¹⁵ «مش دا ئ تّيريم، أت تضاعم لوصيات ئنو.¹⁶ ئد نكين دّيخ أت تّرخ ئ ئبّا أداون ئوش يون ؤمعيون ياضن أد ئقّيم أݣّيدون أبدا،¹⁷ رّوح ن لحقّ، نّا ؤر تّيغيين ميدّن ن دّونيت أد-ئسّ رحبن، ئدّخ ؤر دا ت تّانّاي ؤلا سّنت. ئد كونّي تسّنمت، ئدّخ دا ئتغيما أݣّيدون أها ئدّا أد ييلي ديݣون.¹⁸ ؤر دّيخ أكون زريخ أت تقّيميم ئويل نّون أم ئويجيلن، ماشان دّيخ أد دّاغولخ غورون.¹⁹ ݣ شا ن لوقت ئدروسن، أها ؤسار ئ تّانّاين ميدّن ن دّونيت، ئد كونّي تدّام أد ئ تانّايم. ئدّخ دّرخ، تدّام أت تيديرم أود كونّي.²⁰ أدّاي دياوض واسّ نّا، تدّام أت تيسينم ئس لّيخ ݣ-ئبّا، د كونّي تلّام ديݣي، د نكّين لّيخ ديݣون.
²¹ ونّا ئتّامژن ݣ لوصييات ئنو أها أر-ئسّن ئتݣّا، ونّا دا ئ ئتّيري. د ونّا ئ ئتّيرين أت ت ييتّيري ئبّا، أت تيريخ أود نكّين أها سنعتخاس ئخف ئنو».
²² داي ئنّاياس يهوذا، ؤر ئد يهوذا ئسخريوطي: «أسيدي، ماخ ألّيݣ نكّني أمي تريد أت تسنعت ئخف نّش أها ؤر ئد ئ ميدّن ن دّونيت؟»²³ أها ئرار غيفس سيدنا عيسى، ئنّاياس: «مش دا ئ ئتّيري شا ن يون، أد ئضاع أوال ئنو. ئدّا أت تييري ئبّا، ندّا أد ندّو غورس نكّين د-ئبّا أها نزدغ أݣّيدس.²⁴ د ونّا ؤر دا ئ ئتّيرين ؤر دا ئتضاع أوال ئنو. د واوال نّا مي تسّغادم ؤر ئݣي وينو، ماشان وين ئبّا نّا ئ دّيوزن.²⁵ هاتين نّيخاون ئسكّين-اد كّود سولخ أݣّيدون.²⁶ ماشان أمعيون، ئݣان رّوح ن ربّي نّا نّيقّن أت تيازن ئبّا س-ئسم ئنو، نتّا أيد ئدّان أداون ئسّلمد مايد ئݣان شا، ئسّكتياون أينّاون نّيخ كول.
²⁷ لهنا أيداون تّادجّاخ د لهنا نو أيداون أكّاخ، ؤر ئد أم ؤينّاون تاكّا دّونيت أيداون أكّاخ نكّينتين. أد-ؤر ئتشوّاش لخاضر نّون، ؤلا تݣّدم.
© 2024 Bible Society of Morocco, used with permission