاياس: «أسيدي، ميمشي أد-ئݣ يون بنادم أد-يلال أدّاي ئوسير؟ ئد أد ياغول غر دّيست ن مايس أها ئلالد لمرت تيس سنات؟».⁵ ئسيول سيدنا عيسى، ئنّاياس: «يّيه، ستيتّ أيدا أش تّينيخ: هات مش ؤر د-ئلال بنادم زݣ وامان د رّوح ن ربّي، ؤر ئتّيغي أد-ئكشم غر ثݣلديت ن ربّي.⁶ ونّا د-ئلالن زݣ صّاحت ن بنادم ئݣا بنادم، ئد ونّا ئلالن زݣ رّوح ن ربّي ئݣا رّوح.⁷ أد ؤر تّرعاب ئدّخ-أش نّيخ: "ئخصّاويت كول نّون أد تلاليم منّا ؤجديد".⁸ هان أزݣو دا ئتّصوض غر ماني غر ئرا، أها تسلّت ئ لهزّ نّس، والاينّي ؤر دا تّيسينت ماني زݣ دّيدّا نغد ماني غر ئتدّو. أكيس أيد ئݣا ونّا د-ئلولان زݣ رّوح ن ربّي».
⁹ داي ئسقسات نيقوديموس ألّو: «ميمشي ئغي ؤياد أد ئجرو؟»¹⁰ ئواجبت سيدنا عيسى، ئنّاياس: «معنا شݣّ تݣيد لموعلّيم أخاتار ن-أيت إسرائيل أها ؤر تسّيند ئسكّين-اد!¹¹ يّيه، ستيتّ أينّا دّيخ أد-اش ئنيخ: نوكّني دا اون نسّاوال س-ؤينّا نسّن، أر نتشاهاد س-وينّا نانّاي، والاينّي كونّي ؤر دا تّامنم س-ؤينّا نتّيني.¹² ؤر دا ئسّي تّامنم مش دا اون سّاوالخ خف ئسكين ن واشال، ئوا ماكّاي تݣّيم أد ئسّي تّامنم مش دا اون سّاوالخ خف ئسكين ن-ئݣنوان؟¹³ علاحقّ أود يون ؤر يولي غر ئݣنّا، غاس ممّيس ن بنادم، نّا ديسرّحن زݣ ئݣنّا!¹⁴ أكيس ئسّيلي سيدنا موسى تيفيغري (ن نّخاس خف يون ئحنيݣ) ݣ لخلا، ئمشيس أيد ئلازمن ئ ممّيس ن بنادم أد ئتّوسّيلي،¹⁵ حما ونّا ئسّ ئتّامنن كول أت تيلي غورس تودرت ن وابدا.¹⁶ ئدّخ ئمشيد أس ئرا ربّي ميدّن ن دّونيت خف ؤياد ئوشا ممّيس أفرضي، باش ؤر ئتّاشكا كول ونّا ئسّ ئتّامنن، والاينّي أد غورس تيلي تودرت ن وابدا.¹⁷ ئدّخ ؤر دّيوزين ربّي ممّيس غر دّونيت حما أد-ئحكم خف ميدّن، ماشان يوزنيت باش أد-ئسّ يفوكّا ميدّن.¹⁸ د ونّا ئتّامنّ س ممّيس ن ربّي ؤر دا غيفس ئتّوحكام، ئد ونّا ؤر دا ئسّ ئتّامنّ ئتّوحكم غيفس ياد، ئدّخ ؤر يومين س ممّيس أفرضي.¹⁹ داي واد أيد ئݣان لحوكم: ئس دّيدّا ؤسيدّ غر دّونيت، ماشان ميدّن دا تّيرين تالّست ؤݣار ن-واسيدّ، ئدّخ دا تݣّين أينّا ؤر ئحلين.²⁰ ونّا دا ئتݣّان أينّا ؤر ئحلين ؤر دا ئتّيحميل أسيدّ أها ؤر دا ديكس ئدّو، أكّ ؤر تّوفضاحنت لفعايل نّس ؤر حلينين.²¹ ؤنّا دا ئتݣّان س لحقّ، دا ئتفّغ غر منيد ن ـ ؤسيدّ حما أد ئباين نّيث ئد دا ئتݣّا أينّا ئتّيري ربّي».
© 2024 Bible Society of Morocco, used with permission